ក្នុងអាណត្តិនេះឬអាណត្តិក្រោយ មណ្ឌលសុខភាពនៅទូទាំងប្រទេសអាចព្យាបាល២៤ម៉ោង

ដើម្បីសង្គ្រោះអាយុជីវិតប្រជាពលរដ្ឋ ជាពិសេសនៅតំបន់ដាច់ស្រយាល រាជរដ្ឋាភិបាលបានត្រៀមផែនការពង្រឹងមណ្ឌលសុខភាព និងពេទ្យបង្អែកស្រុក តាមរយៈការពង្រឹងសមត្ថភាពបុគ្គលិកពេទ្យ និងបំពាក់បរិក្ខា ដែលអាចផ្តល់សេវាព្យាបាលអ្នកជំងឺ ២៤ម៉ោង នៅទូទាំងប្រទេស។

ឆ្លើយបំភ្លឺចំពោះមតិយោបល់ទៅកាន់សមាជិកព្រឹទ្ធសភា រដ្ឋសភា ពាក់ព័ន្ធនឹងគោលនយោបាយ ប្រព័ន្ធគាំពារសង្គម របស់រាជរដ្ឋាភិបាល ក្នុងអង្គប្រជុំសមាជ រដ្ឋសភា និងព្រឹទ្ធសភា សម្តេចធិបតី ហ៊ុន ម៉ាណែត មានប្រសាសន៍ថា កន្លងមករដ្ឋបានដាក់គោលដៅក្នុងការគ្រប់ដណ្តប់ផ្នែកសុខភាពជាសាកលរួចមកហើយ ដើម្បីលើកកម្ពស់សុខភាពសាធារណៈ។

សម្តេចបន្ថែមថា នៅគោលដៅបន្ទាប់ គឺការពង្រឹងអភិបាលកិច្ចនៃសេវា នៅតាមមណ្ឌលសុខភាព និងពេទ្យបង្អែកស្រុក គឺធ្វើយ៉ាងដើម្បីឈានទៅដល់ការព្យាបាល ២៤ម៉ោង ទូទាំងប្រទេស នៅគ្រប់មណ្ឌលសុខភាព ពេទ្យបង្អែកស្រុក ក្នុងមួយអាណត្តិនេះ ឬរហូតដល់អាណត្តិក្រោយ។ សម្តេចបញ្ជាក់ថា៖ «មកដល់ម៉ោងនេះ យើងបានត្រៀមមួយចំនួនរួចទៅហើយ យើងត្រូវការបំពេញបុគ្គលិកពេទ្យ ដែលជាអាទិភាព ដើម្បីបំពេញនៅតាមមូលដ្ឋាន និងពេទ្យបង្អែកស្រុក»។

«ហេតុអ្វីបានជាយើងយកមូលដ្ឋានមណ្ឌលសុខភាពពេទ្យបង្អែកស្រុក ពិតណាស់ពេទ្យថ្នាក់ជាតិយើងធ្វើ សម្រាប់ជំនាញសំខាន់ៗ ដូចជាការព្យាបាលបេះដូង មហារីក បន្ទាប់មកពេទ្យតំបន់ ប៉ុន្តែថ្នាក់មូលដ្ឋាននេះសំខាន់ណាស់ ប្រជាជននៅខេត្តដាច់ស្រយាលអត់មានទេ»។ នៅទីប្រជុំជនអាចមានគ្លីនីកឯកជនច្រើន ប្រជាពលរដ្ឋអាចព្យាបាលច្រើន ប៉ុន្តែនៅតាមខេត្តដាច់ស្រយាលគឺត្រូវពង្រឹងពេទ្យបង្អែកស្រុក និងមណ្ឌលសុខភាព»។

សម្តចធិបតី បញ្ជាក់ទៀតថា៖«ហេតុនេះហើយបានជារាជរដ្ឋាភិបាលដាក់ចេញគោលនយោបាយ ហើយនៅក្នុងការពង្រឹងអភិបាលកិច្ចនេះ យើងគ្រោងចំណាយ ១២លានដុល្លារក្នុងមួយឆ្នាំបន្ថែមទៅលើថវិកា ដែលបានវិភាជន៍ទៅឱ្យវិស័យសុខាភិបាល តាំងពីឆ្នាំ ២០២៤ទៅ ២០២៧  ៤ឆ្នាំ​នេះ សរុប ៤៨ លានដុល្លារ ដែលគ្រោងដាក់ដើម្បីពង្រឹងសមត្ថភាពពេទ្យ មណ្ឌលសុខភាពអាចព្យាបាល ២៤ម៉ោង។ នេះមិនមែនគ្រាន់តែជាគោលនយោបាយទេ តែយើងបានវិភាជន៍ថវិកាជាក់ស្តែង»។

បើតាមសម្តេចធិបតី ហ៊ុន ម៉ាណែត ការពង្រឹងសម្ភារ សមត្ថភាព និងហេដ្ឋារចនាសម្ព័ន្ធ រដ្ឋបានចំណាយ ៦០ពាន់លានរៀលសម្រាប់ឆ្នាំនេះបន្ថែម ដើម្បីកសាង និងធ្វើឱ្យប្រសើរឡើងនូវមណ្ឌលសុខភាព និងពេទ្យបង្អែក ក្នុងនោះមាន ២៦គម្រោង និង ១៤ រាជធានី-ខេត្ត ដើម្បីបង្កើនសមត្ថភាព។

សម្តេចធិបតី ឱ្យដឹងទៀតថា៖«ខ្ញុំបានសម្រេចបង្កើន ១៨ លានដុល្លារ ផ្តល់ឱ្យសម្រាប់ឆ្នាំ ២០២៥នេះ ដើម្បីបង្កើនសមត្ថភាពពេទ្យបង្អែកស្រុក សម្រាប់ធ្វើទំនើបកម្ម និងបំពាក់សម្ភារ កន្លែងវះកាត់នេះគឺជាកិច្ចការសំខាន់សម្រាប់ជួយប្រជាពលរដ្ឋ។ បើកន្លែងវះកាត់នៅពេទ្យបង្អែកស្រុក អត់គ្រប់គ្រាន់ទេ ពលរដ្ឋអាចស្លាប់»។ សម្តេចសង្កត់ធ្ងន់ថា ដើម្បីអាយុជីវិតប្រជាជន រាជរដ្ឋាភិបាលឆ្នាំនេះ សុខចិត្ត កាត់បន្ថយគម្រោងថវិកាមួយចំនួនពីការជួសជុលផ្លូវ និងគម្រោងមិនចាំបាច់ យកមកបង្វែរមកពង្រឹងនៅតាមមន្ទីរពេទ្យ៕