នយោបាយ

សម្ព័ន្ធភាពគណបក្សនយោបាយទទួលស្គាល់គណបក្សសន្ដិភាពជាតិជាសមាជិកទី២៩

បានផុស

១១ ខែ មុន

នៅ

ថ្ងៃសុក្រ ៣០ ឧសភា ២០២៥

ដោយ

សម្ព័ន្ធភាពគណបក្សនយោបាយបានសម្រេចទទួលស្គាល់គណបក្សសន្ដិភាពជាតិជាសមាជិកទី២៩ ក្នុងកិច្ចប្រជុំប្រធានគណបក្សនយោបាយក្នុងសម្ព័ន្ធភាពដែលរៀបចំនៅវិមាន៧ មករា ព្រឹកថ្ងៃទី៣០ ខែឧសភា ឆ្នាំ២០២៥នេះ។

អ្នកនាំពាក្យគណបក្សប្រជាជនកម្ពុជាលោក ជា ធីរិទ្ធ បានឱ្យដឹងការការទទួលយកសមាជិកថ្មីនេះធ្វើឡើងជាឯកច្ឆន្ទ ដោយយោងទៅតាមនយោបាយផ្ទៃក្នុងនិងកិច្ចព្រមព្រៀងរបស់សម្ព័ន្ធភាពគណបក្សនយោបាយដែលបង្កើតពីថ្ងៃទី២៥ ខែតុលា ឆ្នាំ២០២៣។

លោកបានឱ្យកម្ពុជាថ្មីដឹងបន្ថែមថាក្រៅពីក្លាយជាសមាជិកសម្ព័ន្ធភាពគណបក្សនយោបាយហើយគណបក្សនេះក៏បានចូលជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់ផងដែរ។

លោកថា៖ «តាមបទបញ្ជាផ្ទៃក្នុងរបស់យើងរបស់គណបក្សសម្ព័ន្ធភាពឱ្យតែគាត់មានឆន្ទៈពិតប្រាកដហើយការពិនិត្យរបស់គណបក្សសម្ព័ន្ធផ្សេងទៀតដែលគាត់មើលឃើញថាគណបក្សនេះមានលក្ខខន្តគ្រប់គ្រាន់ក្នុងការចូលរួមជាសមាជិកគឺយើងមានការទទួលយកថ្មីបន្ថែមព្រោះក្នុងកិច្ចព្រមព្រៀងក៏បើកឱ្យមានការទទួលយកជាបន្តបន្ទាប់ដែរក្នុងករណីដែលគណបក្សមានគោលជំហរដូចគ្នា»។

គួរឱ្យដឹងផងដែរសម្ព័ន្ធភាពនយោបាយរវាងគណបក្សប្រជាជនកម្ពុជានិងបក្សសម្ព័ន្ធភាពផ្សេងទៀតត្រូវបានបង្កើតឡើងនៅថ្ងៃទី២៥ ខែតុលា ឆ្នាំ២០២៣ ដោយមានកិច្ចព្រមព្រៀងចងសម្ព័ន្ធនោះ៨ចំណុចអំពីការពង្រឹងកិច្ចសហប្រតិតបត្តិការល្អ គោរពការពារបូរណភាពទឹកដី រដ្ឋធម្មនុញ្ញ និងរាជានិយម ចូលរួមសហការទប់ស្កាត់ និងកំចាត់ចោលនយោបាយជ្រុលនិយមជាដើម។

អ្នកនាំពាក្យគណបក្សប្រជាជនកម្ពុជាលោក ជា ធីរិទ្ធ បានបញ្ជាក់ថាសម្ព័ន្ធភាពជាសម្ព័ន្ធភាពរឹងមាំនិងយូរអង្វែងដែលនឹងបន្តធ្វើការជាមួយគ្នាយូរអង្វែងតទៅទៀត៕