យីហោ​ភេសជ្ជៈ​ខ្មែរ​ជាច្រើន​ម៉ាក​កំពុង​ផលិត​លក់​​ពេញ​ផ្ទៃ​ប្រទេស ប្រជែង​ភេសជ្ជៈនាំ​ចូល​ពីបរទេស

យីហោ​ភេសជ្ជៈ​ក្នុង​ស្រុក​កំពុង​ត្រូវ​បាន​ផលិត និង​ចែកចាយ​នៅ​លើ​ទីផ្សារ​ប្រជែង​ភេសជ្ជៈ​នាំ​ចូល​ពី​បរទេស​ ដើម្បី​ស្រូប​ទាញ​ចំណែក​ទីផ្សារ​អតិថិជន។

ក្រុមហ៊ុន​វឌ្ឍនៈ ប៊្រូវើរី

ក្រុមហ៊ុន វឌ្ឍនៈ ប៊្រូវើរី គឺជាក្រុមហ៊ុនបុត្រសម្ព័ន្ធរបស់ វឌ្ឍនៈ គ្រុប ដែល​​វិនិយោគ​លើ​វិស័យ​ជាច្រើន​ក្នុង​ប្រទេស​កម្ពុជា​ ដែលមាន​លើ​វិស័យ​ធនាគារ អចលនទ្រព្យ បដិសណ្ឋារកិច្ច វិស័យ​ម្ហូប​អាហារ ទំនិញ និង​សេវាកម្ម​ព្រម​ទាំង​វិស័យ​សំខាន់ៗ​ជា​ច្រើន​ទៀត។

លើវិស័យ​ឧស្សាហកម្ម​ចំណីអាហារក្រៅពី​ស្រាបៀរ ក្រុមហ៊ុន វឌ្ឍនៈ ប្រ៊ូវើរី ក៏​បាន​ផលិត​ភេសជ្ជៈគ្មាន​ជាតិ​ស្រវឹង​ជាច្រើន​មុខ​ផ្គត់ផ្គង់ទីផ្សារ​ក្នុង​ស្រុក​ក្នុង​នោះ​មាន​ដូចជា ភេសជ្ជៈ​ប៉ូវកម្លាំង គ្រុឌ, ភេសជ្ជៈ​ប៉ូវកម្លាំង គ្រុឌអាយស៍, ភេសជ្ជៈ​កីឡា វី-អាកទីវ, ភេសជ្ជៈ វី-អាកទីវ ក្រហម, និងភេសជ្ជៈ វី-អាកទីវ បៃតង។

ក្រុមហ៊ុន ខ្មែរ ប៊ែវើរីជីស

ក្រុមហ៊ុន​ខ្មែរ ប៊ែវើរីជីស ជា​ក្រុមហ៊ុន​ដែលវិនិយោគដោយសហគ្រិនខ្មែរ ១០០%។ ស្ថិតនៅក្រោម​បុត្រសម្ព័ន្ធ​របស់​ក្រុមហ៊ុនជីប ម៉ុង គ្រុប ក្រុមហ៊ុនមាន​ផលិតភេសជ្ជៈ​ទាំង​មានជាតិ​ស្រវឹង​និង​គ្មាន​ជាតិ​ស្រវឹង។ ខ្មែរ ប៊ែវើរីជីស ត្រូវ​បានគេ​ស្គាល់​តាមរយៈ​​រោងចក្រ​ផលិត​ស្រាបៀរ​កម្ពុជា។ ក្រៅពីនេះ​ក្រុមហ៊ុនមាន​ផលិតភេសជ្ជៈ​ប៉ូវកម្លាំង​ជាច្រើនប្រភេទ​​មាន​ដូចជា​ ភេសជ្ជៈ​ប៉ូវ​កម្លាំង​វើក WURKZ, ទឹកក្រូច​អាយស៍ IZE, ភេសជ្ជៈ EXPREZ, ភេសជ្ជៈ ICY COOL, ភេសជ្ជៈ​ប៉ូវ​កម្លាំង KIZZ រួម​ទាំង​ទឹក​ពិសារ​បរិសុទ្ធ​កម្ពុជា។

ក្រុមហ៊ុន​ឆេមពាន​

​ឆេមពានជាក្រុមហ៊ុនវិនិយោគ​ដោយសហគ្រិន​ខ្មែរតាំងពី​ឆ្នាំ២០១៧ ជាមួយ​ការ​ផលិត​ភេសជ្ជ:ប៉ូវ​កម្លាំង​ឆេមពាន​អាយ៍ រសជាតិ​ម៉ុងតុល​មុន​ដំបូងគេ។ នៅឆ្នាំ២០២៤ ក្រុមហ៊ុនបានបង្កើតឆេមពានហ្រ្គីន ដើម្បី​ឲ្យ​អតិជនមានជម្រើសរសជាតិកាន់តែច្រើន និង​នៅដើមឆ្នាំ២០២៥ ក្រុមហ៊ុនបាន​​បង្កើត​នូវ​សមិទ្ធិផល​ថ្មី ស្រាបៀរ​ហ្រ្គីតថ្មី រួមទាំង​ភេសជ្ជ:​ប៉ូវកម្លាំង​ហ្រ្គីត​ដែល​មាន​វីតាមីន​ជំនួយ​ដល់​ភ្នែក​។

មកដល់ពេលនេះ ឆេមពានគ្រុបមានផលិតផលជាច្រើនដូចជា ឆេមពានអាយ៍ ឆេមពានហ្រ្គីន, ថប់អាប់, ស្រាប្រៀរហ្រ្គីត Premium lager, ភេសជ្ជ:ប៉ូវកម្លាំងហ្រ្គីត និង Greet Premium black។

ក្រៅពី​ក្រុមហ៊ុនក្នុង​ស្រុកដែលកំពុង​ផលិតភេសជ្ជៈ​ប្រកួតប្រជែងលើទីផ្សារ បច្ចុប្បន្ន​ក៏​មានយីហោ​​ភេសជ្ជៈបរទេស​មួយ​ចំនួន​ បាន​ទទូលអាជ្ញាបណ្ណផលិតនៅ​​ក្នុង​ប្រទេស​កម្ពុជា​ដើម្បី​​លក់ចែកចាយ​ដល់​អតិថិជន។.

