នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រាប់កងទ័ពកុំខ្លាចនឹងបាញ់ប្រហារតប បើសត្រូវឈ្លានពានមុន

សម្ដេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥  ប្រាប់ទៅកាន់កងទ័ពកម្ពុជាកុំឱ្យខ្លាចនឹងបាញ់ប្រហារតបទៅវិញ ប្រសិនបើកងទ័ពរបស់សត្រូវឈ្លានពានមកលើកម្ពុជាមុន ប៉ុន្តែដាច់ខាតកងទ័ពកម្ពុជា មិនត្រូវទៅឈ្លានពានទឹកដីគេមុនឡើយ។ សម្ដេចតេជោ នាយឧត្ដមសេនីយ៍ផុតលេខផ្កាយមាស៥ ប្រាប់កងទ័ពដូច្នេះ ក្នុងពេលជួបប្រជុំជាមួយ មេបញ្ជាការអង្គភាពចំណុះទិសទី២ និងទិសទី៣ នៅទីបញ្ជាការស្រាលទិសទី៣ ក្រុងសំរោង ខេត្តឧត្តរមានជ័យ នាព្រឹកថ្ងៃទី២៦ ខែមិថុនា ឆ្នាំ២០២៥ ។

សេចក្ដីប្រកាសព័ត៌មាននៅលើទំព័រហ្វេសប៊ុកសម្ដេចតេជោ ស្រង់សម្ដីលោក ជា ធីរិទ្ធ អ្នកនាំពាក្យសម្ដេចតេជោ ផ្សព្វផ្សាយដូច្នេះ៖« សម្ដេចតេជោ នាយឧត្តមសេនីយ៍ផុតលេខផ្កាយមាសប្រាំ ហ៊ុន សែន បានបញ្ជាក់យ៉ាងច្បាស់ថា សូមកងទ័ពទាំងឡាយកុំខ្លាច នៅក្នុងការវាយប្រហារជាមួយសត្រូវដែលឈ្លានពានយើង។»

បើតាមលោក ជា ធីរិទ្ធ អ្នកនាំពាក្យសម្ដេចតេជោ ហ៊ុន សែន ប្រធានព្រឹទ្ធសភា បានប្រាប់អ្នកយកព័ត៌មានឱ្យដឹងថា នៅក្នុងកិច្ចប្រជុំនេះ សម្ដេចតេជោ ហ៊ុន សែន ក៏បានប្រកាសទទួលយកតាមសំណើរបស់មេបញ្ជាការទាំងឡាយ នូវភារកិច្ចជាអគ្គភុស្ដភាជាន់ខ្ពស់ សម្រាប់កងកម្លាំងប្រដាប់អាវុធរបស់កម្ពុជា ដែលជាការបញ្ជាក់យ៉ាងច្បាស់ពីសម្ដេចនៅក្នុងការជួយដល់កងទ័ព ជាពិសេស គឺជាការធានានូវការផ្គត់ផ្គង់ដល់កងកម្លាំងប្រដាប់អាវុធ ដែលកំពុងតែប្រឈមមុខជាមួយនឹងសត្រូវ ។

សូមជម្រាបថា សម្តេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រធានព្រឹទ្ធសភាកម្ពុជា បានអញ្ជើញដល់ក្រុមសំរោង ខេត្តឧត្តរមានជ័យនាព្រឹកថ្ងៃទី២៦ ខែមិថុនា ឆ្នាំ២០២៥ ក្នុងគោលបំណងចុះសួរសុខទុក្ខ លើកទឹកចិត្ត និងពិនិត្យស្ថានភាពកងទ័ពកម្ពុជា ដែលកំពុងឈរជើងដ៏អង់អាចក្លាហានបំផុតការពារទឹកដីជាប់ព្រំដែនថៃ។

លោក ជា​ ធីរិទ្ធ អះអាងថា សម្តេចតេជោ ហ៊ុន សែន ជាអគ្គមេបញ្ជាការកំពូល ដែលបានយកចិត្តទុក្ខដាក់ខ្ពស់បំផុតចំពោះយោធា ហើយក៏ជាអគ្គមេបញ្ជាការដែលពោរពេញដោយយុទ្ធសាស្ត្រសង្គ្រាមវាយយកឈ្នះលើសមរភូមិសង្គ្រាម។

ជាការកត់សម្គាល់ កងទ័ព និងសព្វាវុធដ៏ទំនើបៗរបស់កម្ពុជា បានចល័តចេញពីបន្ទាយឆ្ពោះមកកាន់ខេត្តជាប់ព្រំដែនថៃ ទិសខេត្តឧត្តរមានជ័យ និងព្រះវិហារ បន្ទាប់ពីទាហានថៃ លបលួចបាញ់ប្រហារទាហានខ្មែរលើដីខ្មែរ កាលពីថ្ងៃទី២៨ ខែឧសភា ឆ្នាំ២០២៥កន្លងទៅនេះ។ មកដល់ពេលនេះ ទាំងទាហាន និងសព្វាវុធរបស់កម្ពុជាត្រូវបានត្រៀមបម្រុងជាប់ប្រចាំ ដើម្បីការពារទឹកដីក្នុងករណីមានការឈ្លានពានណាមួយពីកងទ័ពថៃ។

ជាមួយគ្នា​ ទន្ទឹមនឹងគោលបំណងដោះស្រាយបញ្ហាព្រំដែនដោយសន្តិវិធិ  សម្ដេចធិបតី នាយឧត្ដមសេនីយ៍ ហ៊ុន ម៉ាណែត កាលពីថ្ងៃទី២៣ ខែមិថុនា  ក៏បានព្រមានទៅថៃទៀតថា កម្ពុជា បានត្រៀមសព្វាវុធរួចរាល់ ដើម្បីបាញ់កម្ទេចរថក្រោះ និងយន្តហោះចម្បាំងថៃ បើកងទ័ពប្រទេសនេះឈ្លានពានកម្ពុជាម្ដងទៀត។ បន្ថែមពីនេះ កម្ពុជា នឹងប្ដឹងទៅកាន់ក្រុមប្រឹក្សាសន្តិសុខនៃអង្គការសហប្រជាជាតិផងដែរ៕