សាធារណជន និងអ្នកផលិតមាតិកា ផ្ទុះប្រតិកម្មនឹងទំព័រហ្វេសប៊ុកមួយ ដែលប្រឌិតរូបបំភ័ន្តមហាជន ដើម្បីរៃលុយ

សាធារណជន ក៏ដូចជាបុគ្គលល្បីឈ្មោះ ដែលរួមមានទាំង PeyPey Dy ផងនោះ បានបង្ហាញប្រតិកម្មមិនពេញយ៉ាងខ្លាំងនូវទង្វើឆ្លៀតឱកាសរបស់ម្ចាស់ទំព័រហ្វេសប៊ុកឈ្មោះ ខ្មៃរ ខ្មែរ ដែលបានប្រើ Ai បង្កើតរូបភាពទុក្ខសោកម បំភ្លៃការពិតនៃជនរងគ្រោះណាម្នាក់ ដើម្បីជាធ្នាក់ឆក់យកទឹកចិត្តសប្បុរសមហាជន ដើម្បីឱ្យចូលរួមបរិច្ចាគតាមរយៈគណនីធនាគារមួយ ឈ្មោះ “Hong Phea” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនេះ ត្រូវបានបុគ្គលល្បីៗ ពិសេសសាធារណជន បានបញ្ចេញមតិស្នើសុំមន្ត្រីពាក់ព័ន្ធ ជួយពិនិត្យតាមដានវែកមុខជនឆ្លៀតឱកាសរូបនេះ ដើម្បីកុំឱ្យបន្តដើរឆបោកពលរដ្ឋកម្ពុជាទៅថ្ងៃមុខទៀត។ ម៉្យាង ដោយសង្កេតឃើញថា សកម្មភាពដ៏គឃ្លើននេះ ក៏កំពុងសាយភាយពេញបណ្តាញទំនាក់ទំនងសង្គមសព្វថ្ងៃផងដែរ។

ដោយមើលឃើញសកម្មភាពនេះ PeyPey Dy បានចេញមុខបើកបង្ហាញចេតនាអាក្រក់នៃម្ចាស់ផេកខាងលើផងដែរ ដោយណែនាំឱ្យមានការប្រុងប្រយ័ត្ន។ ទន្ទឹមនេះ លោកសង្ឃឹមថា ម្ចាស់ទំព័រហ្វេសប៊ុកដែលបានបង្កើតរូបភាព Ai ដើម្បីបោកប្រាសក្តីអាណិត និងជំនួយពីមហាជន នឹងត្រូវបានចាប់ខ្លួន ដើម្បីកុំឱ្យមានអំពើថោកទាបបែបនេះក្នុងសង្គមបន្តទៀត។

ទន្ទឹមនេះ សាធារណជន ក៏បានបង្ហាញក្តីព្រួយបារម្ភចំពោះអ្នកដែលងាយរងគ្រោះក្នុងការប្រើប្រាស់បច្ចេកវិទ្យាបច្ចុប្បន្ន ខណៈដែលភាគច្រើន មនុស្សចាស់ និងកុមារ ពិបាកក្នុងការបែងចែករវាងរូបពិត និង Ai ។ តួយ៉ាង សូម្បីតែយុវវ័យដែលជាអ្នកស្ទាត់ជំនាញក្នុងការប្រើប្រាស់បច្ចេកវិទ្យាហើយ ក៏នៅតែមានការលំបាកក្នុងការបែងចែកផងដែរ។

ដោយហេតុនេះ អ្នកផលិតមាតិកា ក៏ដូចជាសាធារណជនដែលនិយមប្រើប្រាស់បណ្តាញទំនាក់ទំនងសង្គម បានស្នើតាមរយៈការបញ្ចេញមតិ ទៅកាន់អាជ្ញាធរពាក់ព័ន្ធ ជាពិសេសនាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department ដោយសុំឱ្យជួយតាមដាននិងចាប់ក្រុមជនទាំងនេះ ចាត់ការតាមនិតិវិធីច្បាប់ ចៀសវាងបណ្តែតបណ្តោយឱ្យក្រុមជនប្រភេទនេះ បន្តបោកប្រាស់ដល់ប្រជាជនខ្មែរដែលលោកមិនសូវបានយល់ដឹង។

គួរជម្រាបដែរថា រូបភាពនៃការឆបោកតាមរយៈការកៀរគរសប្បុរសជននេះ គឺមានច្រើនរូបភាព និងហាក់កាន់តែផុសផុលខ្លាំងឡើងផងដែរ ដោយកន្លងមក មានទាំងឆ្លៀតឱកាសដើរតួជាម្ចាស់មូលនិធិ ជួយទ្រទ្រង់បុគ្គលណាម្នាក់ដែលកំពុងមានសេចក្តីទុក្ខពិតប្រាកដ ដោយបន្លំគណនីធនាគាររបស់ជនរងគ្រោះ មកជាគណនីធនាគារផ្ទាល់ខ្លួនទៅវិញ។ ជាក់ស្តែង ដូចករណីកញ្ញា ពេជ្រ ចរណៃ ជាដើម ដែលមានជនឆ្លៀតឱកាស បោកបន្លំកូដ KHQR Scan ៕