ក្រុមហ៊ុន Cambodia Beverage Company Limited (កូកា-កូឡា)

ក្រុមហ៊ុនភេសជ្ជៈកម្ពុជា (កូកា-កូឡា) ជាក្រុមហ៊ុន​ភេសជ្ជៈគ្មានជាតិស្រវឹង​ដ៏ល្បី​ឈានមុខ​គេរបស់​ពិភពលោក។

ក្រុមហ៊ុន​បាន​ប្រតិបត្ដិការរោងចក្រ​នៅក្នុងប្រទេសកម្ពុជា អស់រយៈពេលជាងពីរទសវត្សរ៍តាំងពី​ឆ្នាំ ១៩៩៣ ពីរោងចក្រខ្នាតតូច រហូតដល់បង្កើតរោងចក្រផលិតខ្នាតធំ​នៅ​​​ឆ្នាំ២០១៦ ក្នុង​តំបន់​សេដ្ឋកិច្ច​ពិសេស​ភ្នំពេញ ដើម្បីឆ្លើយតប​នឹង​កំណើន​តម្រូវការ​ទីផ្សារក្នុងស្រុក។

​សាងសង់​នៅលើ​ផ្ទៃដី​ទំហំ ១២,៥ ហិកតា ជាមួយ​ទុន​វិនិយោគ​ប្រមាណ ១០០​ លាន​ដុល្លារ តាមរយៈ​ការបំពាក់​បច្ចេកវិទ្យា និងទំហំផលិតកម្មប្រសើរជាងមុន រោងចក្រថ្មី​របស់​ក្រុមហ៊ុន​អាចផលិតភេសជ្ជៈកូកាកូឡា និង​ភេសជ្ជៈផ្សេងទៀតបានរហូតដល់ទៅ ៥៤ ពាន់ដបប្លាស្ទិច និង ៦០​ពាន់​កំប៉ុង ក្នុង​មួយ​ម៉ោង ដែល​ទំហំ​ផលិតកម្ម​​នេះ​ធំ​ជាងមុន​ចំនួនដប់ដង។

បច្ចុប្បន្ន​ក្រុមហ៊ុនបានបង្កើនការ​ផលិត​ភេសជ្ជៈរសជាតិ​ថ្មីៗ​ទាំង​មានជាតិស្ករតិច និងមិនមានជាតិស្ករ​មាន​ដូចជា៖ Coca-Cola, Coca-Cola Zero, Sprite, Fanta, Schweppes Fuzetea Dasani, Samurai និង Aquarius។

ក្រុមហ៊ុន ខេមប្រ៊ូវ

ភេសជ្ជៈប៉ិបស៊ី​របស់អាមេរិក​​ ក៏មាន​រោងចក្រ​ផលិត​នៅក្នុងប្រទេស​កម្ពុជា​​​ ដែល​មានមូលដ្ឋាន​ផលិត​កម្ម​នៅ​ក្នុង​ខេត្ត​ព្រះសីហនុ​។ រោងចក្រនេះ​ក៏​​ត្រូវ​បាន​គេ​ស្គាល់​តាម​រយៈការ​ផលិត​​ស្រាបៀរ​អង្គរ ជា​យីហោ​ស្រាបៀរ​ដ៏ល្បី​ល្បាញ​​ផលិត​ក្នុង​ស្រុក​តាំង​ពី​ឆ្នាំ១៩៩២។

ចាប់​ពីឆ្នាំ ១៩៩២ ក្រុមហ៊ុនខេមប្រ៊ូវ បានសហការជាមួយក្រុមហ៊ុនប៉ិបស៊ីកូ ក្នុងការវេចខ្ចប់និង​ចែកចាយ​ភេសជ្ជៈនៅក្នុង​ប្រទេស​កម្ពុជា រួមមាន ទឹកក្រូច​ប៉ិបស៊ី មីរីនដា 7-UP និង​ស្ទីង។

ក្នុងនាមជាបុត្រសម្ព័ន្ធរបស់ក្រុមហ៊ុនកាស៊្បែរគ្រុប ក្រុមហ៊ុនក៏បានផលិតនិងចែកចាយម៉ាកសញ្ញាស្រាបៀរអន្តរជាតិនានា រួមមានស្រាបៀរដ៏ល្បីរបស់ប្រទេសដាណឺម៉ាក គឺស្រាបៀរកាស៊្បែរ ស្រាផ្លៃឈើដ៏ល្បីរបស់អឺរ៉ុបគឺ Somersby ស្រាបៀរ​លំដាប់ថ្នាក់លេខ១ របស់ជប៉ុនគឺ ស្រាបៀរអាសាហ៊ី និងស្រាបៀរស្តោតរបស់ប្រទេសអៀកឡង់ គឺស្រាបៀរ Guinness​។ ក្រុមហ៊ុនក៏ផលិតស្រាបៀរ​ម៉ាកសញ្ញាក្នុងស្រុក រួមមានស្រាបៀរខ្លាំង និង​ប៊្លែកផេនធ័រ​ផង​ដែរ៕