កីឡា

ស្ថិតិក្រុមទាំង៣ ត្រូវប៉ះ កម្ពុជា វគ្គជម្រុះក្នុងពូលពាន AFC U23 Asian Cup នៅភ្នំពេញ

បានផុស

១០ វិនាទី មុន

នៅ

ថ្ងៃសុក្រ ៣០ ឧសភា ២០២៥

ដោយ

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) ទទួលធ្វើម្ចាស់ផ្ទះរៀបចំ ការប្រកួតជម្រុះក្នុងពូល G ពានរង្វាន់យុវជនអាស៊ី AFC U23 Asian Cup 2026 នៅប្រទេសអារ៉ាប៊ីសាអ៊ូឌីត បន្ទាប់ពីធ្លាប់ទទួលធ្វើម្ចាស់ផ្ទះវគ្គជម្រុះពាននេះពីរដងហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាប់ឆ្នោតជ្រើសរើសពូលកាលពីថ្ងៃទី២៩ ខែឧសភា គឺ ក្រុម U23 កម្ពុជា ស្ថិតនៅជាមួយក្រុមខ្លាំង អ៉ីរ៉ាក់ អូម៉ង់ និង ប៉ាគីស្ថាន។ តាមមើលសមាសភាពក្រុមគឺ សុទ្ធតែខ្លាំងមិនដាច់ឆ្ងាយពីគ្នាប៉ុន្មានឡើយ។ តាមរូបមន្តនៃការប្រកួតគឺ ក្រុម៤៤ ត្រូវបែងចែកជា១១ពូល ក្នុង១ពូលមាន៤ក្រុម។ ក្រុមលេខ១ក្នុងពូលទាំង១១ និងក្រុមលេខ២ល្អបំផុតចំនួន៤ សរុប១៥ក្រុម បូកនឹងម្ចាស់ផ្ទះ អារ៉ាប៊ីសាអ៊ូឌីត គឺចំនួន១៦ក្រុមនៅជុំចុងក្រោយ។

កម្ពុជាមិនធ្លាប់មានប្រវត្តិឈានដល់ជុំចុងក្រោយឡើយ ពោលគឺធ្លាក់ត្រឹមវគ្គជម្រុះក្នុងពូលរហូត។ ឆ្នាំ២០២៥ គឺជាការទទួលធ្វើម្ចាស់ផ្ទះលើកទី៣ បន្ទាប់ពីធ្លាប់ធ្វើម្ចាស់ផ្ទះឆ្នាំ២០១៧ ឆ្នាំ២០១៩។ តើកម្ពុជាអាចបង្កើតប្រវត្តិសាស្ត្រលលើកដំបូងក្នុងការឡើងទៅជុំចុងក្រោយទេ? ក្រឡេកមើលប្រវត្តិរបស់ក្រុមទាំង៤សម្រាប់ពូល G ក្នុងពានរង្វាន់អាស៊ី។

អ៉ីរ៉ាក់

U23 អ៉ីរ៉ាក់ ជាក្រុមខ្លាំងមិនធ្លាប់ធ្លាក់ក្នុងវគ្គជម្រុះក្នុងពូលឡើង។ ចាប់តាំងពីពាននេះបង្កើតក្នុងឆ្នាំ២០១៣ ពួកគេបានធ្វើល្អដោយឡើងដល់ជុំចុងក្រោយរហូត។ អ្វីដែលកាន់តែពិសេស នៅឆ្នាំដំបូង២០១៣ ពួកគេបានឈ្នះជើងឯកតែម្តង។ ឆ្នាំ២០១៦ ពួកគេទទួលបានលេខ៣។ ឆ្នាំ២០១៨ ពួកគេទទួលបានលេខ៦។ ឆ្នាំ២០២០ ពួកគេធ្លាក់ត្រឹមវគ្គសន្សំពិន្ទុក្នុងពូល ហើយឆ្នាំ២០២២ ទទួលបានលេខ៦ និងចុងក្រោយឆ្នាំ២០២៤ ពួកគេទទួលបានលេខ៣។

កម្ពុជា

U23 កម្ពុជា មិនធ្លាប់បានឆ្លងផុតវគ្គជម្រុះក្នុងពូលឡើយ ប៉ុន្តែតែងតែចូលរួមប្រកួតជម្រុះក្នុងពូលរហូតគិតចាប់តាំងពីឆ្នាំដំបូង២០១៣។

ឆ្នាំ២០១៣ ធ្លាក់វគ្គជម្រុះក្នុងពូល ក្រោយឈ្នះ១ប្រកួត ស្មើ១ប្រកួត និងចាញ់៣ប្រកួត
ឆ្នាំ២០១៦ ធ្លាក់វគ្គជម្រុះក្នុងពូល ក្រោយឈ្នះ១ប្រកួត និងចាញ់២ប្រកួត
ឆ្នាំ២០១៨ ធ្លាក់វគ្គជម្រុះក្នុងពូល ក្រោយឈ្នះ១ប្រកួត ស្មើ១ប្រកួត និងចាញ់១ប្រកួត
ឆ្នាំ២០២០ ធ្លាក់វគ្គជម្រុះក្នុងពូល ក្រោយស្មើ១ប្រកួត និងចាញ់២ប្រកួត
ឆ្នាំ២០២២ ធ្លាក់វគ្គជម្រុះក្នុងពូល ក្រោយឈ្នះ១ប្រកួត និងចាញ់១ប្រកួត
ឆ្នាំ២០២៤ ធ្លាក់វគ្គជម្រុះក្នុងពូល ក្រោយឈ្នះ១ប្រកួត ស្មើ១ និងចាញ់១ប្រកួត

