JBC របស់កម្ពុជាទាមទារឱ្យយោធាថៃបញ្ឈប់ការពង្រាយបន្លាលួស និងរើចេញជាបន្ទាន់

គណៈកម្មការចម្រុះខណ្ឌសីមាព្រំដែនគោកកម្ពុជា (JBC) បានចេញសេចក្ដីថ្លែងការណ៍តវ៉ាប្រឆាំងចំពោះសកម្មភាពរំលោភបំពានរបស់យោធាថៃ ដែលបានពង្រាយលួសបន្លាឈ្លានពានលើដីកម្ពុជា។ សកម្មភាពជាឯកតោភាគីរបស់យោធាថៃនេះ JBC របស់កម្ពុជាទាមទារឱ្យបញ្ឈប់ជាបន្ទាន់ និងរើចេញនូវលួសបន្លា និងកង់ឡានទាំងនោះ។

ការទាមទាររបស់គណៈកម្មការចម្រុះខណ្ឌសីមាព្រំដែនគោកកម្ពុជា (JBC) គឺធ្វើឡើងក្រោយពេលដែលយោធាថៃ បានរាយបន្លាលួស សំណាញ់ រនាំង និងដាក់កង់ឡាននៅតាមកំណាត់ខ្សែព្រំដែនលើដីកម្ពុជា ក្នុងភូមិសាស្ត្រភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី១២ ខែសីហា ឆ្នាំ២០២៥។ ខណៈមកដល់ថ្ងៃទី១៤ ខែសីហា យោធាថៃបានប៉ុនប៉ងធ្វើសកម្មភាពដដែលនេះនៅច្រកទ្វារព្រំដែនបឹងត្រកួន។

តាមរយៈសកម្មភាពខាងលើ គណៈកម្មការ JBC របស់កម្ពុជា ចាត់ទុកជាសកម្មភាពទន្ទ្រានកាន់កាប់យកដី ជាឯកតោភាគីរបស់យោធាថៃ ហើយជាសកម្មភាពដែលរំលោភទៅលើស្មារតីនៃ MOU ឆ្នាំ២០០០ និងច្បាប់អន្តរជាតិ។

JBC របស់កម្ពុជា បន្តថា សកម្មភាពនេះ ក៏រំលោភលើសមត្ថកិច្ចរបស់គណៈកម្មការចម្រុះខណ្ឌសីមាព្រំដែនគោក JBC នៃប្រទេសទាំងពីរផងដែរ រាប់ទាំងការបំផ្លាញដល់លទ្ធផលនៃកិច្ចខិតខំប្រឹងប្រែងនាពេលកន្លងមក និងដំណើរការនៃការចរចារបស់JBC។

ចំពោះមុខសកម្មភាពឈ្លានពានលើដីកម្ពុជាពេលនេះ គណៈកម្មការចម្រុះខណ្ឌសីមាព្រំដែនគោកកម្ពុជា (JBC) បានទាមទារឱ្យយោធាថៃរុះរើជាបន្ទាន់នូវបន្លាលួស សំណាញ់ និងកង់ឡាន ព្រមទាំងចាត់វិធានការទប់ស្កាត់កុំឱ្យមានកើតសកម្មភាពរំលោភបំពានបែបនេះតទៅទៀត នៅតាមបណ្ដោយព្រំដែននៃប្រទេសទាំងពីរ៕

ដោយ៖ ធឿន វ៉ាន់សុង