ជីវិតកម្សាន្ដ

Angelababy ត្រូវអ្នកគ្រប់គ្រងស្តីបន្ទោសតាមផ្លូវ ខណៈអាជីពក៏ពិបាកស្រោចស្រង់មកវិញដែរ

បានផុស

១១ ខែ មុន

នៅ

ថ្ងៃសុក្រ ៣០ ឧសភា ២០២៥

ដោយ

តារាចិន Angelababy ត្រូវគេតាមប្រមាញ់ដោយអ្នកថតរូបឯករាជ្យ paparazzi ខណៈពេលដែលនាងស្ថិតនៅហុងកុង ក្នុងពេលកំពុងស្វែងរកឱកាសថ្មីនៅទីនោះ។ នាងត្រូវគេនិយាយថា មានការលំបាកជាច្រើន ដែលត្រូវអ្នកគ្រប់គ្រងផ្ទាល់ខ្លួន ដល់ថ្នាក់ស្រែកដាក់នៅតាមផ្លូវ។

យោងតាមសារព័ត៌មានកម្សាន្ត Sohu តារាសម្តែងវ័យ៣៦ឆ្នាំ បានបង្ហាញខ្លួនជាញឹកញាប់នៅក្នុងទីក្រុងហុងកុងនាពេលថ្មីៗនេះ។ Paparazzi បានដើរតាមនាង ហើយបានរកឃើញថា តារាស្រីរូបនេះកំពុងជួលរយៈពេលវែងនៅសណ្ឋាគារលំដាប់ផ្កាយ៥មួយកន្លែង ហើយកំពុងស្វែងរកឱកាសដើម្បីត្រលប់មកវិញ តាមរយៈការសម្ភាសន៍ជាមួយក្រុមហ៊ុនភាពយន្តជាច្រើន ដោយសង្ឃឹមថា នឹងរក្សាភាពល្បីល្បាញរបស់នាង។ ទោះជាយ៉ាងណាក៏ដោយ ដំណើរការមួយនេះមិនរលូនទេ ហើយអ្នកគ្រប់គ្រងក៏បង្ហាញសកម្មភាពព្រងើយកណ្តើយដែរ។

ទំព័រមុខនៃកាសែតហុងកុងជាច្រើនបានចុះផ្សាយព័ត៌មានលេចធ្លោអំពី អ្នកម្ដាយកូនមួយរូបនេះដោយអះអាងថា តារាស្រីវ័យ ៣៦ ឆ្នាំ មិនត្រឹមតែបាត់បង់សម្រស់ប៉ុណ្ណោះទេ ថែមទាំងមានការប្រែប្រួលរូបរាង ហើយជារឿយៗញ៉ាំអាហារនៅតាមតូបតាមដងផ្លូវ។ អ្នកគ្រប់គ្រងនាងទៀតសោតក៏មិនពេញចិត្តទាំងរូបរាង និងស្ថានភាពបច្ចុប្បន្នរបស់នាង ដោយបានស្តីបន្ទោសនាងកណ្តាលផ្លូវតែម្ដង។

រូបថតដែលថតបានពេលតួឯកស្រីក្នុងរឿង «Love 020» ត្រូវបានអ្នកគ្រប់គ្រងស្តីបន្ទោសខ្លាំងៗនៅកណ្តាលផ្លូវ ក៏ត្រូវបានគេផ្សព្វផ្សាយយ៉ាងព្រោងព្រាតដែរ។ ស្ត្រីដែលគេជឿថាជាអ្នកគ្រប់គ្រងបានបង្ហាញការមិនពេញចិត្ត ខណៈ Angelababy មិនបានតវ៉ាទេ គ្រាន់តែឈរស្តាប់ប៉ុណ្ណោះ។

បច្ចុប្បន្ន AngelaBaby ត្រឡប់មករកការងារដែលធ្លាប់ធ្វើពីមុនវិញ ដោយថតពាណិជ្ជកម្មឲ្យម៉ាកយីហោសម្លៀកបំពាក់ តូចតាចប៉ុណ្ណោះ។ ជាងនេះទៀត មនុស្សជាច្រើនគិតថាអាជីពរបស់នាងធ្លាក់ចុះដោយសារតែរឿងអាស្រូវទាក់ទងនឹងការទៅទស្សនា Lisa សមាជិកក្រុម BlackPink សម្តែងនៅក្លឹបអាក្រាតកាយ Crazy Horse Paris ពីមុនមក។

ទោះជាយ៉ាងណាក៏ដោយ Sohu បាននិយាយថា នាងត្រូវបានបង្វែរបន្តិចម្តងៗដោយអ្នកវិនិយោគធំៗ។ នោះជាភស្តុតាងជាក់ស្តែងនៅក្នុងកម្មវិធី Keep Running ដែលនាងធ្លាប់ជាមុខមាត់ដ៏ល្បីដែលគេធ្លាប់ស្គាល់។ នៅក្នុងរដូវកាលចុងក្រោយរបស់នាងបែរជាត្រូវគេជំនួសតួនាទីនោះទៅវិញ។ នៅក្នុងរូបថតជាក្រុម ទីតាំងកណ្តាលតែងតែត្រូវបានបម្រុងទុកសម្រាប់នាង ក៏លែងមានទៀត។

លើសពីនេះទៀត ទស្សនិកជនសង្កេតឃើញថា ក្នុងឆ្នាំ ២០២៤ ក្នុងឱកាសខួបកំណើតរបស់អ្នកចាត់ការ Angelababy បានបង្ហោះសារអបអរសាទរ ប៉ុន្តែមិនទទួលបានការឆ្លើយតបណាមួយឡើយ។ នៅក្នុងរូបថតជាក្រុមបន្ទាប់មក ទីតាំងកណ្តាលក៏មិនសម្រាប់នាងដែរ៕