ព័ត៌មានជាតិ

សម្ដេចធិបតី៖ យើងមិនអន់ទេ! យើងអាចកសាងអង្គរបានសំខាន់គឺមានឱកាស

បានផុស

១៣ វិនាទី មុន

នៅ

ថ្ងៃសៅរ៍ ៣១ ឧសភា ២០២៥

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានបង្ហាញពីមោទនភាពដែលកម្ពុជាបានប្រែក្លាយពីប្រទេសដែលគ្មានអ្វីសោះរហូតខ្ពស់មុខមាត់ដូចសព្វថ្ងៃ ដោយថាទាំងនេះគឺបានដោយសារធនធានមនុស្សរបស់កម្ពុជានិងឱកាសដែលកូនខ្មែរទទួលបានក្រោយបញ្ចប់សង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងពីទីក្រុងតូក្យូប្រទេសជប៉ុនក្នុងពេលជួបជាមួយពលរដ្ឋខ្មែរនៅទីនោះព្រឹកថ្ងៃទី៣១ ខែឧសភា ឆ្នាំ២០២៥ សម្ដេចនាយករដ្ឋមន្ត្រីបានលើកឡើងពីភាពខ្លាំងរបស់កូនខ្មែរដែលអាចប្រើប្រាស់បច្ចេកវិទ្យា សរសេរកូដ និងចេញទៅប្រកួតនៅបរទេសឈ្នះជាបន្តបន្ទាប់ដែលធ្វើឱ្យកេរ្តិ៍ឈ្មោះកម្ពុជាកាន់តែល្បី។ សម្ដេចថាទោះបីជាពេលនេះកម្ពុជានៅមិនទាន់ល្អឥតខ្ចោះតែរដ្ឋាភិបាលនឹងខិតខំបង្កើនសមត្ថភាពជួយដល់ធនធានមនុស្សក្នុងប្រទេសបន្ថែមទៀតដែរ។

សម្ដេចថា៖ «ខ្មែរយើងអត់អន់ទេ! យើងកសាងអង្គរកសាងអីបានសំខាន់មានឱកាសអ៊ីចឹងហើយពេលដែលយើងចប់សង្គ្រាមយើងខិតខំរៀនសូត្រកូនខ្មែរយើងប្រព័ន្ធអប់រំយើងកាន់តែល្អ។ ទោះបីមិនល្អឥតខ្ចោះតែយើងនឹងខំប្រឹង»។

សម្ដេចធិបតីបន្ថែមថា ជាការពិតទោះបីកម្ពុជានៅមានកម្រិតនៃសមត្ថភាពជាច្រើនក្ដីតែក្នុងនាមជាជាតិខ្មែរត្រូវមានមោទនភាពនូវអ្វីដែលយើងសម្រេចបានរហូតមកដល់ពេលនេះ។

កម្ពុជាទទួលបានសន្ដិភាពពេញលេញនៅថ្ងៃទី២៩ ខែធ្នូ ឆ្នាំ១៩៩៨ ដែលបានបង្រួបបង្រួមជាតិខ្មែរឱ្យទៅជាជាតិតែមួយមានរដ្ឋាភិបាលតែមួយឡើងវិញ តាមនយោបាយឈ្នះឈ្នះរបស់សម្ដេចតេជោ ហ៊ុន សែន ដែលជាឱកាសបើកផ្លូវឱ្យកម្ពុជារីកចម្រើន ប្រជាជនមានស្ថានភាពប្រសើរ មានឱកាសរៀនសូត្រ ពង្រឹងនូវធនធានមនុស្សរបស់ជាតិជួយដល់ជាតិមានការអភិវឌ្ឍន៍។ បច្ចុប្បន្នយុវជនកម្ពុជាជាច្រើនមានឱកាសបង្ហាញសមត្ថភាពលើឆាកអន្តរជាតិ និងបានទទួលនូវលទ្ធផលជាទីមោទនដល់ជាតិជាបន្តបន្ទាប់ផងដែរ៕