ព័ត៌មានជាតិ

អាជ្ញាធរមីនប្រាប់UNDPពីការយាយីដល់ជីវិតពលរដ្ឋដោយសារសំណង់គ្រឿងផ្ទុះរបស់ថៃ

បានផុស

១០ ខែ មុន

នៅ

ថ្ងៃសៅរ៍ ៣០ សីហា ២០២៥

ដោយ

ប្រធានអាជ្ញាធរមីនលោក លី ធុជ បានប្រាប់ដល់តំណាងកម្មវិធីអភិវឌ្ឍន៍សហប្រជាជាតិលោក អេនរីកូ ហ្គាវេលីយ៉ា (Enrico Gaveglia) ពីការបន្តយាយីដល់សុវត្ថិភាពរបស់ពលរដ្ឋខ្មែរពេលបច្ចុប្បន្ន ពីកាកសំណល់គ្រឿងផ្ទុះដែលថៃបានប្រើប្រាស់ក្នុងជម្លោះប្រដាប់អាវុធជាមួយកម្ពុជាកាលពីចុងខែកក្កដា។ លោក លី ធុជ បានបញ្ជាក់ថា «កម្ពុជាត្រូវការជាបន្ទាន់ក្នុងកិច្ចការងារបោសសម្អាតគ្រឿងផ្ទុះទាំងនេះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងក្នុងជំនួបនៅស្នាក់ការអាជ្ញាធរមីនកម្ពុជាកាលពីថ្ងៃទី២៩ ខែសីហា ឆ្នាំ២០២៥ ទេសរដ្ឋមន្ត្រី លី ធុជ បានបញ្ជាក់ថា ក្នុងរយៈពេល៥ថ្ងៃនៃជម្លោះប្រដាប់អាវុធថៃបានប្រើគ្រាប់ទម្លាក់ពីលើអាកាស គ្រាប់បែកចង្កោម និងគ្រាប់ផ្លោងជាដើមទៅលើទីវត្តអារាម សាលារៀន មណ្ឌលសុខភាព ភូមិឋាន និងតំបន់វាលស្រែ ដែលកាកសំណល់ទាំងនេះបានយាយីដល់សុខសុវត្ថិភាពប្រជាពលរដ្ឋក្រោយពេលត្រឡប់ទៅភូមិឋានសម្រាប់សកម្មភាពប្រចាំថ្ងៃវិញ។

លោកបានបញ្ជាក់ថា អាជ្ញាធរមីនមានបំណងរៀបចំនូវកម្មវិធីឆ្លើយតបបន្ទាន់ (Emergency Response Program) តាមការចាំបាច់ ដើម្បីស្វែងរកការគាំទ្រ និងកៀរគរធនធានពីបណ្តាប្រទេសជាមិត្ត ដៃគូអភិវឌ្ឍន៍ វិស័យឯកជន និងសប្បុរជននានា ធ្វើការបោសសម្អាតយុទ្ធភ័ណ្ឌគ្រឿងផ្ទុះនៅតាម តំបន់ដែលសេសសល់ ក្នុងការរួមចំណែកលើកកម្ពស់សុខសុវត្ថិភាព និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងផងដែរ។

លោក អេនរីកូ ហ្គាវេលីយ៉ា បានបញ្ជាក់ថា បច្ចុប្បន្ននេះ UNDP កំពុងរៀបចំគម្រោងថ្មីមួយបន្តពីគម្រោងបោស សម្អាតមីន ដើម្បីលទ្ធផលដំណាក់កាលទី៤ ដែលនឹងបញ្ចប់នៅចុងឆ្នាំ២០២៥ ខាងមុខនេះ ហើយ UNDP ក៏កំពុងបន្តកិច្ចខិតខំប្រឹងប្រែងក្នុងការស្វែងការគាំទ្រ និងកៀរគរធនធានបន្ថែមពីដៃគូអភិវឌ្ឍន៍ ដើម្បីរួមចំណែកដោះស្រាយនូវបញ្ហាមីនដែលនៅសេសសល់ និងធ្វើឱ្យកម្ពុជាអាចសម្រេចបាននូវគោលដៅកម្ពុជាគ្មានមីនឆ្នាំ២០៣០។

គួរឱ្យដឹងផងដែរក្នុងជម្លោះប្រដាប់អាវុធ៥ថ្ងៃជាមួយកម្ពុជា កងទ័ពថៃបានប្រើប្រាស់អាវុធធុនធ្ងន់ជាច្រើនរហូតដល់គ្រាប់ទម្លាក់ពីយន្តហោះ គ្រាប់បែកចង្កោម និងបាញ់សារធាតុគីមីផូស្វ័រព័ណ៌ស ស្រោចលើកកងទ័ពកម្ពុជា។ ក្រៅពីនេះទីតាំងស៊ីវិលជាច្រើនត្រូវបានថៃបំផ្លាញ និងបន្សល់នូវគ្រាប់មិនទាន់ផ្ទុះជាច្រើនផងដែរ៕