សម្ដេចតេជោ ចាត់ទុកសកម្មភាពហ្វឹកហ្វឺនរួមគ្នារវាងកងទ័ពកម្ពុជា-ហ្វីលីពីន ថា បង្ហាញពីទំនាក់ទំនងល្អ

សម្ដេចតេជោ ហ៊ុន សែន ចាត់ទុកសកម្មភាពហ្វឹកហ្វឺនយោធារួមគ្នារវាងកងទ័ពជើងគោកកម្ពុជា និងហ្វីលីពីន ថា បានបង្ហាញអំពីទំនាក់ទំនង និងកិច្ចសហប្រតិបត្តិការល្អនៃកងទ័ពប្រទេសទាំងពីរ ហើយនឹងត្រូវបានពង្រឹងថែមទៀតសម្រាប់វិស័យផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាត់ទុកបែបនេះរបស់សម្ដេចតេជោ បានធ្វើឡើងក្នុងជំនួបជាមួយឧត្តមសេនីយ៍ឯក Roy Mabagos Galido មេបញ្ជាការកងទ័ពជើងគោកហ្វីលីពីន នាព្រឹកថ្ងៃទី១៨ ខែកក្កដា ឆ្នាំ២០២៥ ក្នុងពេលដែលលោកមកបំពេញទស្សនកិច្ចនៅកម្ពុជា ដើម្បីចូលរួមពិធីបិទវគ្គហ្វឹកហ្វឺនរួមគ្នារវាងកងទ័ពកម្ពុជា និងហ្វីលីពីន។ វគ្គហ្វឹកហ្វឺននេះ គឺផ្ដោតលើស្រាវជ្រាវ និងប្រយុទ្ធក្នុងទីក្រុង។

សម្តេចតេជោ ហ៊ុន សែន បានសម្ដែងការសាទរចំពោះការរីកចម្រើនឥតឈប់ឈរនៃទំនាក់ទំនងកងទ័ពប្រទេសទាំងពីរ ហើយចំពោះការរៀបចំឱ្យមានវគ្គហ្វឹកហ្វឺនស្រាវជ្រាវ និងប្រយុទ្ធក្នុងទីក្រុងនាពេលនេះ សម្តេចតេជោ បានវាយតម្លៃខ្ពស់ និងចាត់ទុកថាជាផ្នែកមួយដ៏សំខាន់សម្រាប់កងទ័ពកម្ពុជាក្នុងការពង្រឹងសមត្ថភាព និងបទពិសោធបន្ថែមលើសមត្ថភាពប្រយុទ្ធក្នុងព្រៃដែលមានកន្លងមក។

បើតាមសម្តេចតេជោ តាមរយៈទំនាក់ទំនងល្អរវាងកងទ័ពជើងគោក ដែលជាកងទ័ពស្នូលនៃប្រទេសទាំងពីរ កិច្ចសហប្រតិបត្តិការលើវិស័យផ្សេងៗទៀត ក៏នឹងកាន់តែបង្កើនថែមទៀតផងដែរ។

លោកឧត្តមសេនីយ៍ឯក Roy Mabagos Galido គូសបញ្ជាក់ថា ទស្សនកិច្ចរបស់លោក និងគណៈប្រតិភូកងទ័ពជើងគោកហ្វីលីពីននៅកម្ពុជានាពេលនេះ នឹងបន្តលើកកម្ពស់ទំនាក់ទំនងទ្វេភាគីដែលមានស្រាប់ ជាពិសេសការបន្តចែករំលែកបទពិសោធន៍រវាងកងទ័ពហ្វីលីពីន និងកម្ពុជា តាមរយៈសកម្មភាពហ្វឹកហ្វឺនរួមគ្នានេះ។

សម្តេចតេជោ ក៏បានឆ្លៀតបន្តចែករំលែកពីប្រវត្តិនៃការហ្វឹកហ្វឺន អាជីពកងទ័ព និងការកសាងបង្កើតកងទ័ពរបស់សម្តេច ជាពិសេសចក្ខុវិស័យសម្តេចក្នុងការរក្សាធនធានមនុស្ស ដែលជាមេទ័ពចាស់មានបទពិសោធន៍ ព្រោះមេទ័ព ត្រូវតែរក្សានូវភាពនឹងនរ និងភាពម្ចាស់ការក្នុងការប្រយុទ្ធ៕