អាជ្ញាធរខេត្តសៀមរាប អំពាវនាវឱ្យរួមគ្នាជាមួយរាជរដ្ឋាភិបាល បន្តលើកកម្ពស់ការអនុវត្តសិទ្ធិកុមារ

លោកស្រី ម៉ននី រង្សី អភិបាលរងខេត្តសៀមរាប បានអំពាវនាវដល់គ្រប់អ្នកពាក់ព័ន្ធ សូមប្ដេជ្ញាចិត្តរួមគ្នាជាមួយរាជរដ្ឋាភិបាល ក្នុងការបន្តលើកកម្ពស់កិច្ចការពារឧត្ដមប្រយោជន៍របស់កុមារដែលជាឆ្អឹងខ្នងនៃសង្គមជាតិ។ ការអំពាវនានេះធ្វើឡើងក្នុងឱកាសប្រារព្ធខួបលើកទី៧៦ ទិវាកុមារអន្តរជាតិ ១មិថុនា និងខួបលើកទី២៤ ទិវាពិភពលោកប្រយុទ្ធប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៥ នៅខេត្តសៀមរាប នាថ្ងៃទី២៧ ខែមិថុនា ឆ្នាំ២០២៥ នេះ។

លោកស្រី ម៉ននី រង្សី មានប្រសាសន៍ថា ដើម្បីការពារសិទ្ធកុមារ រាជរដ្ឋាភិបាលកម្ពុជា បានដាក់ចេញនូវច្បាប់ គោលនយោបាយ និងយន្តការនានា ក្នុងការដោះស្រាយបញ្ហាប្រឈមរបស់កុមារ ជាពិសេសការបង្ការ និងការទប់ស្កាត់ និងឆ្លើយតបចំពោះអំពើហិង្សាគ្រប់ទម្រង់លើកុមារ សុវត្ថិភាពកុមារតាមប្រព័ន្ធអនឡាញ ការជួយគាំទ្រដល់កុមារងាយរងគ្រោះពីការគំរាមកំហែង កេងប្រវ័ញ្ច និងការរំលោភបំពាននានាឱ្យបានទាន់ពេលវេលា និងប្រកបដោយប្រសិទ្ធភាព ដើម្បីឱ្យកុមាររស់នៅ និងអភិវឌ្ឍដោយសុខដុមរមនាក្រោមម្លប់សន្ដិភាព។

លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងសម្បទាខេត្ត បានឱ្យដឹងថា រយៈពេល៦ខែកន្លងមកនេះ ក្រុមការងារបានជួយសង្រ្គោះជនរងគ្រោះករណីអំពើជួញដូរ៣៨នាក់ ក្នុងនោះជនរងគ្រោះទទួលបានការស្ដានីតិសម្បទាតាមរយៈអង្គការដៃគូចំនួន៣០នាក់ និងកុមារដែលរងគ្រោះដោយអំពើហិង្សា និងការរំលោភបំពានផ្សេងៗទទួលបានសេវាគាំទ្រនៅតាមសហគមន៍ចំនួន១៩នាក់ តាមរយៈ មន្ទីរសង្គមកិច្ច មន្ទីរកិច្ចការនារី និងអង្គការដៃគូ។ លើសពីនេះ មណ្ឌលថែទាំជំនួសចំពោះកុមារមានចំនួន ២៩មណ្ឌល សរុប៥៣៧នាក់ ស្រី២៨៥នាក់៕

ដោយ៖ គឿន វេត