ព័ត៌មានជាតិ

សិស្សតាមព្រំដែនកម្ពុជា-ថៃ ស្នើក្រសួងអប់រំពន្យារពេលដំណើរការប្រឡងបាក់ឌុប

បានផុស

១០ ខែ មុន

នៅ

ថ្ងៃអាទិត្យ ២៧ កក្កដា ២០២៥

ដោយ

សិស្សានុសិស្សនៅតាមព្រំដែនដែលជាបេក្ខជនត្រៀមប្រឡងបាក់ឌុបនាពេលខាងមុខនេះបានស្នើសុំទៅ លោកបណ្ឌិតសភាចារ្យ ហង់ជួន ណារ៉ុង ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ឱ្យពន្យារពេលដំណើរការប្រឡងក្រោយពីសាលារៀនជាង៦០០ទីតាំង បានបិទទ្វារជាបណ្ដោះអាសន្នជាបន្តបន្ទាប់ ដោយសារជម្លោះប្រដាប់អាវុធរវាងកម្ពុជា-ថៃដែលបង្កឡើងដោយភាគីថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំទៅកាន់រដ្ឋមន្ត្រីក្រសួងអប់រំនេះបានធ្វើឡើងនៅក្នុងផេកហ្វេប៊ុកផ្លូវការរបស់ក្រសួងអប់រំ យុវជន និងកីឡា។ ប៉ុន្តែបើតាមអ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា ក្រសួងនឹងបន្តតាមដានស្ថានការណ៍ ដោយរក្សាផែនការប្រឡងឱ្យនៅដដែលសិន។

បើតាមគណនីហ្វេសប៊ុកឈ្មោះ Long Tep Aron បានសរសេរថា «ខ្ញុំបាទជាសិស្សនៅតាមបណ្ដាព្រំដែន សូមគោរពជូននូវសារនេះ ដើម្បីស្នើសុំឱ្យក្រសួងអប់រំ យុវជន និងកីឡា សូមពិចារណាពន្យារពេលការប្រឡងបាក់ឌុប ដែលនឹងមាននាពេលខាងមុខនេះ។ សេចក្តីស្នើសុំនេះ បណ្តាលមកពីស្ថានភាពមានភាពតានតឹង និងភាពអសន្តិសុខដែលធ្វើឱ្យសិស្សានុសិស្សតាមបណ្ដាព្រំដែនជម្លោះរវាងប្រទេសកម្ពុជា និងប្រទេសថៃត្រូវបានអាក់ខានក្នុងការសិក្សារៀនសូត្រជាហេតុធ្វើឱ្យពួកគេផ្តោតអារម្មណ៍មិនបានល្អក្នុងការសិក្សាដែលនឹងអាចមានភាពលំបាក ពិសេសសម្រាប់សិស្សសាលាដែលរស់នៅជិតតំបន់ព្រំដែន កំពុងប្រឈមមុខនឹងការពិបាកធ្វើដំណើរទៅប្រឡង និងមានការបារម្ភខ្លាំងអំពីសុវត្ថិភាពផ្ទាល់ខ្លួន»។

Long Tep Aron បានសរសេរទៀតថា «ដោយឡែកពីនេះ ស្ថានភាពខាងលើកំពុងបង្កឲ្យមានការខកខានក្នុងការសិក្សា និងរៀបចំខ្លួនសម្រាប់ប្រឡង ដែលអាចប៉ះពាល់ដល់លទ្ធផលសិក្សារបស់សិស្ស។ ដូច្នេះខ្ញុំបាទជាសិស្សមួយរូបនៅតាមព្រំដែនជម្លោះ សូមស្នើសុំឲ្យក្រសួងអប់រំ យុវជន និងកីឡា ពិចារណាពន្យារពេលប្រឡង ឱ្យសមរម្យដើម្បីឱ្យសិស្សមានឱកាសរៀបចំខ្លួនបានល្អប្រសើរជាងមុន។ សូមថ្លែងអំណរគុណយ៉ាងជ្រាលជ្រៅចំពោះក្រសួង ដែលបានយកចិត្តទុកដាក់ដល់សិស្ស និងអនាគតរបស់ប្រទេសជាតិ។ ប្រសិនបើខ្ញុំបាទមានកំហុសខុសឆ្គង សូមអភ័យទោស និងជួយកែសម្រួលផង»។

