កម្ពុជាមានជំងឺគ្រុនចាញ់ជាង១០ករណី និងគ្មានអ្នកស្លាប់ ថយចុះជាង៩៤% ក្នុងឆមាសទី១​ឆ្នាំ២០២៥

នៅក្នុងឆមាសទី១ ឆ្នាំ២០២៥នេះ មានករណីជំងឺគ្រុនចាញ់ជាង១០ករណី និងគ្មានអ្នកស្លាប់ ថយចុះ៩៤% បើធៀបទៅនឹងរយៈពេល៦ខែដូចគ្នា ឆ្នាំ២០២៤ ដែលនេះជាសញ្ញាមួយបង្ហាញថា កម្ពុជាកំពុងស្ថិតក្នុងស្ថានភាពឈានទៅសូន្យនាដំណាច់ឆ្នាំ២០២៥នេះ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្របានមានប្រសាសន៍នៅព្រឹកថ្ងៃទី៩កក្តដានេះថា នៅឆមាសទី១ ឆ្នាំ២០២៥ កម្ពុជាមានករណីជំងឺគ្រុនចាញ់ចំនួន១២​ករណី និងគ្មានស្លាប់ គឺថយចុះជាង៩៤% តិចជាងឆ្នាំ២០២៤ ដែលមានរហូតដល់ទៅ២៣៣ករណី ខណៈជំងឺគ្រុនចាញ់គ្មានអ្នកស្លាប់តាំង២០១៨​ ដែលនេះជាសញ្ញាមួយបង្ហាញថា កម្ពុជាកំពុងស្ថិតក្នុងស្ថានភាពឈានទៅសូន្យនាដំណាច់ឆ្នាំនេះ។

លោកវេជ្ជបណ្ឌិត បានបន្តថា «យើងកំពុងស្ថិតលើមាគ៌ារត្រឹមត្រូវសង្ឃឹមថាលុបបំបាត់់បាន។ យើងកំពុងសស្រាក់សស្រាំណាស់ តាមដានស្ថានភាព និងរុករកជំងឺគ្រុនចាញ់»។

លោកវេជ្ជបណ្ឌិត បានបន្តទៀតថា ប្រទេសកម្ពុជាបានបញ្ចប់លែងមានករណីស្លាប់ ដោយសារជំងឺគ្រុនចាញ់តាំងពីឆ្នាំ២០១៨ ហើយយុទ្ធសាស្រ្តជាតិលុបបំបាត់ជំងឺគ្រុនចាញ់ឆ្នាំ ២០១១-២០២៥ ដែលកំពុងប្រតិបត្តិនេះ គឺជាត្រីវិស័យដ៏ត្រឹមត្រូវ ដែលសមស្របតាមយុទ្ធសាស្រ្តតំបន់ និងសកលលោក។ ការយកចិត្តទុកដាក់​ និងគាំទ្រខ្ពស់ពីក្រសួងសុខាភិបាល និងមានកិច្ចសហការពេញលេញពីគ្រប់ដៃគូពាក់ព័ន្ធ ក្រោមការយន្តការសម្របសម្រួលអភិបាលកិច្ចតម្រង់​ទិសបច្ចេកទេសផ្ទាល់ជាប្រចាំរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ គឺជំងឺគ្រុនចាញ់កំពុងឆ្ពោះទៅសូន្យករណីនៃការចម្លងក្នុងតំបន់ និងក៏កំពុងបន្តឈានទៅសូន្យករណីក្នុងគ្រប់ភូមិសាស្រ្តទូទាំងប្រទេសនាដំណាច់ឆ្នាំ២០២៥ ដែលជាគោលដៅចុងក្រោយ។

លោកវេជ្ជបណ្ឌិត បានរំលឹកថា មុនពេលមានយុទ្ធសាស្រ្តជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ករណីជំងឺគ្រុនចាញ់រាយការណ៍មានជិត ២០ម៉ឺនករណី ក្នុងមួយឆ្នាំ (ជាមធ្យមមាន ១៣ ម៉ឺនករណីក្នុងមួយឆ្នាំៗ) និងស្លាប់ ៧០០ – ៨០០ នាក់ក្នុងមួយឆ្នាំ។

លោកវេជ្ជបណ្ឌិត ហ៊ុយ រ៉េកុល ពន្យល់ថា មូលហេតុដែលបណ្តាលឲ្យករណីជំងឺគ្រុនចាញ់មានការចុះ គឺដោយសារការបន្ថែមវិធីសាស្ត្រ និងបង្កើនការផ្សព្វផ្សាយដល់ប្រជាពលរដ្ឋ ដែលរស់នៅក្នុងសំបុកចម្លងជំងឺគ្រុនចាញ់ឱ្យបានយល់ដឹងកាន់តែច្បាស់ពីវិធីការពារជំងឺគ្រុនចាញ់ ផ្តល់ថ្នាំបង្ការការពារដល់ប្រជាពលរដ្ឋរស់នៅតំបន់ប្រឈមខ្ពស់ជាងគេទៅនឹងជំងឺគ្រុនចាញ់ដូចជា នៅស្រុកប្រតិបត្តិសែនមនោរម្យនៅខេត្តមណ្ឌលគីរី និងស្រុកប្រតិបត្តិភ្នំក្រវ៉ាញខេត្តពោធិ៍សាត់ក៏ដូចជាផ្តល់មុងជ្រលក់ថ្នាំដល់ប្រជាពលរដ្ឋមានមុខរបរចូលព្រៃប្រចាំថ្ងៃផងដែរ។

ជាមួយគ្នានេះ ការមានសម្ភារគ្រប់គ្រាន់ដូចជាឧបករណ៍ធ្វើតេស្តរកមេរោគគ្រុនចាញ់ មុងជ្រលក់ថ្នាំការពារជំងឺគ្រុនចាញ់ និងឱសថព្យាបាលជំងឺគ្រុនចាញ់ប្រកបដោយប្រសិទ្ធភាពខ្ពស់ និងដោយសារមានការចូលរួមគាំទ្រពីថ្នាក់ដឹកនាំគ្រប់ជាន់ថ្នាក់ មន្ទីរសុខាភិបាល រាជធានីខេត្ត អាជ្ញាធរមូលដ្ឋានអង្គការដៃគូពិសេសប្រមុខរាជរដ្ឋាភិបាលកម្ពុជា បានដាក់ចេញយុទ្ធសាស្ត្រជាតិលុបបំបាត់ជំងឺគ្រុនចាញ់ ទើបបានធ្វើឲ្យការងារប្រយុទ្ធនឹងជំងឺគ្រុនចាញ់ទទួលបានលទ្ធផលល្អប្រសើរ។ លោកវេជ្ជបណ្ឌិត ហ៊ុយ រ៉េកុល សង្ឃឹមថា កម្ពុជានឹងអាចលុបបំបាត់ជំងឺគ្រុនចាញ់ឲ្យអស់ទាំងស្រុងនៅឆ្នាំ ២០២៥​ដោយសារពីមួយឆ្នាំទៅមួយឆ្នាំបានកាត់បន្ថយករណីជំងឺគ្រុនចាញ់ថយចុះស្ទើរមួយរយភាគរយ និងមិនមានអ្នកស្លាប់ដោយសារជំងឺនេះទេ ប្រសិនបើមិនមានវិបត្តិអ្វីមួយមករារាំងឧបសគ្គនោះ៕

អត្ថបទ៖ សំអឿន