បណ្ឌិត យង់ ពៅ សង្ឃឹមថា ដំរីឡាក់គី អាចជួបជុំជាមួយអ្នកថែទាំវិញ តាមរយៈរដ្ឋមន្ត្រីក្រសួងកសិកម្ម

បណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានសរសេរលើបណ្តាញសង្គមហ្វេសប៊ុកថា លោកសង្ឃឹមថា ដំរីឡាក់គី អាចជួបជុំជាមួយលោក ទ្រី ស៊ីថេង ដែលជាអ្នកមើលថែទាំដំរី២៥ឆ្នាំ បន្ទាប់ពីជួបជាមួយលោក ឌិត ទីណា រដ្ឋមន្ត្រីក្រសួងកសិកម្ម នៅថ្ងៃទី៣ ខែកក្កដា ឆ្នាំ២០២៥ ស្អែកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្ឌិត យង់ ពៅ បានសរសេរថា៖ “សង្ឃឹមថា ដំរីឡាក់គី Lucky បានជួបជុំឪពុកកូនគេវិញ តាមរយៈរដ្ឋមន្ត្រីក្រសួងកសិកម្ម…!” ។ ការលើកឡើងរបស់លោកបណ្ឌិត យង់ ពៅ បែបនេះ បន្ទាប់ពីក្រសួងកសិកម្ម រុក្ខាប្រមាញ់ និងនេសាទ បានផុសលើទំព័រហ្វេសប៊ុកក្រសួង នៅព្រឹកថ្ងៃទី២ ខែកក្កដា ឆ្នាំ២០២៥ថា នៅថ្ងៃទី៣ ខែកក្កដា ស្អែកនេះ លោក ឌិត ទីណា រដ្ឋមន្ត្រីក្រសួងកសិកម្មនឹងជួបជាមួយលោក ទ្រី ស៊ីថេង ដែលជាអ្នកមើលថែទាំដំរីឡាក់គី ដើម្បីពិភាក្សា ជួយស្វែងរកដំណោះស្រាយ។

សូមជម្រាបថា កាលពីថ្ងៃទី៣០ ខែមិថុនា ឆ្នាំ២០២៥ លោក ទ្រី ស៊ីថេង ដែលជាអ្នកមើលថែដំរីឡាក់គី នៅសួនសត្វភ្នំតាម៉ៅ តាំងពីឡាក់គីនៅតូចរហូតដល់អាយុ២៥ឆ្នាំ បានលាឈប់ពីសួនសត្វភ្នំតាម៉ៅ ទាំងអាឡោះអាល័យ ក្រោយពីខ្លួនបម្រើការនៅទីនោះអស់រយៈពេល ៣០ឆ្នាំ។ លោកបានផុសវីដេអូដំរីឡាក់គីរត់តាមម៉ូតូ និងហាមមិនឱ្យលោកទៅ ជាមួយសម្រែក និងទឹកមុខដ៏កំសត់របស់ដំរីឡាក់គី ដោយលោកបានសរសេរថា៖ “បើអាចយកទៅជាមួយបាន ខ្ញុំយកទៅហើយ ខ្ញុំពិតជារំជួលចិត្តណាស់”។

យ៉ាងណា បន្ទាប់ពីមហាជនបានឃើញវីដេអូនេះហើយ ពិតជារំជួលចិត្ត និងអាណិតចំពោះដំរីឡាក់គី និងលោក ទ្រី ស៊ីថេង ជាខ្លាំង ដែលមិនអាចនៅជាមួយគ្នាបន្តទៀតបាន។ ជាមួយគ្នានេះ មានពលរដ្ឋជាច្រើន បានស៊ែរ និងខំមិន ឱ្យមានដំណោះស្រាយចំពោះដំរីឡាក់គី និងលោក ស៊ីថេង ដើម្បីឱ្យពួកគេបានជួបជុំគ្នាវិញ។ ចំពោះមូលហេតុដែលនាំឱ្យលោកបានលាឈប់ពីភ្នំតាម៉ៅ គឺលោក ស៊ីថេង មិនបានបញ្ជាក់នោះទេ៕