សន្តិសុខសង្គម

ជនសង្ស័យលួចម៉ូតូ ត្រូវម្ចាស់ និងមិត្តភ័ក្ដិ ប្រដេញឃាត់ខ្លួនបាន ១ នាក់ ខណៈបក្ខពួកម្នាក់ទៀតរត់គេចខ្លួន

បានផុស

១ year មុន

នៅ

ថ្ងៃពុធ ៩ កក្កដា ២០២៥

ដោយ

ជនសង្ស័យម្នាក់ ត្រូវបានម្ចាស់ម៉ូតូ និងមិត្តភ័ក្ដិ ជិះប្រដេញឃាត់ខ្លួនបាន បន្ទាប់ពីធ្វើសកម្មភាពលួចម៉ូតូ ១ គ្រឿង ដែលទុកនៅមុខបន្ទប់ជួល ចំណែកជនសង្ស័យម្នាក់ទៀត រត់គេចខ្លួនបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ២ និង ៣៥ នាទីអធ្រាត្រ ឈានចូលថ្ងៃទី ៩ ខែកក្កដា ឆ្នាំ ២០២៥ នៅមុខផ្ទះជួលមួយកន្លែង ស្ថិតក្នុងភូមិចំការឪឡឹក សង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ។

ម្ចាស់ម៉ូតូឈ្មោះ ឈ វ ធ ភេទប្រុស អាយុ ២០ ឆ្នាំ ជាអ្នកដឹកជញ្ជូនអីវ៉ាន់ មានស្រុកកំណើតនៅខេត្តកំពង់ឆ្នាំង និងកំពុងស្នាក់នៅតំបន់កើតហេតុ។ ចំណែកជនសង្ស័យឈ្មោះ រស់ មករា ភេទប្រុស អាយុ ១៨ ឆ្នាំ មុខរបរមិនពិតប្រាកដ មានទីលំនៅនៅភូមិដំណាក់ ខណ្ឌសែនសុខ រាជធានីភ្នំពេញ។

បើតាមម្ចាស់ម៉ូតូបានឲ្យដឹងថា មុនកើតហេតុ គាត់បានជិះម៉ូតូ ម៉ាក Honda Scoopy ពណ៌ខ្មៅ ស្លាកលេខ ភ្នំពេញ 1LE-3859 ត្រឡប់ពីកន្លែងធ្វើការមកដល់ផ្ទះជួល ដោយទុកម៉ូតូខាងមុខបន្ទប់ជួលសិន ហើយចូលក្នុងបន្ទប់ទឹក ប៉ុន្តែមកដល់ពេលក្រោយបានឮសំឡេងអូសម៉ូតូ ក៏សង្ស័យ ចេញមើល ស្រាប់តែបាត់ម៉ូតូ។

ជនរងគ្រោះបន្តថា គាត់បានទាក់ទងមិត្តរួមការងារម្នាក់ឲ្យជួយដេញតាមស្រាប់តែប្រទះឃើញជនសង្ស័យ ២ នាក់ កំពុងជិះម៉ូតូរបស់ខ្លួន នៅជិតផ្លូវ ២០១១ ក្បែរផ្លូវរថភ្លើង។ ពេលនោះ ពួកគាត់បានជិះដេញធាក់ម៉ូតូឲ្យដួល និងឃាត់ជនសង្ស័យបានម្នាក់ ខណៈបក្ខពួកម្នាក់ទៀតរត់គេចខ្លួន។

បច្ចុប្បន្ន សមត្ថកិច្ចកំពុងសួរនាំ និងកសាងសំណុំរឿង ដើម្បីបញ្ជូនបន្តចាត់ការតាមនីតិវិធីច្បាប់។ ចំណែកម៉ូតូរបស់ជនរងគ្រោះ ក៏បានប្រគល់ត្រឡប់ឲ្យម្ចាស់វិញរួចហើយ៕

អត្ថបទ ៖ សំណាង