សិស្សពូកែ៣រូប ថាការរៀនពូកែ«មិនមែនព្រោះតែពូជពង្សឡើយ»គ្រប់យ៉ាងមានចំណែកមកពីគ្រូ និងខំខ្លួនឯង

សិស្សពូកែថ្នាក់ទី១២ ចំនួន៣រូប ដែលទទួលបានជ័យលាភីលេខ១ លើមុខវិជ្ជាអក្សរសិល្ប៍ខ្មែរ, គណិតវិទ្យា និងរូបវិទ្យា ក្នុងការប្រឡងសិស្សពូកែថ្នាក់ជាតិឆ្នាំសិក្សា២០២៤-២០២៥ ចាត់ទុកការលើកឡើងមួយចំនួនដែលថា «កូនរៀនពូកែព្រោះពូជពង្ស» ថាមិនចំណុះឱ្យការពិត និងជាទស្សនដែលមិនត្រឹមត្រូវ។ មិនចំណុះឱ្យការពិត មិនត្រឹមត្រូវ ដោយសារពួកគេយល់ថា គ្រួសារ ពូជពង្សបង្កើតបានត្រឹមរូបកាយ ហើយចិញ្ចឹមបីបាច់ និងផ្ដល់ការឧបត្ថម្ភគាំពារ និងការលើកទឹកចិត្តប៉ុណ្ណោះ ប៉ុន្តែដើម្បីក្លាយជាពូកែ ទាល់តែសាមីខ្លួនផ្ទាល់ រៀនជាមួយគ្រូដែលពូកែ ខិតខំ និងមានវិធីសាស្រ្តបង្រៀន ហើយសាមីខ្លួនផ្ទាល់ត្រូវតែប្រឹងប្រែងរៀនសូត្រឱ្យខ្លាំង។

បេក្ខនារី ណា មុន្នីចន្ទកន្និកា ជាសិស្សជ័យលាភីលេខ១ លើមុខវិជ្ជាអក្សសិល្ប៍ខ្មែរ មិនស្របយល់ចំពោះ​ទស្សនៈ «កូនរៀនពូកែព្រោះពូជពង្ស» ឡើយ។ បេក្ខនារីមកពីជាយដែនេះ យល់ថា ត្បិតគ្រួសារពូជពង្សមួយ ធ្លាប់មានអ្នករៀនពូកែក៏ពិតមែន ប៉ុន្តែគ្រួសារបង្កើតកូនមក តែរូបរាង  ចិញ្ចឹមបីបាច់ ផ្ដល់ការឧបត្ថម្ភ និងលើកទឹកចិត្តបន្ថែមទៀត ដូច្នេះដើម្បីក្លាយខ្លួនជាសិស្សពូកែត្រូវតែខិតខំរៀនសូត្រ អនុវត្តតាមការបង្រៀន និងលើកទឹកចិត្តពីលោកគ្រូអ្នកគ្រូ។

ណា មុន្នីចន្ទកន្និកា បង្ហាញការមិនយល់ស្របចំពោះទស្សនៈ«កូនរៀនពូកែព្រោះពូជពង្ស»ដូច្នេះ៖«ដើម្បីក្លាយខ្លួនជាសិស្សពូកែ មិនមែនដោយសារយើងកើតមកពូកែស្រាប់ទេ ព្រោះគ្រួសារគាត់បង្កើតយើងមក បង្កើតមកតែរូបរាង បង្កើតមកផ្ដល់តែលក្ខណៈសម្បត្តិ ផ្ដល់តែរូបរាងឱ្យយើងឥតមានគ្មានភាពខ្វះខាត ប៉ុន្តែលទ្ធផលទាក់ទងទៅនឹងការសិក្សាមានតែយើងខិតខំប្រឹងប្រែងខ្លួនឯង តែក៏ទទួលការលើកទឹកចិត្តពីពួកគាត់ និងលោកគ្រូអ្នកគ្រូបង្រៀនផងដែរ។»។  

បើតាម បេក្ខនារី ណា​ មុន្នីចន្ទកន្និកា នៅក្នុងគ្រួសារគេគឺជាកូនតែម្នាក់គត់ ដែលចូលប្រឡងសិស្សពូកែហើយទទួលបានជ័យលាភីលេខ១ទូទាំងប្រទេសបែបនេះ។ មុន្នីចន្ទកន្និកា រៀបរាប់ទាំងអួលដើមកថា គេរៀននៅវិទ្យាល័យអន្លង់វែង ស្រុកអន្លង់វែង ខេត្តឧត្ដរមានជ័យ ដែលជាសាលានៅតំបន់ជាយដែន ពិបាករៀនសូត្រ  ខ្វះគ្រូ ខ្សត់ឯកសារសម្រាប់រៀនសូត្រ។

