ប្រធានាធិបតីហ្វីលីពីន កំពុងបំពេញទស្សនកិច្ចនៅកម្ពុជា ដើម្បីពង្រឹងកិច្ចសហប្រតិបត្តិការទ្វេភាគី

ប្រធានាធិបតីនៃសាធារណរដ្ឋហ្វីលីពីន ឯកឧត្តម ហ្វឺឌីណាន់ រ៉ួម៉ូលដេស ម៉ាកូស ជូញៀ និង លោកជំទាវទី១ បានអញ្ជើញមកដល់កម្ពុជាហើយនារសៀលនេះ ដើម្បីបំពេញទស្សនកិច្ចផ្លូវរដ្ឋ​ចាប់ពីថ្ងៃទី ៧-៩ ខែកញ្ញា ឆ្នាំ ២០២៥។
ការបំពេញទស្សនកិច្ចផ្លូវរដ្ឋនេះ ធ្វើឡើងតបតាមការអញ្ជើញរបស់ព្រះមហាក្សត្រកម្ពុជា។

​ឯកសារសំខាន់ៗមួយចំនួននៃកិច្ចសហប្រតិបត្តិការទ្វេភាគីកម្ពុជា-ហ្វីលីពីន នឹងត្រូវចុះហត្ថលេខា ក្នុងដំណើរទស្សនកិច្ចនេះ។ នាឱកាសនេះ លោកប្រធានាធិបតីហ្វីលីពីន នឹងជួបជាមួយសម្តេចតេជោ ហ៊ុន សែន ប្រមុខរដ្ឋស្តីទី ព្រមទាំងមានជំនួបពិភាក្សាទ្វេភាគីជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅឯវិមានសន្តិភាព។ នេះបើតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា។

កិច្ចសន្ទនារវាងលោក Marcos Jr. និងថ្នាក់ដឹកនាំកម្ពុជាទាំងពីររូប ត្រូវបានរំពឹងថា នឹងពិភាក្សាស៊ីជម្រៅលើការពង្រឹងទំនាក់ទំនងកក់ក្តៅ និងពង្រីកកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក ក៏ដូចជាការផ្លាស់ប្តូរទស្សនគ្នាលើបញ្ហាតំបន់ និងអន្តរជាតិនានាដែលជាចំណាប់អារម្មណ៍រួម។ ប្រធានាធិបតីហ្វីលីពីន ក៏នឹងអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និងនៅមណ្ឌបព្រះបរមរូបព្រះករុណា ព្រះបាទសម្តេចព្រះនរោត្តម សីហនុ «ព្រះបរមរតនកោដ្ឋ» អតីតព្រះមហាក្សត្រកម្ពុជា ផងដែរ។

តាមក្រសួងការបរទេសកម្ពុជា ដំណើរទស្សនកិច្ចផ្លូវរដ្ឋរបស់ប្រធានាធិបតី Marcos នឹងពង្រឹងបន្ថែមទៀតនូវចំណងមិត្តភាព និងសាមគ្គីភាព ព្រមទាំងកិច្ចសហប្រតិបត្តិការលើគ្រប់វិស័យរវាងប្រទេស និងប្រជាជនទាំងពីរ៕