អ្នកនាំពាក្យ៖ពលរដ្ឋកម្ពុជាវិលពីថៃចូលស្រុកវិញហាក់ថមថយ ដោយក្នុងមួយថ្ងៃចន្លោះពី ២០០ទៅ ៣០០នាក់

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានប្រាប់ឱ្យដឹងថា ពលរដ្ឋកម្ពុជាវិលពីថៃចូលស្រុកវិញហាក់ថមថយប៉ុន្មានថ្ងៃចុងក្រោយនេះ ដោយក្នុងមួយថ្ងៃពលរដ្ឋវិលចូលស្រុកចន្លោះពី២០០ទៅ៣០០នាក់។ គិតត្រឹមថ្ងៃទី ១៤ សីហា ឆ្នាំ ២០២៥ ពលរដ្ឋខ្មែរវិលចូលស្រុកវិញមានជាង ៩១ម៉ឺននាក់ ក្នុងចំណោមពលរដ្ឋ និងពលករដែលរស់នៅ និងធ្វើការនៅប្រទេសថៃមានជាង ១,២ លាននាក់។

ការថមថយប៉ុន្មានថ្ងៃចុងក្រោយនេះ ​ ដោយសារពលរដ្ឋខ្មែរបានសម្រុកវិលចូលស្រុកវិញយ៉ាងគំហុកកាលដើមខែសីហា ដោយក្នុងមួយថ្ងៃៗរាប់ម៉ឺននាក់។ ជាក់ស្តែងគិតត្រឹមមួយថ្ងៃ នៅថ្ងៃទី ៥ ខែសីហា ឆ្នាំ ២០២៥ ពលរដ្ឋខ្មែរប្រមាណ ១០ ម៉ឺននាក់ បានវិលចូលស្រុកវិញតាមច្រកព្រំដែនអន្តរជាតិដូង ស្ថិតនៅក្នុងស្រុកកំរៀង​ខេត្តបាតដំបង។ លើសពីនេះ នៅមានច្រកព្រំដែនគោកផ្សេងទៀតដែលពលករវិលចូលស្រុក។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា ប្រាប់កម្ពុជាថ្មីថា គិតត្រឹមថ្ងៃទី ១៤ខែសីហា មានពលរដ្ឋខ្មែរវិលចូលស្រុកវិញជាង ៩១ ម៉ឺននាក់ ក្នុងចំណោមនោះទទួលបានឱកាសការងារភ្លាមពីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ក្រោមកិច្ចសហការជាមួយនឹងអាជ្ញាធរមូលដ្ឋាន។ លោកបានឱ្យដឹងថា ជាការពិតអំឡុងពេលផ្ទុះសង្គ្រាមដោយប្រើកម្លាំងប្រដាប់អាវុធចាប់ពីថ្ងៃទី ២៤ ខែកក្កដាមក ពលរដ្ឋខ្មែរចាប់ផ្តើមវិលមកស្រុកវិញយ៉ាងច្រើននៅតាមច្រកព្រំដែនគោកនានា។ ប៉ុន្តែលោកថា៖«ជាការកត់សម្គាល់ប៉ុន្មានថ្ងៃចុងក្រោយនេះ ឃើញពលរដ្ឋខ្មែរវិលចូលស្រុកវិញចន្លោះពី ២០០ ទៅ ៣០០ នាក់»។

បើតាមអ្នកនាំពាក្យដដែល ពលរដ្ឋដែលពុំទាន់សម្រេចចិត្តមកវិញដោយសារកំពុងពិចារណាស្ថានការណ៍នយោបាយ។
ស្របពេលពលករសម្រុកមកវិញ ក្រសួងកា​រងារ និងបណ្ដុះបណ្ដាល​​វិជ្ជាជីវៈ បាន​បើក​យុទ្ធនាការ​ទ្រង់ទ្រា​យធំជាបន្ត​បន្ទាប់ ចុះ​ផ្សព្វផ្សាយ​នៅតា​មឃុំ-សង្កាត់​ នៅ​ទូទាំងប្រទេស ដើម្បីនាំយ​កឱកាសការងាររាប់ម៉ឺនកន្លែង​ជូនបងប្អូ​នពលករខ្មែរ​ដែលទើ​បត្រឡប់មកពី​ប្រទេសថៃឱ្យមានការងារធ្វើ​ភ្លាមៗ។

បងប្អូនពលករខ្មែរ ដែលបានត្រឡប់មកពីប្រទេសថៃជាច្រើនរូប បានបង្ហាញអារម្មណ៍កក់ក្ដៅ ដោយបានជួបជុំក្រុមគ្រួសារ ជាពិសេស ពេលមកដល់ប្រទេសកម្ពុជាវិញ មានអាជ្ញាធរទទួលស្វាគមន៍យ៉ាងយកចិត្តទុកដាក់ និងជួយសម្រួលផ្ដល់មធ្យោបាយធ្វើដំណើរដោយឥតគិតថ្លៃ ត្រឡប់ទៅដល់ស្រុកកំណើត។

ជាមួយគ្នានេះ ពួកគាត់បានគោរពថ្លែងអំណរគុណដល់រាជរដ្ឋាភិបាលកម្ពុជា​ តាមរយៈក្រសួងការងារ និងបណ្ដុះបណ្ដាលវិជ្ជាជីវៈ រួមទាំងអាជ្ញាធរពាក់ព័ន្ធគ្រប់ជាន់ថ្នាក់ ដែលបានជួយរកការងារជូនបងប្អូនពលករខ្មែរ ត្រឡប់មកពីប្រទេសថៃ។ បន្ថែមពីនេះ ពួកគាត់សូមអំពាវនាវឱ្យបងប្អូនពលករខ្មែរដែលធ្វើការនៅប្រទេសថៃវិលត្រឡប់មកស្រុកវិញ ប្រសិនបើត្រូវបានគេរើសអើង ព្រោះនៅស្រុកខ្មែរមិនខ្វះការងារធ្វើទេ៕