ណា មុន្នីចន្ទកន្និកា ទម្លាយឱ្យដឹងថា ទម្រាំក្លាយជាសិស្សពូកែនាឆ្នាំនេះ គេធ្លាប់បរាជ័យក្នុងការប្រឡងសិស្សពូកែកម្រិតថ្នាក់ទី៩ ម្ដងរួចមកហើយ។  ក្មេងស្រីរូបនេះ អះអាងថា ទម្រាំទទួលបានជោគជ័យ ពោលគឺទទួលបានជ័យលាភីលេខ១ លើមុខវិជ្ជាអក្សរសិល្ប៍ខ្មែរ ក្នុងការប្រឡងសិស្សពូកែថ្នាក់ជាតិ នាពេលនេះ គេបានរៀនត្រៀមតាំងពី៣ឆ្នាំមុនមកម៉្លេះ។

ចំណែកបេក្ខជន ចាន់ សុវណ្ណរាជ ជាកូនអ្នកព្រៃវែង ដែលជាប់ជ័យលាភីលេខ១ ក្នុងការប្រឡងសិស្សពូកែគណិតវិទ្យាទូទាំងប្រទេស ក៏ទាត់ចោលចំពោះទស្សនៈ«កូនរៀនពូកែព្រោះពូជពង្ស» ដូចគ្នា។ សុវណ្ណរាជ ដែលកើតនៅក្នុងគ្រួសារ ដែលមានឳពុក កំពុងប្រកបរបរជាអ្នករត់កង់បី ម្ដាយជាអ្នកបោកគក់ និងលាងចាន​ឱ្យគេ ដើម្បីបានកម្រៃឱ្យកូនរៀន ថា កូនដែលបើកើតក្នុងគ្រួសារ ពូជពង្សដែលធ្លាប់រៀនពូកែ តែកូននោះមិនខំរៀនទេ កេរ្តិ៍ឈ្មោះដែលពូជពង្សរៀនពូកែនោះ ​មិនអាចជួយឱ្យកូនចៅជំនាន់ក្រោយពូកែបានឡើយ គ្រប់យ៉ាងទាមទារឱ្យកូនចៅ នៃពូជពង្សធ្លាប់រៀនពូកែនោះ ខំប្រឹងប្រែងរៀនបន្ថែមទៀត។

សុវណ្ណរាជ បង្ហាញការយល់ឃើញថា ចំពោះទស្សនៈ«កូនរៀនពូកែព្រោះពូជពង្ស»ដូច្នេះ៖«ខ្ញុំយល់ថាទស្សននេះ មិនមែនត្រឹមត្រូវទាំងអស់ឡើយ ព្រោះថាបើពូជពង្សធ្លាប់រៀនពូកែ ប៉ុន្តែបើយើងមិនខិតខំរៀនសូត្រក៏យើងមិនអាចទទួលបានលទ្ធផលល្អដែរ។ »។

បេក្ខជន ចាន់ សុវណ្ណរាជ ជាសិស្សដែលកំពុងសិក្សានៅវិទ្យាល័យប៊ុនរ៉ានី ហ៊ុន សែន ព្រៃពោន ខេត្តព្រៃវែង ។ ទម្រាំប្រឡងជាប់ជ័យលាភីលេខ១ មុខវិជ្ជាគណិតវិទ្យាថ្នាក់ទី១២ ក្នុងការប្រឡងជ្រើសរើសសិស្សពូកែថ្នាក់ជាតិឆ្នាំ២០២៤-២០២៥  គេអះអាងថា គេបានផ្ដោតតែលើមុខវិជ្ជាគណិតវិទ្យាចាប់ទីថ្នាក់ទី៧មកម៉្លេះ។ បើតាមសុវណ្ណរាជ គេធ្វើស្វ័យសិក្សាដោយខ្លួនឯង ចាប់ពីពេលព្រលប់ម៉ោង៧ រហូតដល់ម៉ោង១១ ក្បែរនឹងកណ្ដាលអធ្រាត្រ ទើបចូលសម្រាក ហើយងើបរៀនម្ដងទៀតនៅវេលាម៉ោង៤ជិតភ្លឺ ដល់ម៉ោង៦ព្រឹក ទើបបន្តទៅរៀននៅសាលាថែមទៀត។

រីឯបេក្ខជន ពៅ ជុំរតនៈ កូនអ្នកសៀមរាប  ដែលជាប់ជ័យលាភីលេខ១ ក្នុងការប្រឡងសិស្សពូកែមុខវិជ្ជារូបវិទ្យាទូទាំងប្រទេស ក្នុងឆ្នាំសិក្សា ២០២៤-២០២៥ ថាខ្លួនប្រឆាំងចំពោះទស្សនៈ «កូនរៀនពូកែព្រោះពូជពង្ស»។ រតនៈ យល់ថា បើសាមីខ្លួនមិនខំរៀន មិនខំស្ដាប់គ្រូហើយ ទោះពូជខ្លាំងប៉ុណ្ណា ក៏មិនអាចជួយឱ្យពូកែបានដែរ ហើយព្រះឥន្ទ្រ ក៏មិនអាចជួយបានដូចគ្នា។

