ថ្ងៃ៩ខែកក្កដា! ផែនដីវិលលឿន ធ្វើឲ្យថ្ងៃខ្លីបំផុតជាប្រវត្តិសាស្រ្ត

ក្រុមអ្នកវិទ្យាសាស្រ្តរកឃើញថា នៅថ្ងៃពុធទី៩ខែកក្កដាឆ្នាំ២០២៥ ផែនដីវិលលឿនជាងធម្មតា ដែលធ្វើឲ្យថ្ងៃនេះ ក្លាយជាថ្ងៃខ្លីបំផុតមិនធ្លាប់មានសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាធម្មតាផែនដីចំណាយពេល២៤ម៉ោង ឬ ៨៦ ៤០០វិនាទី ដើម្បីបញ្ចប់ការរង្វិលមួយជុំ។ យ៉ាងណា ​នៅថ្ងៃទី៩ខែកក្កដា ផែនដីនឹងរង្វិលលឿនជាងមុន ធ្វើឲ្យថ្ងៃនេះ ខ្លីជាងថ្ងៃធម្មតាប្រមាណ ១.៣០ មិល្លីវិនាទី មិនធ្លាប់មានសោះក្នុងប្រវត្តិសាស្រ្ត។

ទោះបីជាយ៉ាងណាក៏ដោយ អ្នកវិទ្យាសាស្រ្តនៅតែមិនទាន់ដឹងពីមូលហេតុពិតនៅពីក្រោយរឿងនេះ ​ព្រោះវាមានអាថ៌កំបាំងខ្លាំងណាស់ ប៉ុន្តែអ្នកជំនាញបានទាញទ្រឹស្តីមួយចំនួនពាក់ព័ន្ធកត្តារួមចំណែកដូចជា៖ ទីតាំងព្រះច័ន្ទដែលប៉ះពាល់ដល់កម្លាំងទំនាញរបស់ផែនដី បម្រែបម្រួលនៅក្នុងដែនម៉ាញ៉េទិចរបស់ផែនដី ការផ្លាស់ប្តូរម៉ាសរបស់ភពផែនដី (ប្រហែលជាដោយសារការរលាយនៃផ្ទាំងទឹកកកនិងការផ្លាស់ប្តូរចរន្តមហាសមុទ្រ) និងចុងក្រោយគឺចលនាដែលកើតឡើងនៅក្នុងស្នូលផែនដី។

លោក Duncan Agnew អ្នកភូគព្ភវិទូនៅវិទ្យាស្ថានមហាសមុទ្រ Scripps នៃសាកលវិទ្យាល័យកាលីហ្វ័រញ៉ាសាន់ឌីហ្គោ បាននិយាយថា «នេះគឺជាស្ថានភាពដែលមិនធ្លាប់មានពីមុនមកនិងជារឿងដ៏ធំមួយ។ យ៉ាងណា ការផ្លាស់ប្តូរដ៏ធំនៅក្នុងការបង្វិលរបស់ផែនដី នឹងមិននាំទៅរកគ្រោះមហន្តរាយឬអ្វីនោះទេ ប៉ុន្តែវាគឺជារឿងដែលគួរឲ្យកត់សម្គាល់»។

បន្ទាប់ពីថ្ងៃ៩ខែកក្កដា នៅមាន២ថ្ងៃទៀតក្នុងឆ្នាំនេះ ដែលផែនដីនឹងវិលលឿនជាងធម្មតា ធ្វើឲ្យថ្ងៃខ្លី៖

1. ថ្ងៃទី ២២ ខែកក្កដា៖ ថ្ងៃនឹងខ្លីជាងថ្ងៃធម្មតាប្រមាណ ១.៣៨ មិល្លីវិនាទី
2. ថ្ងៃទី ៥ ខែសីហា៖ ថ្ងៃនឹងខ្លីជាងថ្ងៃធម្មតាប្រមាណ ១.៥១ មិល្លីវិនាទី

សូមជម្រាបថា ថ្ងៃដែលខ្លីបំផុតក្នុងកំណត់ត្រាចាស់គឺកាលពីឆ្នាំមុន ពោលគឺនៅថ្ងៃទី៥ខែកក្កដា នៅពេលដែលផែនដីវិលលឿនជាងធម្មតា ១.៦៦មិល្លីវិនាទី៕

អត្ថបទ៖ សុខ សុវណ្ណ

ចុចអាន៖ មក​ដឹង​ពី​មូលហេតុ​ដែល​ផែនដី​កើន​កម្ដៅ​ខ្លាំង​ខុស​ធម្មតា​នៅ​ថ្ងៃ​នេះ