នាយករដ្ឋមន្ត្រី ណែនាំឱ្យបង្កើតគណៈកម្មាធិការជាតិភាសាច្បាប់

ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានណែនាំឱ្យមានការបង្កើត និងរៀបចំឡើងនូវគណៈកម្មាធិការជាតិភាសាច្បាប់ ដើម្បីធ្វើយ៉ាងណាឱ្យមានការឯកភាពគ្នាលើការប្រើប្រាស់ពាក្យបច្ចេកទេសច្បាប់។

ក្នុងពិធីប្រកាសដាក់ឱ្យអនុវត្តក្របខណ្ឌយុទ្ធសាស្ត្រ​នៃ​កម្មវិធី​កែទម្រង់ច្បាប់របស់រាជរដ្ឋាភិបាល នាព្រឹកថ្ងៃទី១០ ខែកក្កដា ឆ្នាំ២០២៥នេះ សម្តេចធិបតី ហ៊ុន ម៉ាណែត បានចង្អុលបង្ហាញដល់គណៈកម្មាធិការដឹកនាំការកទម្រង់ច្បាប់ និងក្រសួងស្ថាប័នពាក់ព័ន្ធទាំងអស់ ត្រូវសហការរៀបចំ និងដាក់ឱ្យដំណើរការគណៈកម្មាធិការជាតិភាសាច្បាប់ ដើម្បីធានាសង្គតិភាព និងឯកភាពនៃការប្រើប្រាស់ពាក្យច្បាប់ និងភាសាច្បាប់ ទាំងសម្រាប់នីតិសាមញ្ញ និងនីតិវិសេស។

បន្ថែមពីគណៈកម្មាធិការជាតិភាសាច្បាប់ សម្តេចធិបតី នាយករដ្ឋមន្ត្រី ក៏បានណែនាំគណៈកម្មាធិការដឹកនាំការកែទម្រង់ច្បាប់ និងក្រសួងស្ថាប័នពាក់ព័ន្ធ ត្រូវសហការរៀបចំ និងដាក់ឱ្យដំណើរការគណៈកម្មាធិការជាតិការពារនីត្យានុកូលភាព ស្របតាមរដ្ឋធម្មនុញ្ញ ដើម្បីដោះស្រាយវិវាទគតិយុត្ត និងធានាសង្គតិភាពនៃការអនុវត្តច្បាប់ សំដៅឆ្លើយតបទៅនឹងតម្រូវ​ការចាំបាច់ជាក់ស្តែងនៃការធានាសន្តិសុខគតិយុត្ត និងឯកសណ្ឋានភាព ឬឯកភាព នៃការអនុវត្តច្បាប់។

សម្តេចធិបតី ហ៊ុន ម៉ាណែត ក៏បានជំរុញគណៈកម្មាធិការដឹកនាំការកែទម្រង់ច្បាប់ ត្រូវដឹកនាំធ្វើឌីជីថលូបនីយកម្មប្រព័ន្ធនៃការតាក់តែង ចងក្រង និងផ្សព្វផ្សាយលិខិតបទដ្ឋានគតិយុត្ត ដោយប្រើប្រាស់បច្ចេកវិទ្យាឌីជីថលផងដែរ៕