ក្រសួងកិច្ចការនារី និងស្ថានទូតឥណ្ឌាប្រចាំកម្ពុជាប្រារព្ធទិវាយូហ្គាអន្តរជាតិ ដើម្បីរម្លឹកពីការហាត់យូហ្គាបែបបុរាណ

នៅថ្ងៃទី១១ ខែមិថុនា ឆ្នាំ២០២៥ ក្រសួងកិច្ចការនារី និងស្ថានទូតឥណ្ឌាប្រចាំកម្ពុជា បានសហការរៀបចំខួបលើកទី១០ នៃទិវាយូហ្គាអន្តរជាតិឆ្នាំ២០២៥ ប្រធានបទ «ផែនដីតែមួយ និងសុខភាពតែមួយ» ក្រោមការចូលរួមពីរដ្ឋមន្ត្រីក្រសួងកិច្ចការនារី លោកស្រី អុឹង កន្ថាផាវី និងលោក Vanlalvawna Bawitlung ឯកអគ្គរដ្ឋទូតឥណ្ឌាប្រចាំនៅកម្ពុជា។

កម្មវិធីនេះ ធ្វើឡើងក្នុងគោលបំណងរម្លឹកដល់ប្រពៃណីនៃការហាត់យូហ្គាបែបបុរាណ ដែលជាទស្សនៈ និងការអនុវត្តលំហាត់ប្រាណដើម្បីសុខភាពរាងកាយ និងផ្លូវចិត្ត។

លោកស្រី អ៉ឹង កន្ថាផាវី មានប្រសាសន៍ក្នុងឱកាសនោះថា៖ “ការហាត់យូហ្គាជាប្រចាំគឺពិតជាផ្តល់អត្ថប្រយោជន៍ជាច្រើនសម្រាប់សុខភាពផ្លូវចិត្ត សុខភាពផ្លូវកាយ និងប្រាជ្ញាស្មារតី ប្រកបដោយភាពធន់ទៅនឹងអាកាសធាតុ និងបរិយាកាសនៃជីវិតប្រចាំថ្ងៃ”។

ជាមួយគ្នានេះ លោកស្រីក៏បានលើកទឹកចិត្តឱ្យមន្ត្រីរាជការទាំងអស់បន្តហាត់យូហ្គាដោយខ្លួនឯងជាប្រចាំនៅផ្ទះ ដើម្បីកាត់បន្ថយភាពតានតឹងផ្លូវចិត្ត បង្កើនថាមពលសម្រាប់កម្លាំងកាយ និងកម្លាំងចិត្តផងដែរ៕