នយោបាយ

លោក គុជ លី៖ បើខ្លួនឯងស្អប់សន្ដិភាពកុំបបួលគេបំផ្លាញសន្ដិភាព

បានផុស

១២ ខែ មុន

នៅ

ថ្ងៃសុក្រ ៣០ ឧសភា ២០២៥

ដោយ

ប្រធានគណបក្សខ្មែរតែមួយលោក គុជ លី បានលើកឡើងថាក្រុមនយោបាយជ្រុលនិយមនៅកម្ពុជាកើតឡើងពីការច្រណែនឈ្នានីសលើភាពជោគជ័យរបស់សម្ដេចតេជោ និងគណបក្សប្រជាជនកម្ពុជា ដែលបានបណ្ដុះនូវការស្អប់ចងគំនុំបង្កើតឱ្យមានភាពវឹកវរក្នុងសង្គមឱ្យមនុស្សជាប់ពន្ធនាគារដើម្បីបម្រើឱ្យការច្រណែនរបស់ពួកគេប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្នីសិទសារព័ត៌មានបន្ទាប់ពីប្រជុំប្រធានគណបក្សនយោបាយក្នុងសម្ព័ន្ធភាពនៅរសៀលថ្ងៃទី៣០ ខែឧសភា ឆ្នាំ២០២៥ នៅវិមាន៧មករា រាជធានីភ្នំពេញ លោក គុជ លី ថាចលនារបស់ក្រុមជ្រុលនិយមបានកើតនូវឆ្នាំ១៩៩៨ កើតរូបមន្ត «មានស៊ីអត់សែន» មិនទទួលស្គាល់ការបោះឆ្នោត បង្កើតព្រឹត្តិការណ៍នានាដើម្បីញុះញង់ពលរដ្ឋឱ្យប្រឆាំងរដ្ឋាភិបាលដោយពួកគេជ្រកក្រោមផ្លាកអ្នកប្រជាធិបតេយ្យ ដែលធ្វើឱ្យពលរដ្ឋរងគ្រោះជាច្រើនពីចលនានេះរហូតដល់បច្ចុប្បន្ន។

លោកថា៖ «ពួកមេជ្រុលនិយមមានតែខ្លួនឯងតែម្នាក់ទេតែកុំភ្លេចថាក្រុមសកម្មជនរបស់ខ្លួនហើយប្រជាពលរដ្ឋដែលជាម្ចាស់ផ្ទះគេស្រលាញ់សន្ដិភាព។ បើខ្លួនឯងស្អប់សន្ដិភាពសុំកុំបបួលគេបំផ្លាញសន្ដិភាព។ ពួកនេះភ្លេចខ្លួនឯង ខ្លួនឯងនិរទេសនៅបរទេសប៉ន្ដែបងប្អូនគ្រួសាររបស់ខ្លួនកំពុងរស់នៅប្រទេសកម្ពុជាទទួលផលលាភនៅក្នុងប្រទេសកម្ពុជារហូតដល់សព្វថ្ងៃ»។

គួរឱ្យដឹងផងដែរថាប្រធានគណបក្សនយោបាយក្នុងសម្ព័ន្ធភាពទាំង២៩បានជួបប្រជុំប្រចាំឆ្នាំនៅព្រឹកថ្ងៃទី៣០ ខែឧសភានេះដោយក្នុងកិច្ចប្រជុំនោះបានផ្ដោតខ្លាំងទៅលើការប្រឆាំងនយោបាយជ្រុលនិយម សម្អប់ជាតិសាសន៍ ជាពិសេសក្នុងពេលដែលស្ថានភាពព្រំដែនកម្ពុជា-ថៃកំពុងកើនកម្ដៅដូចបច្ចប្បន្ន។

អ្នកនាំពាក្យគណបក្សប្រជាជនកម្ពុជាលោក ជា ធីរិទ្ធ បានថ្លែងក្នុងសន្នីសិទសារព័ត៌មានថាក្នុងជំនួបនោះសម្ដេចតេជោ ហ៊ុន សែន បន្តសង្កត់ធ្ងន់លើការប្រឆាំងនយោបាយជ្រុលនិយម ដោយបញ្ជាក់ថាដរាបណានយោបាយជ្រុលនិយមនៅតែមាននោះកម្ពុជានៅតែមានហានិភ័យ។ លោកក៏បានបញ្ជាក់ផងដែរពីវិធានការក្នុងការបង្ក្រាបចលនាប្រឆាំងដែលចង់ផ្ដួលរំលំរដ្ឋាភិបាលដោយខុសច្បាប់ផងដែរ៕