ព័ត៌មានជាតិ

៧ ខែ ឆ្នាំ ២០២៥ កម្ពុជាបំបែកកំណត់ត្រា ទទួលបានគម្រោងវិនិយោគច្រើនបំផុតក្នុងពេល ៣០ ឆ្នាំ

បានផុស

១១ ខែ មុន

នៅ

ថ្ងៃសុក្រ ១៥ សីហា ២០២៥

ដោយ

ក្នុងរយៈពេល ៧ ខែឆ្នាំ ២០២៥ កម្ពុជាបានអនុម័តការវិនិយោគច្រើនបំផុតបំបែកកំណត់ត្រាក្នុងរយៈពេលជាង ៣០ ឆ្នាំ។ នេះបើតាមការលើកឡើងរបស់លោក ស៊ុន ចាន់ថុល នៅក្នុងពិធីផ្សព្វផ្សាយនិងបណ្តុះបណ្តាលអំពី នីតិវិធីនៃការចុះបញ្ជីគម្រោងវិនិយោគតាមប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងការប្រើប្រាស់ហត្ថលេខា និងត្រាអេឡិចត្រូនិក (e-Signature & e-Stamp) កាលពីម្សិលមិញនេះ។

លោក ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី ១ ក្រុមប្រឹក្សាអភិវឌ្ឍន៍កម្ពុជាបានថ្លែងថា ក្នុងរយៈពេល ៧ ខែ នៃឆ្នាំ ២០២៥ មានគម្រោងវិនិយោគរហូតដល់ទៅ ៤៤០ គម្រោងត្រូវបានអនុម័ត ក្នុងទំហំទុនវិនិយោគប្រមាណ ៦,៧ ពាន់លានដុល្លារអាម៉េរិក ដែលបង្កើតការងារបានប្រមាណ ៣១២ ពាន់កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអះអាងថា ចំនួនគម្រោងដែលបានអនុម័តក្នុងរយៈពេល ៧ ខែ នៃឆ្នាំ២០២៥ ជាតួលេខដែលច្រើនជាងរយៈពេល ១២ ខែពេញ នៃឆ្នាំ២០២៤ ហើយក៏ជាតួលេខខ្ពស់ជាងគេបំផុតក្នុងកំណត់ត្រាប្រវត្តិការងារជាង ៣០ ឆ្នាំ បន្ទាប់ពីបង្កើត ក្រុមប្រឹក្សាអភិវឌ្ឍន៍កម្ពុជា។

លោកឧបនាយករដ្ឋមន្រ្តីបានលើកឡើងពីការទាក់ទាញការវិនិយោគ និងការសម្រួលពន្លឿននីតិវិធី ដោយការប្រើប្រាស់បច្ចេកវិទ្យាឌីជីថល។ តាមរយៈការប្រើប្រាស់ប្រព័ន្ធ cdcIPM ផ្តល់លទ្ធភាពឱ្យថ្នាក់ដឹកនាំ មន្ត្រីបច្ចេកទេស ក៏ដូចជាវិនិយោគិនអាចបំពេញភារកិច្ច និងដាក់ពាក្យស្នើសុំបានពីគ្រប់ទីកន្លែងនិងគ្រប់ពេលវេលា។

ជាក់ស្តែងផ្ទាល់ លោកឧបនាយករដ្ឋមន្រ្តីបានអនុម័តគម្រោងវិនិយោគពីគ្រប់ទីកន្លែង និងគ្រប់ពេលវេលាដូចជា អំឡុងពេលធ្វើដំណើរតាមរថភ្លើងពីទីក្រុងប៉ារីស មកទីក្រុងឡុងដ៍ក្នុងអំឡុងពេលបំពេញបេសកកម្មទាក់ទាញវិនិយោគនៅតំបន់អ៉ឺរ៉ុប, អំឡុងពេលធ្វើដំណើរតាមយន្តហោះត្រឡប់មកពីបំពេញបេសកកម្មនៅសហរដ្ឋអាម៉េរិកជាដើម។

ក្រុមប្រឹក្សាអភិវឌ្ឍន៍កម្ពុជា បានដាក់ឱ្យប្រើប្រាស់សាកល្បងប្រព័ន្ធ cdcIPM នៅក្នុងខែសីហា ឆ្នាំ២០២៤ និងដាក់ឱ្យប្រើប្រាស់ជាផ្លូវការនៅថ្ងៃទី ២៧ ខែវិច្ឆិកា ឆ្នាំ២០២៤។ ជាមួយគ្នានេះ ក៏ទទួលបានគោលការណ៍ឯកភាពពីប្រមុខរដ្ឋាភិបាលក្នុងការដាក់ឱ្យប្រើប្រាស់ហត្ថលេខាអេឡិចត្រូនិក (e-Signature) និងត្រាអេឡិចត្រូនិក (e-Stamp) លើឯកសារទម្រង់ឌីជីថលចេញពីប្រព័ន្ធ cdcIPM។

បើតាមក្រុមប្រឹក្សាអភិវឌ្ឍន៍កម្ពុជា ក្នុងរយៈពេលជិតមួយឆ្នាំដែលបានដាក់ឱ្យប្រើប្រាស់ប្រព័ន្ធ cdcIPM មានការដាក់ពាក្យស្នើសុំវិនិយោគតាមរយៈប្រព័ន្ធនេះមានចំនួន ៣៨២ គម្រោង ក្នុងនោះបានអនុម័តចំនួន ៣២៨ គម្រោង៕