វៀតណាមបង្ហាញក្តី​បារម្ភរឿងសារធាតុគីមីប្រើ​បណ្តុះ​សណ្តែក​ដែល​បណ្តាល​ឲ្យ​ពុល និង​ខូច​សួត

រោងចក្រផលិតជាច្រើនត្រូវបានគេរកឃើញថា ប្រើប្រាស់សារធាតុគីមីហាមឃាត់ដើម្បីធ្វើឲ្យពន្លកសណ្ដែកមានពណ៌ស​ស្អាត​គួរឲ្យចង់ទទួល​​ទាន​។ សណ្តែកបណ្តុះដែលប្រើសារធាតុគីមីរាប់ពាន់តោន ត្រូវបានលក់នៅលើទីផ្សារ ដែលគំរាមកំហែង​យ៉ាងធ្ងន់ធ្ងរដល់សុខភាពអ្នកប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រើប្រាស់សារធាតុគីមីហាមឃាត់ក្នុងការផលិតសណ្តែកបណ្តុះកំពុងក្លាយជាបញ្ហាសុវត្ថិភាពចំណីអាហារធ្ងន់ធ្ងរនៅក្នុងប្រទេសវៀតណាម។ ជាក់ស្ដែង កាលពីថ្មីៗនេះ អាជ្ញាធរបានបង្រ្កាបទីតាំងផលិតសណ្តែកបណ្តុះជាច្រើនកន្លែង ដោយប្រើប្រាស់សារធាតុ 6-Benzylaminopurine (6-BAP) ដែល​ជាសារធាតុហាមឃាត់ប្រភេទអរម៉ូនរុក្ខជាតិ ជួយជំរុញការលូតលាស់ និងការអភិវឌ្ឍន៍របស់រុក្ខជាតិ ដែលអាចបណ្តាលឲ្យពុលស្រួចស្រាវ និងខូចសួត។

គួរឲ្យបារម្ភ មុននឹងរកឃើញថាបំពានច្បាប់ រោងចក្រមួយចំនួនទទួលបានវិញ្ញាបនបត្រសុវត្ថិភាពចំណីអាហារ ដែលនោះបានធ្វើឲ្យអតិថិជនក្នុងស្រុកបាត់បង់ទំនុកចិត្តទាំងស្រុង។

ដោយឡែក កាលពីពេលថ្មីៗនេះ ប៉ូលិសខេត្ត Lao Cai បានរកឃើញ និងបំផ្លាញកន្លែងផលិតចំនួនពីរនៅក្នុងទីក្រុង Lao Cai ដែលប្រើប្រាស់សារធាតុគីមីពុល ដើម្បីផលិតសណ្តែកបណ្តុះជិត ៣៥០ តោនសម្រាប់លក់នៅលើទីផ្សារ។

ជាក់ស្តែងនៅពេលចុះត្រួតពិនិត្យ កាលពីថ្ងៃទី ២៣ ខែឧសភា សមត្ថកិច្ចបានរកឃើញកចំនួន ២៧១ ធុង ចំណុះប្រហែល ១៥ លីត្រ មានផ្ទុកសណ្តែកបណ្តុះជាច្រើនប្រភេទ ទម្ងន់សរុបប្រហែល ២.៥ តោន។ ក្នុងពេលជាមួយគ្នានោះដែរ ស្ថិតនៅទីតាំងផ្សេងគ្នាមួយទៀត អាជ្ញាធរបានរកឃើញធុងសណ្ដែកបណ្ដុះចំនួន៦០២ធុង ក្នុងនោះ៣១៣ធុងមានសណ្តែកបណ្តុះរួចរាល់ប្រមាណ៤,១តោន (ប្រភេទភ្ញាស់៥ថ្ងៃ) កំពុងរៀបចំដឹកជញ្ជូនប្រុងយកទៅលក់ទៅកាន់ទីផ្សារ។

អាជ្ញាធរ​ក៏​បាន​រឹបអូស​បាន​ឧបករណ៍ចម្រុះ​មួយ​ចំនួន​ ដែល​ប្រើ​សម្រាប់​ផលិត​សណ្តែកបណ្តុះ រួម​នឹង​វត្ថុ​តាង​ផ្សេង​ទៀត ។ លទ្ធផលនៃការពិនិត្យកោសល្យវិច្ច័យនៅវិទ្យាស្ថានវិទ្យាសាស្ត្រព្រហ្មទណ្ឌនៃក្រសួងសន្តិសុខសាធារណៈបានកំណត់ថាវត្ថុធាតុខាងលើមានផ្ទុកសារធាតុ 6-Benzylaminopurine (6-BAP) ។

