អង្គការ PSE ប្រគល់ប្រាក់ ២ម៉ឺនដុល្លារ​ ទៅក្រសួងអប់រំ ជួយជួសជុលសាលារៀន ក្រោយខូចខាតខ្លាំង ពីការឈ្លានពានរបស់ថៃ

នៅថ្ងៃទី៨ ខែកញ្ញា ឆ្នាំ២០២៥ អង្គការដើម្បីភាពញញឹមនៃកុមារ (PSE) បានប្រគល់ប្រាក់ ២ម៉ឺនដុល្លារទៅក្រសួងអប់រំ យុវជន និងកីឡា ក្នុងការចូលរួមជួយជួសជុល និងសាងសង់សាលារៀនឡើងវិញ បន្ទាប់ពីរងការខូចខាតខ្លាំងពីការឈ្លានពានប្រដាប់អាវុធរបស់យោធាថៃ នៅតាមតំបន់ព្រំដែន កម្ពុជា-ថៃ។ នេះបើតាមទំព័រហ្វេសប៊ុករបស់ក្រសួងអប់រំ។

ការផ្តល់ជូននេះ ធ្វើឡើងនៅទីស្តីការក្រសួងអប់រំ ក្នុងឱកាស បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ទទួលជួបសម្តែងការគួរសម និងសំណេះសំណាលជាមួយប្រតិភូអង្គការ PSE ដឹកនាំដោយ លោកស្រី លក្ខិណា ដេប៉ាលីយែរ នាយកគ្រប់គ្រងអង្គការដើម្បីភាពញញឹមនៃកុមារ ដើម្បីទទួលកញ្ចប់ថវិកាគាំទ្រការជួសជុល និងសាងសង់ឡើងវិញនូវអគារសិក្សាដែលរងការប៉ះពាល់ដោយសង្រ្គាមនៅព្រំដែនជាប្រទេសថៃ។ ក្នុងឱកាសនោះ នាយកគ្រប់គ្រងអង្គការ PSE បានគោរពថ្លែងអំណរគុណយ៉ាងជ្រាលដល់ក្រសួងអប់រំ យុវជន និងកីឡាចំពោះការគាំទ្រ និងផ្តល់កិច្ចសហការយ៉ាងយកចិត្តទុកដាក់នូវរាល់គម្រោងពាក់ព័ន្ធនឹងវិស័យអប់រំជាមួយ PSE និងបានគូសបញ្ជាក់ពីការប្តេជ្ញាចិត្តបន្តគាំទ្រវិស័យអប់រំបន្ថែមទៀត។

ជាមួយគ្នានេះ បណ្ឌិតសភាចារ្យ ហង់ជួន ណារ៉ុន បានកោតសរសើរ និងថ្លែងអំណរគុណដល់អង្គការ PSE ចំពោះការបន្តជួយគាំទ្រដល់វិស័យអប់រំនៅកម្ពុជានាពេលកន្លងមក ព្រមទាំងសង្ឃឹមថា នឹងមានកិច្ចសហប្រតិបត្តិជាច្រើនបន្ថែមទៀតជាមួយក្រសួងអប់រំ និងអង្គការ PSE នាពេលអនាគត។ លោកបណ្ឌិតសភាចារ្យ ក៏បានប្រាប់ពីបច្ចុប្បន្នភាពស្ថានភាពនៅតំបន់ព្រំដែនជាមួយប្រទេសថៃ បច្ចុប្បន្ន មិនទាន់ត្រឡប់ទៅរកប្រក្រតីភាព ដែលធ្វើឱ្យក្រុមការងារក្រសួង មិនទាន់អាចចូលទៅសាងសង់ និងជួសជុលអគារសិក្សាដែលរងការខូតខាតដោយសង្គ្រាមនៅឡើយ។

យ៉ាងណាមិញ លោកបណ្ឌិតបន្តថា ក្រសួងអប់រំ បានរៀបចំរួចរាល់នូវក្រុមការងារជំនាញ និងផែនការដើម្បីស្តារសាលារៀននៅតាមបណ្តោយព្រំដែនឡើងវិញ ដោយប្រើប្រាស់កញ្ចប់ថវិការបស់ក្រសួង រួមជាមួយការជួយឧបត្ថម្ភគាំទ្រពីសប្បុរសជននានា ដែលក្នុងនោះមានកញ្ចប់ថវិការបស់ PSE ផងដែរ។ ក្រសួងបានចាត់ក្រុមការងារចុះពិនិត្យផ្ទាល់ដល់សាលារៀនដែលរងប៉ះពាល់ ដោយជាបឋមនឹងចាប់ផ្តើមពីការបោសសម្អាតមីននៅតាមកន្លែងដែលត្រូវសាងសង់ និងជួសជុល។ តាមការគ្រោងទុក ក្រសួងនឹងសម្របសម្រួលឱ្យមានការបើកបវេសនកាលចូលរៀននៅដើមខែវិច្ឆិកា ឆ្នាំ២០២៥ខាងមុខនេះ នៅតាមទីទូលសុវត្ថិភាពដែលអំណោយផលសម្រាប់ការរៀន និងបង្រៀន ដើម្បីធានាបានថាសិស្សានុសិស្សអាចបន្តទទួលបានការអប់រំប្រកបដោយគុណភាព សមធម៌ និងបរិយាបន្ន។

ក្រសួងអប់រំ បានបញ្ជាក់ថា អង្គការដើម្បីភាពញញឹមនៃកុមារ PSE បានរួមចំណែកជាមួយរាជរដ្ឋាភិបាលកម្ពុជា ក្នុងការបង្កើនវិសាលភាពនៃការអប់រំ លើកកម្ពស់គុណភាពអប់រំ និងការអភិវឌ្ឍធនធានមនុស្សនៅកម្ពុជា ឆ្លើយតបនឹងយុទ្ធសាស្ត្របញ្ចកោណ ដំណាក់កាលទី១ ផងដែរ៕