ទឹកជំនន់នៅតិចសាស់៖ មនុស្សស្លាប់កើនដល់១១១នាក់ និង១៧២នាក់កំពុងបាត់ខ្លួន

យោងតាមតួលេខចុងក្រោយគិតត្រឹមព្រឹកថ្ងៃពុធទី៩ខែកក្កដាឆ្នាំ២០២៥ មនុស្សចំនួន១១១នាក់ត្រូវបានបញ្ជាក់ថាស្លាប់ក្នុងគ្រោះទឹកជំនន់ដ៏កាចសាហាវនៅរដ្ឋតិចសាស់ សហរដ្ឋអាមេរិក ខណៈ១៧២នាក់កំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទឹកជំនន់នេះបង្កឡើងដោយភ្លៀងធ្លាក់យ៉ាងគំហុកដែលជាចំហាយព្យុះត្រូពិក Barry ដោយនៅតំបន់ខ្លះ ភ្លៀងធ្លាក់មានកម្រិតពី២៥ទៅ៥០សង់ទីម៉ែត្រឯណោះក្នុងរយៈពេលត្រឹមប៉ុន្មានម៉ោង ដែលបណ្តាលឲ្យទឹកទន្លេ Guadalupe ហក់ឡើងយ៉ាងលឿន ឈានដល់កម្រិតខ្ពស់មិនធ្លាប់មាន។

កន្លែងដែលរងគ្រោះខ្លាំងជាងគេគឺតំបន់ Kerr ដោយបើយោងតាមអភិបាលរដ្ឋតិចសាស់លោក Greg Abbott បានឲ្យដឹងថា គ្រាន់តែនៅទីនោះ មានមនុស្សបាត់ខ្លួនរហូតដល់ទៅ១៦១នាក់។

ក្រុមជួយសង្គ្រោះនិងរុករក កំពុងបន្តប្រតិបត្តិការនៅតាមតំបន់ដែលរងផលប៉ះពាល់ ខណៈក្រុមមន្ត្រីព្រមានថា ចំនួនមនុស្សស្លាប់អាចហក់ឡើងបន្តទៀត ព្រោះនៅមានមនុស្សច្រើននាក់បាត់ខ្លួន។

ក្នុងចំណោមអ្នកស្លាប់ នៅតំបន់ Kerr មានមនុស្សបាត់បង់ជីវិតចំនួន ៨៧នាក់, Kendall ៨នាក់, Travis ៧នាក់, Burnet ៥នាក់, Williamson ៣នាក់ និង Tom Green ១នាក់។

សូមជម្រាបថា នេះ​ជា​ព្រឹត្តិការណ៍​ទឹកជំនន់សម្លាប់មនុស្សច្រើន​បំផុត​នៅរដ្ឋ​តិចសាស់ ក្នុងរយៈពេល​ជាង១០០ឆ្នាំ។ នៅខែកញ្ញាឆ្នាំ ១៩២១ ភ្លៀងធ្លាក់កម្រិត១០០សង់ទីម៉ែត្រ ត្រឹមរយៈពេលប្រហែល៣៦ម៉ោង បានបណ្តាលឲ្យមានមនុស្សស្លាប់ ២១៥នាក់ក្នុងតំបន់ San Antonio៕

អត្ថបទ៖ សុខ សុវណ្ណ

ចុចអាន៖ មនុស្សស្លាប់កើនលើស១០០នាក់ ក្នុងគ្រោះទឹកជំនន់ដ៏សាហាវ នៅរដ្ឋ តិចសាស់