យ៉ាងណាមិញ នៅពេលនោះបន្តិច កាលពីថ្ងៃទី១១ ខែមេសា នាយកដ្ឋាននគរបាលស៊ើបអង្កេត ប្រឆាំងអំពើពុករលួយ សេដ្ឋកិច្ច និងអំពើរត់ពន្ធ (PC03 – នគរបាលខេត្ត Nghe An) បានសម្របសម្រួលជាមួយអង្គភាពពាក់ព័ន្ធ ដើម្បីចុះត្រួតពិនិត្យរដ្ឋបាលរោងចក្រផលិតសណ្តែកបណ្តុះចំនួន ៤កន្លែងក្នុងក្រុង Vinh។

អាជ្ញាធរ​បាន​រឹបអូស​បាន​ទឹក​សណ្តែកបណ្តុះ​ជិត ២០០០​ធុង ទម្ងន់​សរុប​ប្រហែល ២៥​តោន ទឹកចំរាញ់ចេញពីស្ករគ្រាប់ដើម្បីត្រាំ​ ២៥ លីត្រ សារធាតុ​គីមី (៦-Benzylaminopurine) និង ១៥០ លីត្រ​លាយ​ទឹក​សណ្តែកបណ្តុះ រួម​នឹង​សម្ភារ និង​ឯកសារ​ពាក់ព័ន្ធ​ជាច្រើន​ទៀត។

ក្នុងអំឡុងពេលការស៊ើបអង្កេតបន្ថែម ប៉ូលិសបានកំណត់ថា ចាប់ពីឆ្នាំ ២០២៤ រហូតដល់ពេលរកឃើញ មុខសញ្ញា៤រូបបានផលិត និងលក់សណ្តែកបណ្តុះប្រមាណ ៣.៥០០តោន ដែលមានផ្ទុកសារធាតុគីមីពុល។ ផលិតផលទាំងនេះត្រូវបានចែកចាយទៅកាន់ទីផ្សារ និងហាងលក់បន្លែជាច្រើនក្នុងខេត្ត និងតំបន់ជិតខាង។

នៅចុងខែធ្នូ ឆ្នាំ ២០២៤ ប៉ូលិសខេត្ត Dak Lak ក៏បានត្រួតពិនិត្យកន្លែងផលិតសណ្តែកបណ្តុះចំនួន៦ កន្លែងក្នុងតំបន់តែមួយ។ ប៉ូលិសបានរកឃើញថា បន្ថែមពីលើការប្រើប្រាស់គ្រឿងផ្សំដូចជា សណ្តែកបៃតង កំបោរ និងទឹកអណ្តូង ទីតាំងទាំងនោះក៏បានប្រើប្រាស់សារធាតុរាវគ្មានពណ៌ ដែលជាសារធាតុសកម្ម 6-Benzylaminopurine ផងដែរ។

ចំពោះសារធាតុសកម្ម 6-Benzylaminopurine អាចជួយឲ្យសណ្ដែកបណ្ដុះកាន់តែធំធាត់ មានឫសខ្លី និងស្អាតជាងមុន ធ្វើឲ្យងាយស្រួលលក់ និងចំណេញកាន់តែច្រើន។ ការប្រើប្រាស់មានផលប៉ះពាល់ធ្ងន់ធ្ងរជាច្រើនដល់សុខភាព ករណីធ្ងន់ធ្ងរអាចនាំឲ្យកើតជំងឺស្ទះសួត ពុល ឬអាចឈានដល់ស្លាប់។ ទាំងនេះគឺនេះ​ជា​សារធាតុ​ជំរុញ​ការលូតលាស់​កោសិកា ប្រសិនបើ​មនុស្ស​ប៉ះ​ពាល់ ឬ​ទទួលទាន វា​នឹង​ប៉ះពាល់​ដល់​សុខភាពយ៉ាងធ្ងន់ធ្ងរ​៕

អត្ថបទ៖ សាង ស្រីល័ក្ខ

ចុចអាន៖វៀតណាម បិទ​រោងចក្រ​ផលិត​សណ្តែកបណ្តុះ ក្រោយរកឃើញសារធាតុ​ពុល អាចឲ្យមនុស្សស្លាប់ចុចអាន៖