ស្តូបអនុស្សាវរីយ៍ នយោបាយ ឈ្នះ-ឈ្នះ នៅ​ខេត្ត​ប៉ៃលិន គឺយកគំរូប្លង់​ស្ថាបត្យកម្ម និង​រចនាបថ​តាម​វិមានឈ្នះឈ្នះ

ប៉ៃលិន ៖ ស្ថិតនៅភូមិទឹកថ្លា សង្កាត់ប៉ៃលិន ក្រុងប៉ៃលិន ខេត្តប៉ៃលិន តាមបណ្តោយផ្លូវវាងក្រុង ចម្ងាយប្រហែល ៣គីឡូម៉ែត្រ ពីទីរួមខេត្តប៉ៃលិន គឺជាស្តូបអនុស្សាវរីយ៍ នយោបាយ ឈ្នះ-ឈ្នះ នៅខេត្តប៉ៃលិន ដែលសាងសងឡើង ដើម្បីរំលឹកគុណ ដល់ការបញ្ចប់សង្គ្រាមស៊ីវិលទាំងស្រុង នៅកម្ពុជា តាមរយៈនយោបាយឈ្នះ-ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា គឺយក​គំរូ​ប្លង់​ស្ថាបត្យកម្ម និង​រចនាបថ​ទៅតាម​វិមានឈ្នះឈ្នះនៅឯរាជធានីភ្នំពេញ។

លោក ថន បូរិទ្ធ វិស្វករកសាងវិមានឈ្នះឈ្នះ ខេត្តប៉ៃលិន បានឱ្យ​ដឹង​ថា វិមានឈ្នះឈ្នះ ខេត្តប៉ៃលិន គឺ​ជា​ស្នាដៃ​ស្ថាបត្យកម្ម​សម័យ​ទំនើប មាន​បញ្ជាក់​នូវអត្ថន័យដ៏មានសារសំខាន់ចំនួនបីរួមមាន៖ទី១- កំពូលវិមាន ដែលមានជ្រុងបីតំណាងឱ្យនយោបាយគន្លឹះសំខាន់ៗចំនួន៣ ដែលនាំឱ្យនយោបាយ ឈ្នះ-ឈ្នះ ទទួលបានជោគជ័យ គឺ១. ការធានារូបកាយ និងអាយុជីវិត, ២. ធានាអាជីព និងមុខរបរ ៣. ការធានាកម្មសិទ្ធិ និងទ្រព្យសម្បត្តិ ទាំងចលនទ្រព្យ និងអចលនទ្រព្យ។

ទី២. តួវិមាន ដែលមានជ្រុង៥ តំណាងឱ្យយុទ្ធសាស្ដ្រ DIFID គឺៈ បំបែក ធ្វើឱ្យឯកោ បញ្ចប់ ធ្វើសមាហរណកម្ម និង អភិវឌ្ឍ) ដែលជាយុទ្ធសាស្ដ្ររំលាយអង្គការចាត់ តាំងនយោបាយ និងយោធាខ្មែរក្រហម ។ ទី៣. តួវិមាន មានជ្រុងប្រាំពីរ តំណាងកត្តានាំឱ្យនយោបាយឈ្នះ-ឈ្នះ ទទួលបានជោគជ័យ។លោក ក៏បានបញ្ជាក់ដែរថា រហូតមកដល់ថ្ងៃទី០២ ខែមិថុនា ឆ្នាំ២០២៥ ស្តូបអនុស្សាវរីយ៍ នយោបាយ ឈ្នះ ឈ្នះ ខេត្តប៉ៃលិន សម្រេចបានការកសាងប្រមាណ ៧០% មកហើយ ។

