ព័ត៌មានអន្ដរជាតិ

សរុបការខូចខាតពីគ្រោះរញ្ជួយដីនៅមីយ៉ាន់ម៉ាមានជាង១.៨ ពាន់លានដុល្លារ

បានផុស

១៧ វិនាទី មុន

នៅ

ថ្ងៃសុក្រ ៣០ ឧសភា ២០២៥

ដោយ

យោងតាមការចេញផ្សាយរបស់ asianews.network នៅថ្ងៃទី ៣០ខែឧសភានេះ ការខូចខាតពីការរញ្ជួយដីកាលពីថ្ងៃទី ២៨ ខែមីនានៅក្នុងប្រទេសមីយ៉ាន់ម៉ាត្រូវបានគេប៉ាន់ប្រមាណថាមានចំនួនប្រហែល ៣.៨ ពាន់ពាន់លាន kyat ((ជាង ១.៨ពាន់លានដុល្លារអាមេរិក)។ នេះបើយោងតាមមេដឹកនាំរបបយោធាមីយ៉ាន់ម៉ា លោក មីន អ៊ុងឡាំង (Min Aung Hlaing) ដែលជាប្រធានក្រុមប្រឹក្សាកាត់បន្ថយ និងគ្រប់គ្រងគ្រោះមហន្តរាយជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីប្រគល់អំណោយនៅទីក្រុងណៃពិដោកាលពីថ្ងៃទី ២៩ ឧសភា លោកមីនអ៊ុងឡាំង បានលើកឡើងពីការបំផ្លិចបំផ្លាញដ៏សម្បើមនៅទូទាំងតំបន់ និងរដ្ឋចំនួន១០រួមទាំងទីក្រុង Nay Pyi Taw។

ការរញ្ជួយដីនេះបានបណ្តាលឱ្យមនុស្ស ៣,៧៣៩ នាក់បានស្លាប់ មនុស្ស ៦៨ នាក់បានបាត់ខ្លួន និង ៥,១០៤ នាក់បានរងរបួស ដែលប៉ះពាល់ដល់មនុស្សជាង ៥០៦,០០០នាក់ និងធ្វើឱ្យខូចខាតដល់បន្ទប់ក្នុងអគារជាង ១៦២,០០០។

ការខូចខាតហេដ្ឋារចនាសម្ព័ន្ធ រួមមានផ្ទះជាង ៥១,០០០ខ្នងផ្លូវចំនួន ៤៣១ ផ្លូវ ស្ពានចំនួន១០៣ និងខូចខាតយ៉ាងធ្ងន់ធ្ងរដល់ផ្លូវដែក បណ្តាញអគ្គិសនី សាលារៀន មន្ទីរពេទ្យ អគារសាសនា និងផ្ទៃដីកសិកម្ម ខណៈរបាយការណ៍ខ្លះបានរាយការណ៍ពីចំនួនអ្នកស្លាប់និងការខូចខាតច្រើនជាងនេះ។

រដ្ឋាភិបាលមីយ៉ាន់ម៉ាបានចាប់ផ្តើមឆ្លើយតបគ្រោះមហន្តរាយរបស់ខ្លួនតាមរយៈមជ្ឈមណ្ឌលគ្រប់គ្រងគ្រោះមហន្តរាយ (DMC) នៅថ្ងៃទី ២៩ខែមីនា ដោយផ្តល់ជម្រកសង្គ្រោះបន្ទាន់ អាហារ ទឹក និងការព្យាបាល។

ទោះយ៉ាងណាមកដល់ពេលនេះប្រជាជនដែលរងផលប៉ះពាល់នៅតែប្រឈមបញ្ហដោយសារពួកគេនៅស្នាក់នៅក្នុងតង់បណ្ដោះអាសន្ននិងខ្វះខាតគ្រឿងអាស្រ័យយ៉ាងច្រើន បើទោះបីជាមានកិច្ចសហប្រតិបត្តិការជាមួយម្ចាស់ជំនួយអន្តរជាតិ រួមមានប្រទេសចិន ឥណ្ឌា រុស្ស៊ី បណ្តាប្រទេសអាស៊ាន និងអង្គការមនុស្សធម៌សម្រាប់ការចែកចាយជំនួយក៏ដោយ។

លើសពីវិបត្តិដែលកំពុងប្រឈម កងកម្លាំងរំដោះនៅតាមតំបន់នានាបន្តប្រយុទ្ធ និង របបយោធានៅតែបន្តការវាយប្រហារតាមអាកាសរបស់ខ្លួនដែលសម្លាប់ជនស៊ីវិលជាបន្តបន្ទាប់ បើទោះបីជាប្រកាសបទឈប់បាញ់រហូតដល់ផុតខែនេះ និងបើទោះបីទទួលការរិះគន់ជាអន្តរជាតិក៏ដោយ ដែលបញ្ហាទាំងនេះបន្ថែមវិបត្តិដល់ប្រជាជនមីយ៉ាន់ម៉ាបន្ថែមទៀត៕