ព័ត៌មានអន្ដរជាតិ

WHO ៖ តាំងពីផ្ទុះសង្គ្រាម អាមេរិកនិងអ៊ីស្រាអែលវាយប្រហារចំមណ្ឌលសុខភាពអ៊ីរ៉ង់ជាង២០លើក

បានផុស

៤ ខែ មុន

នៅ

ថ្ងៃសៅរ៍ ៤ មេសា ២០២៦

ដោយ

អង្គការសុខភាពពិភពលោក (WHO) បានព្រមានប្រឆាំងនឹងការវាយប្រហាររបស់សហរដ្ឋអាមេរិក-អ៊ីស្រាអែលលើមណ្ឌលសុខភាពអ៊ីរ៉ង់ ខណៈសង្គ្រាមកំពុងបន្តយ៉ាងសាហាវ បន្ទាប់ពីមានការវាយប្រហារទៅលើមណ្ឌលស្រាវជ្រាវនិងសុខភាពចំណាស់ជាងគេបំផុតមួយនៅទីក្រុងតេហេរ៉ង់ គឺវិទ្យាស្ថានប៉ាស្ទ័រ(Pasteur)។

ក្នុងការបង្ហោះសារមួយលើបណ្តាញសង្គម X ប្រធានអង្គការសុខភាពពិភពលោក លោក Tedros Adhanom Ghebreyesus និយាយថា៖ « ការវាយប្រហារជាច្រើនទៅលើមណ្ឌលសុខភាពអ៊ីរ៉ង់ក្នុងទីក្រុងតេហេរ៉ង់ រងការខូចខាតយ៉ាងធ្ងន់ធ្ងរ និងមិនអាចបន្តផ្តល់សេវាសុខភាពបានទេ ជាពិសេសដោយវិទ្យាស្ថានប៉ាស្ទ័រ»។

ប្រធានអង្គការសុខភាពពិភពលោក លោក Tedros Adhanom Ghebreyesus. រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកអ្នកនាំពាក្យក្រសួងសុខាភិបាលអ៊ីរ៉ង់ លោក Hossein Kermanpour បានបង្ហោះរូបភាពនៅលើបណ្តាញសង្គម X កាលពីថ្ងៃព្រហស្បតិ៍ ដោយបង្ហាញពីអគារដែលរងការខូចខាតយ៉ាងធ្ងន់ធ្ងរ ដោយផ្នែកខ្លះនៃអគារត្រូវបានបំផ្លាញទៅជាគំនរបាក់បែក។

ក្នុងរយៈពេលប៉ុន្មានថ្ងៃថ្មីៗនេះ ការវាយប្រហាររវាងសហរដ្ឋអាមេរិក និងអ៊ីស្រាអែល បានកំណត់គោលដៅលើហេដ្ឋារចនាសម្ព័ន្ធសុខភាព វិស័យអប់រំ និងការដឹកជញ្ជូនរបស់អ៊ីរ៉ង់ ហាក់ដូចការពង្រីកគោលដៅរបស់ពួកគេលើសពីទីតាំងយោធា សន្តិសុខ និងនយោបាយដែលបានវាយប្រហារនៅក្នុងសប្តាហ៍ដំបូងនៃសង្គ្រាម។

ប្រធានអង្គការសុខភាពពិភពលោក បន្ថែមថា៖ « មន្ទីរពេទ្យវិកលចរិក Delaram Sina និងរោងចក្រឱសថ Tofigh Daru ត្រូវបានខូចខាតដោយសារតែការវាយប្រហារ ប៉ុន្តែមិនមានរបាយការណ៍ពីអ្នកស្លាប់និងរបួសនោះទេ»។

ចាប់តាំងពីថ្ងៃទី០១ ខែមីនាមក អង្គការសុខភាពពិភពលោក (WHO) បានផ្ទៀងផ្ទាត់លើការវាយប្រហារជាង ២០លើកលើមន្ទីរថែទាំសុខភាពក្នុងប្រទេសអ៊ីរ៉ង់ បណ្តាលឱ្យមានមនុស្សស្លាប់យ៉ាងហោចណាស់៩នាក់ រួមទាំងបុគ្គលិកសុខាភិបាលផងដែរ៕

ប្រែសម្រួល៖ ណឺ មិនា