បេក្ខជនជ័យលាភីលេខ១ ពៅ ជុំរតនៈ លើកឡើងដូច្នេះ៖«កត្តាគ្រួសារ ជាកត្តាមួយដែលសំខាន់ក្នុងការកំណត់ថា កូនហ្នឹងពូកែប៉ុណ្ណា ​ប៉ុន្តែសំខាន់ជានោះ គឺកត្តាដែលសិស្សហ្នឹងព្យាយាមប៉ុណ្ណា ខំរៀនប៉ុណ្ណា បើទោះបីជាពូជខ្លាំងប៉ុណ្ណាក៏ដោយ បើអត់ខំរៀន អត់ខំសិក្សា ខំស្ដាប់លោកគ្រូ គឺមិនអាចរៀនចេះទេ គ្មានទេវតាព្រះឥន្ទណាមកបង្រៀនឱ្យចេះបានទេ។»។

រតនៈ ក៏បានឱ្យដឹងថា ទម្រាំទទួលបានជ័យលាភី លេខ១ លើការប្រឡងសិស្សពូកែរូបវិទ្យាថ្នាក់ជាតិ កម្រិតថ្នាក់ទី១២ នាឆ្នាំនេះ គេបានត្រៀមខ្លួនសិក្សារៀនសូត្រតាំងតែពីថ្នាក់ទី៨ មកម៉្លេះ និងឆ្លងកាត់ការប្រឡងសិស្សពូកែកមម្រិតថ្នាក់ទី៩ និងបាន​ជ័យលាភីលេខ២ ផងដែរ និងនៅឆ្នាំ២០២៣  បានចូលរួមកម្មសិក្សានៃកម្មវិធី Sakura Science ក្នុងប្រទេស​ជប៉ុន។ ១ឆ្នាំមុន នឹងទទួលបានជ័យលាភីលេខ១ ក្នុងការប្រឡងសិស្សពូកែមុខវិជ្ជារូបវិទ្យាឆ្នាំ២០២៥ ពោលគឺឆ្នាំ​២០២៤កន្លងទៅ  រតនៈ បានចេញប្រឡង​រូបវិទ្យា​អូឡាំពិច IPhO នៅ​ប្រទេស​អ៉ីរ៉ង់ផងដែរ។  

គួររម្លឹកថា ក្នុងពិធីសំណេះសំណាលជាមួយសិស្សប្រឡងជាប់និទ្ទេសA កាលពីឆ្នាំ២០២២ កន្លងទៅ ​ សម្ដេចតេជោ ហ៊ុន សែន អតីតនាយករដ្ឋមន្ត្រី បានណែនាំដល់ឳពុកម្ដាយសិស្សមួយចំនួន ត្រូវឈប់ប្រើពាក្យថាកូនរៀនពូកែមកពីពូជខ្លួន ហើយពេលកូនរៀនមិនពូកែបែបន្ទោសថាមកពីគ្រូអន់មិនចេះបង្រៀនកូនខ្លួនតទៅទៀតទៅ ព្រោះគ្រូម្នាក់ៗប្រឹងបង្រៀនកូនសិស្សស្ទើដាច់ដង្ហើមទៅហើយ។  បន្ថែមពីនេះ សម្ដេចតេជោ ក៏បានណែនាំឱ្យកូនសិស្សទាំងអស់ត្រូវចេះដឹងគុណគ្រូ ហើយចៀសវាងការតិះដៀលគ្រូបង្រៀន។

កាលពីថ្ងៃទី០៩ ខែឧសភា ឆ្នាំ២០២៥   សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា  វាយតម្លៃ សមត្ថភាពសិក្សារៀនសូត្រខ្លាំងពូកែរបស់សិស្សានុសិស្ស មិនអាស្រ័យទៅលើកម្រិតជីវភាពរបស់គ្រួសារឡើយ គ្រប់យ៉ាងគឺ អាស្រ័យទៅលើការតាំងចិត្ត និងការខិតខំប្រឹងប្រែងរបស់បុគ្គលម្នាក់ៗផ្ទាល់។ សម្ដេច ជឿជាក់ថា កូនអ្នកដែលខ្សត់ទ្រព្យសម្បត្តិមិនប្រាកដថា រៀនចាញ់កូនអ្នកមានជីវភាពធូរធារនោះទេ៕

អត្ថបទដោយ ង៉ិល ណារ៉ាត់