ចំណែកទំព័រហ្វេសប៊ុកម្នាក់ទៀតឈ្មោះKhorn Niza ក៏បានសរសេរឱ្យដឹងដែរថា «ក្នុងនាមសិស្សានុសិស្សដែលរស់នៅតាមព្រំដែន ខ្មែរ-សៀម សុំសំណូមពរទៅដល់ថ្នាក់ដឹកនាំ ក្រសួងអប់រំ យុវជន និងកីឡា (MoEYS Cambodia) ឯកឧត្តមបណ្ឌិតសភាចារ្យ ហង់ជួន ណារ៉ុង រដ្ឋមន្ត្រីក្រសួងអប់រំ យុវជន និងកីឡា ស្ដីពីការស្នើសុំពន្យារពេលនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤-២០២៥ ដោយសារមូលហេតុប្រទេសកំពុងជួបនូវបញ្ហាសង្គ្រាមដែលនាំឱ្យសិស្សានុសិស្សមួយចំនួនមានការភ័យខ្លាចការក្នុងការប៉ះពាល់ទៅដល់សុវត្ថិភាព និងប៉ះពាល់ទៅដល់ការប្រឡងផងដែរ។ ដូច្នេះក្នុងនាមសិស្សានុសិស្សដែលជាបេក្ខជនប្រឡងសញ្ញាបត្រមធ្យមសិក្សាទុតិយភូមិ ២០២៤-២០២៥ សុំសំណូមពរទៅដល់ក្រសួងអប់រំ យុវជន និងកីឡា សុំធ្វើការពន្យាពេលនៃការប្រឡង ដែលគ្រោងរៀបចំនៅថ្ងៃទី១៨ ខែសីហា ឆ្នាំ២០២៥ ខាងមុខនេះ»។

រីឯ ទំព័រហ្វេសប៊ុក ឈ្មោះ Kong Manika បានលើកឡើងថា «វាអយុត្តិធម៌ណាស់សម្រាប់អ្នកនៅតាមព្រំដែន បើមិនពន្យារពេលទេ ខ្ញុំចាំមួយជីវិត។ សម្រាប់ខ្ញុំរយៈពេល១២ឆ្នាំវាមានន័យខ្លាំងណាស់ គឺចង់បាននិទ្ទេសមួយក្នុងក្តីស្រមៃ តែបើប្រទេសជាតិបែបនេះគឺវាពិបាកខ្លាំងណាស់ មិនថាការស្នាក់នៅគឺពិបាកបាត់ ហើយចុះទម្រាំការសិក្សាវាមិនដូចពេលដែលប្រទេសសន្តិភាពទេ នេះជាបំណងប្រាថ្នាដ៏ធំក្នុងមួយជីវិតនេះ»។

ចំពោះ ទំព័រហ្វេសប៊ុកឈ្មោះ Ang Bav បានសរសេរថា «ពន្យារពេលក្នុងការប្រឡងសិនទៅ កំពុងជួបចឹងគិតថាមើលចូលឬ? ហើយគិតថាមើលទាន់ឬ? ការភៀសខ្លួនរបស់សិស្សឱ្យគ្នារៀនដោយរបៀបណា»។

ទំព័រហ្វេប៊ុក ឈ្មោះ វង្ស សុវណ្ណវឌ្ឍនា ក៏បានសរសេរបន្ថែមថា «ក្នុងនាមខ្ញុំជាបក្ខជនត្រៀមប្រឡងសញ្ញាបត្រមធ្យមសិក្សាទុតិយភូមិ ខ្ញុំសូមសំណូមពរដល់ក្រសួងអប់រំមេត្តាពិចារណាពន្យារពេលការប្រឡង ព្រោះខ្ញុំផ្ទាល់ និងមិត្តៗ មានស្មារតីមិននឹងនចំពោះស្ថានការណ៍ប្រទេសជាតិដែលកំពុងនិងកើតមាន»។