អូម៉ង់

U23 អូម៉ង់ មានកំណត់ត្រាល្អគួរសមដោយធ្លាប់បានឡើងដល់ជុំចុងក្រោយ២លើក ប៉ុន្តែបើគិតពិន្ទុជារួម ពួកគេមានតិចជាងកម្ពុជា ដូច្នេះហើយបានជាតារាងចំណាត់ថ្នាក់នៅក្រោមកម្ពុជា។

ឆ្នាំ២០១៣ បានឡើងដល់ជុំចុងក្រោយ ក្រោយឈ្នះ៣ ស្មើ១ និងចាញ់១។ នៅជុំចុងក្រោយ ពួកគេធ្លាក់ក្នុងពូល ក្រោយ ឈ្នះ១ និងចាញ់២។
ឆ្នាំ២០១៦ ធ្លាក់វគ្គជម្រុះក្នុងពូល ក្រោយឈ្នះ២ប្រកួត និងស្មើ២ប្រកួត
ឆ្នាំ២០១៨ បានឡើងជុំចុងក្រោយ បន្ទាប់ពីឈ្នះទាំង២ប្រកួត។ នៅជុំចុងក្រោយ ពួកគេចាញ់ទាំង៣ប្រកួតនៅវគ្គក្នុងសន្សំពិន្ទុក្នុងពូល។
ឆ្នាំ២០២០ ធ្លាក់វគ្គជម្រុះក្នុងពូល ក្រោយឈ្នះ១ប្រកួត និងស្មើ១ប្រកួត
ឆ្នាំ២០២២ ធ្លាក់វគ្គជម្រុះក្នុងពូល ក្រោយឈ្នះ១ប្រកួត និងចាញ់២ប្រកួត
ឆ្នាំ២០២៤ ធ្លាក់វគ្គជម្រុះក្នុងពូល ក្រោយឈ្នះ២ប្រកួត និងចាញ់១ប្រកួត

ប៉ាគីស្ថាន

U23 ប៉ាគីស្ថាន មិនសូវមានស្ថិតិល្អទេក្នុងពានរង្វាន់ AFC U23 Asian Cup ដោយធ្លាប់បានចូលរួមប្រកួតជម្រុះក្នុងពូល៣ដង និងមិនបានចូលរួម៣ដង។

ឆ្នាំ២០១៣ ធ្លាក់វគ្គជម្រុះក្នុងពូល ក្រោយស្មើ១ប្រកួត និងចាញ់៤ប្រកួត
ឆ្នាំ២០១៦ ធ្លាក់វគ្គជម្រុះក្នុងពូល ក្រោយឈ្នះ១ប្រកួត និងចាញ់៣ប្រកួត
ឆ្នាំ២០១៨ មិនបានចូលរួមប្រកួតជម្រុះក្នុងពូល
ឆ្នាំ២០២០ មិនបានចូលរួមប្រកួតជម្រុះក្នុងពូល
ឆ្នាំ២០២២ មិនបានចូលរួមប្រកួតជម្រុះក្នុងពូល
ឆ្នាំ២០២៤ ធ្លាក់ជម្រុះក្នុងពូល ក្រោយចាញ់ទាំង៣ប្រកួត

កម្មវិធីប្រកួត

អ៉ីរ៉ាក់ vs ប៉ាគីស្ថាន (ថ្ងៃទី៣ កញ្ញា)
កម្ពុជា vs អូម៉ង់ (ថ្ងៃទី៣ កញ្ញា)
អូម៉ង់ vs អ៉ីរ៉ាក់ (ថ្ងៃទី៦ កញ្ញា)
ប៉ាគីស្ថាន vs កម្ពុជា (ថ្ងៃទី៦ កញ្ញា)
អូម៉ង់ vs ប៉ាគីស្ថាន (ថ្ងៃទី៩ កញ្ញា)
អ៉ីរ៉ាក់ vs កម្ពុជា (ថ្ងៃទី៩ កញ្ញា)

អត្ថបទ៖ វីរបុត្រ

Kampuchea Thmey Daily

ស្ថិតិក្រុមទាំង៣ ត្រូវប៉ះ កម្ពុជា វគ្គជម្រុះក្នុងពូលពាន AFC U23 Asian Cup នៅភ្នំពេញ

កីឡា

ស្ថិតិក្រុមទាំង៣ ត្រូវប៉ះ កម្ពុជា វគ្គជម្រុះក្នុងពូលពាន AFC U23 Asian Cup នៅភ្នំពេញ