ផ្លាស់ប្ដូរឯកអគ្គរាជទូតកម្ពុជានៅអេហ្ស៊ីប ដោយលោក សោម វិសាល ជំនួសលោក អ៊ុក សារុន

លោក សោម វិសាល ត្រូវបានតែងតាំងជាឯកអគ្គរាជទូតកម្ពុជាប្រចាំនៅប្រទេសអេហ្ស៊ីប និងប្រចាំប្រទេសចំនួន៥ផ្សេងទៀត រួមទាំងនៅសហភាពអាហ្វ្រិក ជំនួសលោក អ៊ុក សារុន ដែលត្រូវចប់អាណត្តិបេសកកម្ម។

យោងព្រះរាជក្រឹត្យរបស់ព្រះករុណាព្រះមហាក្សត្រកម្ពុជា មាត្រា១ បានត្រាស់បង្គាប់បញ្ចប់មុខតំណែងលោក អ៊ុក សារុន ពីឯកអគ្គរាជទូតកម្ពុជា ប្រចាំប្រទេសអេហ្ស៊ីប អារ៉ាប៊ីសាអូឌីត ម៉ារ៉ុក អាល់ហ្សេរី អេត្យូពី សហភាពអាហ្វ្រិក និងប្រទេសអូម៉ង់ ដែលមាននិវេសនដ្ឋាននៅទីក្រុងគែរ ប្រទេសអេហ្ស៊ីប ដោយត្រូវចប់អាណត្តិបេសកកម្ម។

មាត្រា២ ត្រាស់បង្គាប់តែងតាំងមុខតំណែងលោក សោម វិសាល បច្ចុប្បន្នអនុរដ្ឋលេខាធិការក្រសួងការបរទេស ជាឯកអគ្គរាជទូតកម្ពុជាថ្មីប្រចាំប្រទេសខាងលើនេះ។

លោក សោម វិសាល បានបញ្ចប់ការសិក្សាកម្រិតបរិញ្ញាបត្រជាន់ខ្ពស់ច្បាប់អន្តរជាតិ ពីសាកលវិទ្យាយជាតិនៃទំនាក់ទំនងអន្តរជាតិ ប្រទេសរុស្ស៊ី៕