ចំណែកទំព័រហ្វេសប៊ុកឈ្មោះHormnorin Romneaa ក៏បានលើកឡើងដែរថា «សូមពន្យារពេលទៅលោកអ៊ំ 🙏🏻 សូមមេត្តា ផង ពួកខ្ញុំជាសិស្សានុសិស្សដែលជាជនភៀសខ្លួនបាក់ស្មារតីក្នុងការផ្ចង់អារម្មណ៍ព្រោះឮសំឡេងគ្រាប់ឥតមានឈប់ឈរ នាងខ្ញុំហមនរិន្ទរមនា សំណូមពរឱ្យក្រសួងអប់រំ យុវជន និងកីឡា សូមមេត្តាពន្យារពេលនៃការប្រឡងផងទៅចោះ»។

រីឯ ទំព័រហ្វេសប៊ុក ឈ្មោះ Lynn Lynn បានសរសេរថា «លោកអ៊ំសុំលោកអ៊ំជួយផ្ដល់ជាព័ត៌មានជាក់លាក់ឱ្យបេក្ខជនប្រលងផង លោកអ៊ំណែនាំឱ្យរៀនតាមអនឡាញបានតែអ្នកនៅឆ្ងាយពីព្រំដែនទេ បេក្ខជនខ្លះគ្មានទូរសព្ទគ្មានសេវាគ្មានអ៊ីនធឺណិតគ្មានលុយបញ្ចូលកាតកន្លែងភៀសខ្លួនប្រជុំដោយមនុស្សនិយាយអ៊ូអរគ្នារៀនម៉េចចូលមានហេតុផលពិបាកច្រើនណាស់សូមលោកអ៊ំជ្រាបផងក្មួយសុំ🙏»។

ហ្វេសប៊ុកឈ្មោះ Raa Nuth ក៏បានសរសេរឱ្យដឹងទៀតថា «ប្រទេសជាតិកំពុងជួបការលំបាក ក្នុងនាមជាបេក្ខជនបាក់ឌុប ២០២៥ មួយរូប ស្នើសុំឱ្យក្រសួងលើកថ្ងៃប្រឡងទៅ អាណិតអ្នកជាយដែនដូចពួកខ្ញុំផងមើលមេរៀនមិនចូលទេ»។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឱ្យដឹងថា ក្រសួងបានបង្កើតក្រុមការងារតាមព្រំដែន ដើម្បីធានាសុវត្ថិភាពដល់លោកគ្រូ អ្នកគ្រូ និងសិស្សានុសិស្ស ខណៈដែលការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំ២០២៥ នឹងឈានចូលមកដល់នៅពាក់កណ្តាលខែសីហា ខាងមុខ។

លោកស្រី បានបញ្ជាក់ថា ក្រសួងនឹងបន្តតាមដានស្ថានការណ៍ ដោយរក្សាផែនការប្រឡងឱ្យនៅដដែលសិន ក៏ប៉ុន្តែក្រសួងនឹងមានចំណាត់ការជាក់ស្តែងក្នុងពេលអនាគត ប្រសិនមានការប្រែប្រួលណាមួយកើតឡើង។

ក្នុងរយៈពេល៤ថ្ងៃនេះ គ្រឹះស្ថានសិក្សាក្នុងខេត្តជាប់ព្រំដែនកម្ពុជា-ថៃ ជាង៦០០ទីតាំង ត្រូវបិទទ្វារ, សិស្សានុសិស្សជាង១៥ម៉ឺននាក់ បាត់បង់ការរៀនសូត្រ គ្រូបង្រៀនជាង៦ពាន់នាក់ មិនបានបង្រៀនសិស្សអំឡុងពេលដែលកងទ័ពកម្ពុជា និងថៃ កំពុងមានការប្រយុទ្ធគ្នា។

ក្រៅពីនេះមានពលរដ្ឋខ្មែរស្លូតត្រង់ជិត៨ម៉ឺននាក់ ត្រូវឃ្លាតឆ្ងាយពីផ្ទះដែលធ្លាប់រស់នៅសុខសាន្ត និងមាននិស្សិតខ្មែរ និងពលករខ្មែរប្រមាណជិត៨ម៉ឺននាក់ បានចាកចេញពីប្រទេសថៃវិលត្រលប់មកកម្ពុជាវិញដែរ៕

អត្ថបទ ៖ សំអឿន