ព័ត៌មានជាតិ

ក្រសួងការងារ នាំយកឱកាសការងារជាង ៥ ពាន់កន្លែង ផ្សព្វផ្សាយជូនពលរដ្ឋ និងពលករខ្មែរទើបត្រឡប់មកពីថៃ នៅខេត្តក្រចេះ

បានផុស

១១ ខែ មុន

នៅ

ថ្ងៃសៅរ៍ ៩ សីហា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បាននាំយកឱកាសការងារជាង ៥ ពាន់កន្លែង ផ្សព្វផ្សាយជូនដល់ប្រជាពលរដ្ឋ និងពលករខ្មែរដែលទើបត្រឡប់មកពីប្រទេសថៃ នៅខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្សព្វផ្សាយពីការងារនេះ ក្នុងឱកាស លោក ម៉ន គ្រីយ៉ា រដ្ឋលេខាធិការ និង លោក ម៉ុល វិបុល អនុរដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ ព្រមទាំងមន្ត្រីក្រោមឱវាទក្រសួង និងអាជ្ញាធរពាក់ព័ន្ធ បានអញ្ជើញចូលរួមសំណេះសំណាល និងបើកកម្មវិធី «វេទិកាការងារ» របស់ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ ដែលប្រព្រឹត្តទៅនៅឃុំស្រែចារ និងឃុំឃ្សឹម ស្រុកស្នួល ខេត្តក្រចេះ កាលពីថ្ងៃទី ៨ ខែសីហា ឆ្នាំ ២០២៥ ម្សិលមិញ។

ការបើកវេទិកាការងារនេះ ធ្វើឡើងក្នុងគោលបំណងផ្តល់ឱកាសការងារជូនប្រជាពលរដ្ឋ និងផ្សព្វផ្សាយអំពីអត្ថប្រយោជន៍ នៃរបបសន្តិសុខសង្គមដល់ពួកគាត់ ជាពិសេសពលករខ្មែរដែលទើបត្រឡប់មកពីប្រទេសថៃ។

នាឱកាសនោះ មន្ត្រីរបស់ក្រសួង ក៏បានផ្សព្វផ្សាយអំពីឱកាសការងារ និងការអប់រំបណ្ដុះបណ្ដាលបច្ចេកទេស និងវិជ្ជាជីវៈ ដល់អ្នកចូលរួមចំនួនប្រមាណ ៣៧០ នាក់ ខណៈប្រជាពលរដ្ឋ ជាពិសេសពលករខ្មែរប្រមាណ ៧០ នាក់ ទទួលបានការងារភ្លាមៗ ពីក្រុមហ៊ុនធំៗ ដែលមានតម្រូវការកម្លាំងពលកម្មសរុបប្រមាណជាង ៥ ពាន់កន្លែង៕