បើ​យោងតាមប្រសាសន៍របស់លោកស្រី បាន ស្រីមុំ អភិបាល នៃគណៈអភិបាលខេត្តប៉ៃលិន បានលើកឡើងនាពេលកន្លងទៅ បានឱ្យ​ដឹង​ថា ក្រោមការដឹកនាំ ដ៏ឈ្លាសវៃ ប្រកប ដោយគតិបណ្ឌិត និងនយោបាយ ឈ្នះ ឈ្នះ របស់សម្តេចតេជោហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា បានធ្វើ​ឱ្យ​ប្រទេសជាតិទាំងមូល ទទួលបានសន្តិភាព និងស្ថេរភាពនៅ ទូទាំងប្រទេស ធ្វើឱ្យប្រជាពលរដ្ឋ ទាំងអស់ មានសេចក្តី ត្រេកអរ ទទួលបានសេចក្តីសុខសប្បាយ និងមានឱកាសអភិវឌ្ឍន៍លើគ្រប់វិស័យ ជាក់ស្តែង ក្រោមម្លប់សន្តិភាពនេះ បានធ្វើឱ្យខេត្តប៉ៃលិន មានឱកាសអភិវឌ្ឍ ទាំងហេដ្ឋារចនាសម្ព័ន្ធរូបវ័ន្ត អរូបវ័ន្ត និងការវិនិយោគគួរឱ្យកត់សម្គាល់។

ប្រសាសន៍របស់លោកស្រី បានបញ្ជាក់ថា ស្តូបអនុស្សាវរីយ៍នយោបាយ ឈ្នះ-ឈ្នះ ខេត្តប៉ៃលិន កសាងឡើងដើម្បីរំលឹក ដឹងគុណ ដល់ថ្នាក់ដឹកនាំ យុទ្ធជន យុទ្ធនារី ប្រជាជនកម្ពុជាគ្រប់រូប ដែលបានលះបង់ សាច់ស្រស់ ឈាមស្រស់ បញ្ញា ស្មារតី និងកម្លាំងកាយចិត្ត ដើម្បីបុព្វហេតុជាតិ មាតុភូមិកម្ពុជា ស្វែងរកនូវសុខ សន្តិភាព និងការអភិវឌ្ឍជូនជាតិ មាតុភូមិកម្ពុជា។ ដំណើរការ នៃការអនុវត្តនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃកម្ពុជា ដែលបញ្ចប់សង្គ្រាមស៊ីវិលទាំងស្រុងនៅ កម្ពុជា នាថ្ងៃទី១៩ ខែធ្នូ ឆ្នាំ១៩៩៨ នៅក្នុងខេត្តប៉ៃលិន ដែលមាន លោកទេសរដ្ឋមន្ត្រី អ៊ី ឈាន ដ៏សំខាន់ម្នាក់ផងដែរ។

ចំណែកការសាងសង់ស្តូបនេះ ប្រើប្រាស់ថវិកា ចូលរួមពីគ្រប់មជ្ឈដ្ឋាន ទាំងធនធាន ថវិកា គំនិត ប្រាជ្ញា របស់ថ្នាក់​ដឹកនាំ មន្ត្រីរាជការ កងកម្លាំងប្រដាប់អាវុធ សប្បុរសជន ព្រះសង្ឃ ប្រជាជន និងនិស្សិត ដោយមិនគិតពី​និន្នាការ​នយោបាយអ្វីឡើយ ហើយស្តូបអនុស្សាវរីយ៍ នយោបាយ ឈ្នះ-ឈ្នះ នៅខេត្តប៉ៃលិន គឺជានិមិត្តរូបដ៏សំខាន់នៃសន្តិភាព ការបង្រួបបង្រួមជាតិ និងការអភិវឌ្ឍន៍សម្រាប់ខេត្តប៉ៃលិន ក៏ដូចជាប្រទេសកម្ពុជាទាំងមូលផងដែរ។

គួរ​រំលឹក​ដែរ​ថា ស្តូបអនុស្សាវរីយ៍ នយោបាយ ឈ្នះ-ឈ្នះ នៅខេត្តប៉ៃលិន មានទំហំបាតក្រោម ៥៩ម៉ែត្រ គុណនឹង ៥៩ម៉ែត្រ និងមានកំពស់ ៥០.៩ម៉ែត្រ សាងសង់លើផ្ទៃដីទំហ៊ំ ២៦,០០០ម៉ែត្រការ៉េ ដែលជាអំណោយផ្ទាល់ របស់ស្រីទេសរដ្ឋមន្ត្រី អ៊ី ឈាន ប្រធាន​អនុគណៈកម្មាសាងសង់ស្តូបអនុស្សាវរីយ៍ នយោបាយ ឈ្នះ ឈ្នះ ខេត្តប៉ៃលិន និងលោកស្រី បាន ស្រីមុំ អភិបាល នៃគណៈអភិបាលខេត្តប៉ៃលិន៕

អត្ថបទ ៖ សេង សុវណ្ណារិទ្ធ