អេមីរ៉ាតអារ៉ាប់រួម ចង់រៀបចំពិព័រណ៍ពាណិជ្ជកម្មនៅកម្ពុជា ដើម្បីជំរុញការវិនិយោគ

អេមីរ៉ាតអារ៉ាប់រួម ប្រកាសបន្តពង្រឹងពង្រីកកិច្ចសហប្រតិបត្តិការជាមួយកម្ពុជាឱ្យកាន់តែរឹងមាំបន្ថែមទៀត ជាពិសេសពាក់ព័ន្ធនឹងការដោះដូរពាណិជ្ជកម្ម និងវិនិយោគ ខណៈសភាពាណិជ្ជកម្មអេមីរ៉ាតអារ៉ាប់រួម កំពុងពិនិត្យលទ្ធភាព ដើម្បីរៀបចំពិព័រណ៍ពាណិជ្ជកម្មនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណឹងនេះ ត្រូវបានបង្ហើបឱ្យដឹងដោយឯកអគ្គរាជទូតអេមីរ៉ាតអារ៉ាប់រួមប្រចាំនៅកម្ពុជា ក្នុងជំនួបសម្ដែងការគួរសម និងពិភាក្សាការងារជាមួយប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត នាព្រឹកថ្ងៃទី១៩ ខែឧសភា ឆ្នាំ២០២៥ នៅវិមានសន្ដិភាព។

តាមលោកឯកអគ្គរាជទូតជម្រាបជូនសម្ដេចធិបតី គឺគណៈប្រតិភូនៃសភាពាណិជ្ជកម្មអេមីរ៉ាតអារ៉ាប់រួម គ្រោងនឹងបំពេញទស្សនកិច្ចនៅកម្ពុជា ក្នុងគោលបំណងពិភាក្សាអំពីកិច្ចសហការលើការរៀបចំពិព័រណ៍ពាណិជ្ជកម្មនៅកម្ពុជា ដើម្បីជំរុញការវិនិយោគ និងពាណិជ្ជកម្មរវាងប្រទេសទាំងពីរ។

លោកឯកអគ្គរាជទូត ក៏បានជម្រាបសម្ដេចធិបតី ពីគម្រោងពិភាក្សារបស់លោកជាមួយក្រសួង-ស្ថាប័នពាក់ព័ន្ធកម្ពុជា ដើម្បីពិភាក្សាអំពីការបន្តជំរុញ និងលើកកម្ពស់ទំនាក់ទំនងប្រទេសទាំងពីរ ពិសេសពិភាក្សាលើការជំរុញការអនុវត្តកិច្ចព្រមព្រៀងដែលប្រទេសទាំងពីរបានឯកភាពគ្នារួចហើយ ធ្វើយ៉ាងណាដាក់ចេញផែនការអនុវត្តជាក់ស្តែង ក៏ដូចជាការជំរុញកិច្ចសហប្រតិបត្តិការលើវិស័យភស្តុភារកម្ម, សន្តិសុខសាយប័រ, និងបញ្ញាសិប្បនិម្មិត។ 

លោក Obaid Saeed Obaid Bintaresh Aldhaheri ឯកអគ្គរាជទូតអេមីរ៉ាតអារ៉ាប់រួមប្រចាំកម្ពុជា ដែលមាននិវេសនដ្ឋាននៅទីក្រុងបាងកក បានសង្កត់ធ្ងន់ដល់ការបន្តពង្រឹងពង្រីកកិច្ចសហប្រតិបត្តិការលើវិស័យអប់រំបន្ថែមទៀត តាមរយៈការបង្កេីនអាហារូបករណ៍ដល់និស្សិតកម្ពុជា ផ្តោតលើការសិក្សា​ជំនាញបច្ចេកវិទ្យា និងបញ្ញាសិប្បនិម្មិត។

សម្តេចធិបតី ហ៊ុន ម៉ាណែត បានសម្តែងការពេញចិត្ត និងវាយតម្លៃខ្ពស់ចំពោះវឌ្ឍនភាពនៃទំនាក់ទំនងទ្វេភាគី​ប្រទេសទាំងពីរ​ ពិសេសលើវិស័យទេសចរណ៍ តាមរយៈការបង្កើនជើងហោះហើរត្រង់ពីអេមីរ៉ាតអារ៉ាប់រួមមកកម្ពុជា និងការរួមចំណែករបស់អេមីរ៉ាតអារ៉ាប់រួមចំពោះការកសាងធនធានមនុស្ស​ ក៏ដូចជាបានគាំទ្រដល់សមាគមមូស្លីមនៅកម្ពុជា។

សម្តេចធិបតី គូសបញ្ជាក់ថា កម្ពុជា​-អេមីរ៉ាតអារ៉ាប់រួម នៅមានវិស័យសក្តានុពលជាច្រើនដែលត្រូវពង្រឹងពង្រីកកិច្ចសហប្រតិបត្តិការបន្ថែមទៀតបាន។ សម្តេចក៏បានបញ្ជាក់ពីទិសដៅនៃការអភិវឌ្ឍឧស្សាហកម្មហាឡាល់នៅកម្ពុជា​ ដើម្បីជំរុញការនាំចេញផលិតផលហាឡាល់ទៅកាន់បណ្តាប្រទេសនៅមជ្ឈិមបូព៌ា និងអេមីរ៉ាត់អារ៉ាប់រួម។

ក្នុងន័យនេះ សម្ដេចនាយករដ្ឋមន្ត្រី បានលើកទឹកចិត្តឱ្យលោកឯកអគ្គរាជទូត បន្តពិភាក្សាជាមួយក្រសួង ស្ថាប័នពាក់ព័ន្ធកម្ពុជា ដើម្បីជំរុញការអនុវត្តកិច្ចព្រមព្រៀងដែលបានឯកភាពគ្នារួច សំដៅប្រែក្លាយជាផែនការអនុវត្តជាក់ស្តែង។ សម្ដេច ថា​ តួនាទីរបស់លោកឯកអគ្គរដ្ឋទូត នឹងក្លាយជាស្ពានតភ្ជាប់ទំនាក់ទំនង​ និងកិច្ច​សហប្រតិបត្តិការ​រវាងប្រទេសទាំងពីរឱ្យកាន់តែរីកចម្រើនមួយកម្រិតទៀត៕