ព័ត៌មានជាតិ

ជាថ្ងៃសោកសៅបំផុត ត្រឹម ២៤ម៉ោង ជនរួមជាតិយើង ៣ នាក់ បានស្លាប់ដោយសារកូវីដ១៩

បានផុស

៤ years មុន

នៅ

ថ្ងៃព្រហស្បតិ៍ ១ មេសា ២០២១

ដោយ

Dy Bunnara

ប្រទេសកម្ពុជាបានជួបថ្ងៃដ៏សោកសង្រេងបំផុត ដែលកាលពីម្សិលមិញមានអ្នកស្លាប់ដល់ទៅ ០៣ នាក់ដោយសារកូវីដ ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីទីមួយគឺទៅលើស្រ្តីជនជាតិខ្មែរអាយុ ៥៦ ឆ្នាំ រស់នៅសង្កាត់វាលវង់ ខណ្ឌ ០៧ មករា។ ជនរងគ្រោះបានស្លាប់នៅថ្ងៃ ៣១ មីនា ២០២១ វេលាម៉ោង ១០ ៣១ នាទីព្រឹកនៅមន្ទីរពេទ្យមិត្តភាពខ្មែរសូវៀត។

ស្រ្តីរងគ្រោះបានតេស្តមានវិជ្ជមានកូវីដ ១៩ នៅថ្ងៃ ២៦ មីនា និងត្រូវបានបញ្ជូនមកសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។ បើតាមការបញ្ជាក់របស់គ្រូពេទ្យ ជនរងគ្រោះមានវិបត្តិផ្លូវដង្ហើមធ្ងន់ធ្ងរ និងរលាកសួតទាំងសងខាងដោយសារកូវីដ១៩។

ករណីទី ២ គឺស្រ្តីវ័យក្មេងបំផុតអាយុទើប ២៨ ឆ្នាំ ក៏បានស្លាប់ដោយសារកូវីដ ១៩ កាលពីម្សិលមិញ។ ជនរងគ្រោះមានលំនៅនៅសង្កាត់បឹងសាឡាង ខណ្ឌទួលគោក។ ជនរងគ្រោះបានទទួលមរណភាពនៅថ្ងៃ ៣១ មីនា វេលាម៉ោង ១៤ ៤០ នាទីរសៀល។

បើតាមការបញ្ជាក់ពីគ្រូពេទ្យ អ្នកជំងឺមានស្ថានភាពធ្ងន់ធ្ងរតាំងពីថ្ងៃចូលសម្រាកដំបូង ដោយសារជនរងគ្រោះមានជំងឺប្រចាំកាយដូចជា ទឹកនោមផ្អែមប្រភេទ១ ជំងឺខ្សោយតម្រង់នោមដំណាក់កាលចុងក្រោយ។

អ្នកជំងឺបានតេស្តឃើញមេរោគកូវីដនៅថ្ងៃ ៣០ មីនា និងចូលសម្រាកពេទ្យបានតែមួយថ្ងៃប៉ុណ្ណោះក៏ទទួលមរណភាព។

ករណីទី ៣ គឺស្រ្តីអាយុ ៥៦ ឆ្នាំម្នាក់ទៀត ក៏បានស្លាប់ក្នុងថ្ងៃតែមួយដោយសារកូវីដ ១៩។ ជនរងគ្រោះមានទីលំនៅនៅសង្កាត់បឹងព្រលិត ខណ្ឌ ០៧ មករា។

ជនរងគ្រោះបានតេស្តឃើញកូវីដ ១៩ នៅថ្ងៃ ២៧ មីនា ២០២១។ ស្ថានភាពជនរងគ្រោះមានសភាពធ្ងន់ធ្ងរ ដែលត្រូវក្រុមគ្រូពេទ្យប្រើប្រាស់ម៉ាស៊ីនជំនួយដកដង្ហើម ដើម្បីជួយសង្គ្រោះ ប៉ុន្តែដោយសារជនរងគ្រោះមានវិបត្តិផ្លូវដង្ហើមធ្ងន់ធ្ងរ និងរលាកសួតទាំងសងខាងដោយសារកូវីដ១៩ ក៏បានទទួលមរណភាពនៅថ្ងៃ ៣១ មីនា ឆ្នាំ ២០២១ នៅវេលាម៉ោង ១៦ ៥០ នាទីល្ងាច៕