រដ្ឋបាលឃុំជ្រោយបន្ទាយ សម្រេចសមិទ្ធផល​ធំ​ ៣ ឆ្លើយតប​តម្រូវការ​ប្រជាពលរដ្ឋ

ឃុំជ្រោយបន្ទាយ គឺជាឃុំមួយក្នុងចំណោមឃុំទាំង ៨ ក្នុងស្រុកព្រែកប្រសព្វ នៃខេត្តក្រចេះ ដែលមាន ៧ភូមិ។
ពាក់ព័ន្ធការ​អភិវឌ្ឍ​ឃុំឆ្នាំ២០២៥ លោក ប៉ិច ងន់ស្រ៊ឺ មេឃុំជ្រោយបន្ទាយ បានឲ្យដឹងថា តាម​រយៈ​ការ​ប្រើប្រាស់​មូលនិធិអភិវឌ្ឍឃុំ រដ្ឋបាលឃុំជ្រោយបន្ទាយ បានបែងចែកកញ្ចប់ថវិកា ដែលរាជរដ្ឋាភិបាល ទម្លាក់មកជា ៣ ចំណែក៖ ទី១ ជួសជុលផ្លូវគ្រួសធម្មជាតិ, ទី២ ស្ដារអាងទឹកធម្មជាតិ និងទី៣ ធ្វើផ្លូវបេតុង។

ថវិកាដែលរាជរដ្ឋាភិបាលទម្លាក់មកដើម្បីអភិវឌ្ឍន៍ឃុំ គឺឃុំបានធ្វើការផ្សព្វផ្សាយទៅដល់តាមមូលដ្ឋានភូមិ ហើយរដ្ឋបាលឃុំ ក៏មានប្រជុំអនុម័តនៅក្នុងគណ:កម្មាការឃុំ ធ្វើម៉េចបែងចែកឲ្យចំគោលដៅគម្រោងណាដែលជាអាទិភាព និងប្រជាពលរដ្ឋអាស្រ័យផលច្រើនជាងគេ។

លោក បន្តថា គម្រោងមូលនិធិឃុំមិនអាចធ្វើផ្លូវណាមួយធ្វើដដែលៗនោះទេ ពោលគឺរដ្ឋបាលឃុំបានបែងចែកថវិកាជា ៣ កញ្ចប់ បើសិនជាឃុំយកកញ្ចប់ថវិការឃុំ ទៅធ្វើផ្លូវបេតុងទាំងអស់ មិនងាយបានតភ្ជាប់ពីភូមិមួយទៅភូមិមួយទេ។ ដូច្នេះ ឃុំត្រូវបែងចែកដកយកថវិកាមួយចំណែកធ្វើផ្លូវគ្រួសក្រហម ដែលកំពុងអនុវត្តន៍ ដើម្បីងាយស្រួលតភ្ជាប់ ពីភូមិមួយទៅភូមិមួយ ងាយស្រួលឲ្យប្រជាពលរដ្ឋមកទទួលសេវានៅរដ្ឋបាលឃុំ។

ដោយឡែក មួយកញ្ចប់ទៀតគឺឃុំបានយកទៅស្ដារអាងទឹកធម្មជាតិ ៥០ ភាគរយ ប៉ុន្តែកន្លងមកអាងទឹកធម្មជាតិក្នុង​ឃុំមានស្រាប់ហើយ ប៉ុន្តែនារដូវប្រាំងគឺខ្វះខាតទឹកសម្រាប់ប្រើប្រាស់​សម្រាប់​ស្រែប្រាំង ដូច្នេះហើយទើបគណៈកម្មាការឃុំសម្រេចយកថវិកា ១ កញ្ចប់ទៅស្ដារអាងទឹកធម្មជាតិ ដើម្បីឲ្យប្រជាពលរដ្ឋប្រើប្រាស់នៅពេលរដូវប្រាំង។

តាមរយៈសមិទ្ធផលទាំងនេះ ធ្វើឲ្យប្រជាពលរដ្ឋមានការពេញចិត្តសប្បាយរីករាយ និងចូលរួមយ៉ាងសកម្មតាមដានទាំងអស់គ្នា ដើម្បីភាពរសហគមន៍ក្នុងមូលដ្ឋាន៕

អត្ថបទ៖ ប្រុញ វិធិន