សម្ដេចតេជោ ថាបញ្ហានៅមុំបី ជាល្បិចកលច្រំដែលចង់លេបយកដីខ្មែរ ដោយមេបញ្ជាការថ្នាក់ក្រោម និងមានពួកជ្រុលនិយមថៃគាំទ្រ

សម្រេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ សរសេរលើទំព័រហ្វេសប៊ុកថា ÷ “ការកើតឡើងនៅមុំបីចំនួន៣ថ្ងៃមកនេះ គឺរឿងច្រំដែលនៃល្បិចកលដែលចង់យកដីពីកម្ពុជា ដោយមេបញ្ជាការថ្នាក់ក្រោម ដោយមានការគាំទ្រពីក្រុមនិយមជ្រុលរបស់ថៃផងដែរ”។

សម្ដេចអះអាងដូច្នេះតាមរយ:ទំព័រហ្វេសប៊ុកផ្លូវការ នៅ១១យប់ ក្បែរនឹងកណ្ដាលអាធ្រាត បន្ទាប់ពីសម្ដេចអះអាងថា ពួកជ្រុលនិយមថៃចូលមកជេរប្រមាថ សម្ដេចក្នុងហ្វេសប៊ុក ដែលជាចេតនាចង់បំផ្លាញទំទាក់ទំនងល្អរវាងរដ្ឋាភិបាល និងប្រជាជននៃប្រទេសទាំងពីរ កម្ពុជា-ថៃ និងចង់ដុតកំដៅឲ្យមានការប្រយុទ្ធគ្នារវាងកងទ័ពប្រទេសទាំងពីរ។

សម្ដេចអះអាងថា ក៏មានជនជាតិថៃមួយចំនួន ចង់ឲ្យកម្ពុជាដកកងទ័ពចេញពីតំបន់ដែលកងទ័ពកម្ពុជាកំពុងឈរជើង។

ដើម្បីជៀសវាងការវង្វេងប្រវត្តិសាស្ត្រ សម្ដេចតេជោ សបញ្ជាក់លើ៣ចំណុចដូចខាងក្រោម៖

១. តំបន់មុំបីនេះ ជាទឹកដីកម្ពុជា និងត្រូវបានកងទ័ពកម្ពុជាឈរជើងតាំងពីមុនកិច្ចព្រមព្រៀងប៉ារីសទៅទៀត មានន័យថាមុន MoUឆ្នាំ២០០០ ប្រហែល ១៣ឬ១៤ឆ្នាំ។ អ៊ុនតាក់ប្រហែលជាអាចធ្វើសាក្សីបាន ហើយបើមិនច្បាស់ កម្ពុជា និងថៃ អាចព្រមព្រៀងគ្នាយកបញ្ហានេះ អមដោយផែនទីផ្លូវការដែលអន្តរជាតិទទួលស្គាល់ (មិនមែនជាផែនទីចោរដែលគូសខ្លួនឯងដើម្បីលួចដី) ទៅកាន់តុលាការយុត្តិធម៌អន្តរជាតិឡាអេ ដើម្បីបញ្ចប់សេចក្តីក្រោមយុទ្ធសាស្ត្រពន្លត់ភ្លើង ជាជាងអង្គុយបក់ផ្សែង និងដើម្បីសេចក្តីសុខ និងសាមគ្គីភាពនៃអ្នកជំនាន់ក្រោយកុំឲ្យមានរឿងច្រំដែលកើតឡើងបន្តទៀត។

២. រូបថតប៉ុន្មានសន្លឹកដែលខ្ញុំនិងភរិយាព្រមទាំងសហការីបានទៅកាន់តំបន់នោះ កាលពីជាង១៥ឆ្នាំមុន គឺជាភស្តុតាងកាន់តែច្បាស់បញ្ជាក់ថាជាទឹកកម្ពុជា។ ខ្ញុំមិនអាចស្លៀកពាក់យោធាទៅថតក្នុងទឹកដីថៃ ឬទឹកដីឡាវនៅតំបន់នោះបានទេ ពិតមែនតែពេលនោះ ខ្ញុំទទួលកងទ័ពឡាវនៅក្នុងរោងបុណ្យនេះ (រោងនេះត្រូវបានភ្លើងឆេះកាលពីប៉ុន្មានឆ្នាំមុន)។

៣. កម្ពុជាមិនអាចដកកងទ័ពចេញពីទឹកដីរបស់ខ្លួនតាមការទាមទាររបស់ភាគីថៃបានឡើយ។ ក្បួនបែបនេះ គឺជាក្បួនដែលអតីតនាយករដ្ឋមន្ត្រីថៃ អាភិសិដ្ឋ វេចាជីវ៉ា និយាយមកកាន់ខ្ញុំ ចំពោះមុខប្រធានាធិបតីឥណ្ឌូណេសុី កាលពីខ្ញុំពី២០១១ ថា សូមភាគី២ដកកងទ័ពចេញពីតំបន់ប្រាសាទព្រះវិហារទាំងអស់គ្នា។ ខ្ញុំនិយាយទៅកាន់ អាភិសិដ្ឋ វិញថា ខ្ញុំមិនអាចដកកងទ័ពចេញទឹកដីខ្លួនឯងបានទេផ្ទុយទៅវិញឯកឧត្តមត្រូវដកកងទ័ពឈ្លានពានរបស់ឯកឧត្តមចេញដោយគ្មានលក្ខខណ្ឌ។

គួរឱ្យដឹងថា កាលពីព្រឹកថ្ងៃទី២៨ ខែឧសភា កងទ័ពថៃ បានលបលួចបាញ់ប្រហារមកលើលេណដ្ឋាន ដែលជាទីតែងឈរជើងរបស់កងទ័ពកម្ពុជា ក្នុងភូមិសាស្ត្រភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ បណ្ដាលឱ្យព្រិន្ទបាលឯក សួន រ៉ោន បាត់បង់ជីវិត ក្នុងសម្លៀកបំពាក់ខោខ្លី គ្មានអាវ។ បន្ទាប់ភាគីថៃលបលួចបាញ់ប្រហារមកលើភាគីទ័ពកម្ពុជា ភាគីកងទ័ពខ្មែរបានឆ្លើយតបទៅវិញ នាំឱ្យប៉ះទង្គិចគ្នារយៈពេលប្រមាណ១០នាទី ទើបបញ្ចប់ ក្រោយមេទ័ពកម្ពុជាថៃចរចាតាមទូរស័ព្ទ។

យ៉ាងជុំវិញករណីនេះ កងទ័ពកម្ពុជា ក្រោមការបញ្ជារបស់នាយករដ្ឋមន្ត្រី បានបញ្ជូនកងទ័ព និងអាវុធធុនធ្ងន់ ទៅព្រំដែន ដើម្បីការពារព្រំដែនពីការឈ្លានពានរបស់ថៃ។

បន្ទាប់មកនៅថ្ងៃទី២៩ មេទ័ពជើងគោកកម្ពុជា-ថៃ ជួបចរចាគ្នានៅច្រកទ្វារអូស្មាច់រយៈពេលជាង១ម៉ោង។ ក្រោយការចរចា កម្ពុជាប្រកាសថា នឹងមិនដកទ័ពចេញពីទីតងប៉ះទង្គិច ឬឈរជើងនៅទីនោះដោយគ្មានអាវុធឡើយ៕