អត្រាគ្របដណ្តប់ទឹកស្អាត និងអនាម័យទូទាំងប្រទេស សម្រេចបានជាង​ ៨៩%

ក្រសួងអភិវឌ្ឍន៍ជនបទ បានកំពុងបន្តអនុវត្តផែនការសកម្មភាពជាតិស្តីពីការផ្គត់ផ្គង់ទឹកស្អាត​ ការសំអាត និងអនាម័យ​ជនបទ ដែលបច្ចុប្បន្នអត្រាគ្របដណ្តប់ទឹកស្អាត និងអនាម័យនៅទូទាំងប្រទេស សម្រេចបានប្រមាណជា ៨៩,៩០%​។ នេះតាមការឲ្យដឹងពីលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ក្នុងឱកាសអញ្ជើញជាអធិបតីក្នុងពីធីប្រកាស ទទួលស្គាល់ជាផ្លូវការ ខេត្តក្រចេះទទួលបានជ័យលាភីបញ្ចប់ការបន្ទោបង់ពាសវាលពាសកាល (ODF) នា​ព្រឹកថ្ងៃទី ៥ ខែ​ឧសភា ឆ្នាំ២០២៥។

ខណៈអត្រាគ្របដណ្តប់ទឹកស្អាតកម្រិតមូលដ្ឋានសម្រេចបានលទ្ធផលប្រមាណជា ៨៧,៤០% និងអនាម័យជនបទកម្រិត​មូលដ្ឋាន សម្រេចបានលទ្ធផលប្រមាណជា ៩២,៤០% ហើយបានកំណត់ថា នៅឆ្នាំ២០៣០ ប្រជាពលរដ្ឋនៅទូទាំងប្រទេស មានទឹកស្អាតប្រើប្រាស់គ្រប់គ្រាន់ និងការប្រតិបត្តិអនាម័យ ១០០% ព្រមទាំងរស់នៅក្នុងបរិស្ថានប្រកបដោយ និរន្ដរភាព​។

បន្ទាប់ពីស្តាប់របាយការណ៍ស្វាគមន៍ពីសំណាក់ លោក វ៉ា ថន អភិបាលនៃគណៈអភិបាលខេត្ត និងតំណាងអង្គការដៃគូ អង្គការ​ទស្សនៈពិភពលោកអន្ដរជាតិរួចមក លោករដ្ឋមន្ត្រីក្រសួងអភិវឌ្ឍន៍ជនបទបានសម្ដែងនូវការកោតសរសើរ និងវាយតម្លៃខ្ពស់ចំពោះការ រីកចម្រើន និងសមិទ្ធផលនានា ដែលខេត្តក្រចេះសម្រេចបានលើគ្រប់វិស័យ ទាំងផ្នែក សន្តិសុខ សណ្តាប់ធ្នាប់ សេដ្ឋកិច្ច សង្គមកិច្ច និងវប្បធម៌ ជាពិសេសជីវភាពរស់នៅកាន់តែល្អ ប្រសើរឡើង ការផ្លាស់ប្ដូរទម្លាប់ និងការកែលម្អលក្ខខណ្ឌនៃការរស់នៅ តាមរយៈការលើកកម្ពស់ការផ្តល់សេវាទឹកស្អាត និងអនាម័យដែលបានធ្វើឱ្យប្រជាពលរដ្ឋបានផ្លាស់ប្តូរទម្លាប់ពី ការផឹកទឹកគ្មានសុវត្ថិភាព មកផឹកទឹកស្អាតជួយទ្រទ្រង់សុខភាព។ ផ្លាស់ប្ដូរពីការបន្ទោបង់ ពាសវាលពាសកាល មកការប្រើប្រាស់បង្គន់អនាម័យត្រឹមត្រូវ និងមានរបៀបរស់នៅ ប្រកបដោយបរិស្ថានល្អ មានភាពស៊ីវិល័យ ព្រមទាំងបានអំពាវនាវដល់រដ្ឋបាលខេត្ត និងគ្រប់ភាគីពាក់ព័ន្ធទាំងអស់ ឱ្យបន្តរក្សាលើការផ្គត់ផ្គង់ទឹក និងអនាម័យជនបទ ជាពិសេសការរិះរកយន្តការរក្សានិរន្តរភាព ខេត្ត ODF និងជំរុញការងារទៅសម្រេច ODF Plus នាពេលដ៏ខ្លីខាងមុខ។

លោករដ្ឋមន្រ្ដី ក៏បានជម្រាបជូនអង្គពិធីពីកម្មវិធីអាទិភាពទាំង ៥ របស់ក្រសួង អភិវឌ្ឍន៍ជនបទ និងចក្ខុវិស័យច្បាស់លាស់របស់ក្រសួង ក្នុងការកសាងតំបន់ជនបទកម្ពុជា ប្រកបដោយវិបុលភាព បរិយាបន្ន នវានុវត្តន៍ ឌីជីថល និងភាពធន់ ទាំងផ្នែកសេដ្ឋកិច្ច សង្គមកិច្ច និងវប្បធម៌៕

អត្ថបទ៖ ប្រុញ វិធិន