អូរព្រះជាតំបន់ទេសចរណ៍ធម្មជាតិគួរឱ្យទាក់ទាញ និងមានប្រវត្តិគួរឱ្យចាប់អារម្មណ៍ នៅខេត្តរតនគិរី

អូរព្រះជាតំបន់ទេសចរណ៍កម្សាន្តបែបធម្មជាតិដ៏គួរឱ្យទាក់ទាញ ដែលមានទីតាំងស្ថិតនៅក្នុងឃុំកុកឡាក់ ភូមិរ៉ក ស្រុកវើនសៃ ខេត្តរតនគិរី ជាប់ជាមួយឧទ្យានជាតិវិរៈជ័យ។ តំបន់ទេសចរណ៍នេះ មានទេសភាពដ៏ស្រស់ត្រកាលហ៊ុំព័ទ្ធដោយភ្នំ និងព្រៃក្រាស់ ដោយមានរុក្ខជាតិបៃតងខៀវស្រងាត់រាយប៉ាយទាំងសងខាងអូរ ស្ទឹង និងមានប្រវត្តិគួរឱ្យចាប់​អារម្មណ៍​ពាក់ព័ន្ធជំនឿ សាសនា ប្រពៃណី​ និងការធ្វើជំនួញរបស់ជនជាតិដើមភាគតិច។

ភាពស្រស់ស្អាតនៃតំបន់នេះ ត្រូវបានតុបតែងដោយផ្ទាំងថ្មធំៗ សំឡេងទឹកហូរ ដែលវាក្លាយជាកន្លែងដ៏ល្អសម្រាប់ភ្ញៀវទេសចរដែលស្វែងរកភាពស្ងប់ស្ងាត់ និងសម្រស់ធម្មជាតិ។ ដើម្បីទៅលេងនៅទីនោះ ត្រូវធ្វើដំណើរពីក្រុងបានលុង ទៅដល់ទីរួមស្រុកវើនសៃ ចម្ងាយផ្លូវ ៣៥ គីឡូម៉ែត្រ និងបន្តឡើងជិះសាឡាង ឆ្លងទៅត្រើយម្ខាងទន្លេសេសាន ហើយធ្វើដំណើរ ឆ្ពោះទៅឃុំកុកឡាក់ រួចបន្តដំណើរតាមផ្លូវលំអស់រយៈពេល ២ ទៅ ៣ ម៉ោងទៀត កាត់ផ្លូវលំឡើងចុះចំណោទកាត់ចង្កេះភ្នំ ទើបទៅដល់អូរព្រះ។ នៅតាមផ្លូវធ្វើដំណើរនេះ ត្រូវឆ្លងកាត់ភូមិរបស់ជនជាតិដើមភាគតិច ឡាវ កាវ៉េត ព្រៅ ដែលនៅសងខាងផ្លូវ មានដំណាំរបស់ជនជាតិដើមភាគតិចគួរឱ្យចង់គយគន់។

លោក ភឿម អាញ ជាមេភូមិរ៉ក ជាជនជាតិដើមភាគតិច កាវ៉ែត បានចែករលែកពីប្រវត្តិនៃតំបន់ទេសចរណ៍នេះ និងមូលហេតុដែលដាក់ឈ្មោះ អូរព្រះ។ លោកបានរៀបរាប់ថា៖« កាលពីដើមមក អូរព្រះ ត្រូវបានគេស្គាល់ហៅតៗគ្នាមកតាមបែបភាសាខ្មែរ ចំណែកអ្នកភូមិកាវ៉ែតហៅតាមបែបភាសារបស់ខ្លួនវិញគឺ (ឆួលព្រះ)។ លោកបានឱ្យដឹងថា ពីដើម​ឡើយជនជាតិដើមភាគតិច តែងតែធ្វើជំនួញជួញដូរ ផលិតផលកសិកម្ម មានដូចជា សណ្តែក ល្ង អង្ករ លក់ទៅឱ្យប្រជាជនឡាវ ដែលរស់នៅជិតព្រំដែន ដោយត្រូវធ្វើដំណើរតាមក្បូនបណ្តែតទឹក។

លោកបន្តថា៖« ដោយជឿថាអារក្សអ្នកតា ព្រៃភ្នំមកលេងអំឡុងពេលធ្វើដំណើរតាមក្បូន អ្នកធ្វើដំណើរ តម្រូវឱ្យស្រាតខោអាវអស់ពីខ្លួន ចាប់ពីចំណុចអូរព្រះ មានប្រវែង ៣០០ ម៉ែត្រ ហើយហួសពីចំណុចនេះទើបអាចស្លៀកខោអាវវិញបាន នេះជាតំណម។ ការធ្វើដូចនេះ ក្បូននឹងមិនក្រឡាប់ឡើយ ប៉ុន្តែបើយើងអត់ស្រាតខោអាវទេ ក្បូននឹងក្រឡាប់ ព្រោះអរក្សអ្នកតាមកឆែកលេង»។

បច្ចុប្បន្ន ​តំបន់​ទេសចរណ៍​អូរ​ព្រះ​ បានទាក់ទាញ​យុវជន យុវនារី និង​ភ្ញៀវ​ជាតិ​អន្តរជាតិ ទៅលេងកម្សាន្តច្រើនគួរសម។ ភ្ញៀវទេសចរអាចឈរនៅលើភ្នំដើម្បីគយគន់ទេសភាពនៃដងអូរ ដែលមានខ្យល់បក់នៅជើងភ្នំ រួមជាមួយនឹងជួរភ្នំជុំវិញ មានផ្ទះប្រពៃណី និងចម្ការរបស់ជនជាតិដើមភាគតិច។

នៅឯជើងភ្នំវិញ ភ្ញៀវទេសចរអាចរីករាយជាមួយខ្យល់អាកាសបរិសុទ្ធ ងូតទឹក និងអាចផ្តឹតយករូបភាព នៅព្រៃឧទ្យានជាតិវីរៈជ័យផងដែរ។ ជាទូទៅកន្លែងកម្សាន្តធម្មជាតិដែលមានប្រវត្តិដ៏គួរឱ្យចាប់អារម្មណ៍នេះ មានភ្ញៀវទៅលេងច្រើនចាប់ពីខែ មករា រហូតដល់ខែមិថុនា ពីព្រោះនៅអំឡុងពេលនោះ ផ្លូវស្រួលធ្វើដំណើរ ទឹកអូរស្រក ដោយពុំមានការបង់ប្រាក់ឡើយ។

ពេលទឹកស្រក យើងអាចឃើញថ្មដាធំៗ ងាយស្រួលងូតទឹកលេង និងបង្ហាញពីព្រៃឈើបៃតង ដែលនៅសងខាងដ៏ស្រស់ស្អាត គួបផ្សំទីវាលនៅចន្លោះភ្នំបង្កើតបានទស្សនីយភាពដ៏អស្ចារ្យផង និងជាទីកន្លែងពាណិជ្ជកម្ម ពីអតីតកាល របស់ជនជាតិដើមភាគតិច ដែលបានឆ្លងកាត់ដើម្បីដោះដូរទំនិញតាមព្រំដែនកម្ពុជា-ឡាវ។

ចំណែកនៅក្នុងរដូវកាលខែវស្សាវិញ ភ្ញៀវទេសចរក៏អាចទៅលេងកម្សាន្តទស្សនាផ្ទាំងថ្មធំៗ ព្រៃបៃតង អាចហែលទឹកលេងកម្សាន្ត ប៉ុន្តែឧបសគ្គដែលនឹងជួបនោះគឺការធ្វើដំណើរតាមផ្លូវមានភាពលំបាកបន្តិច៕