ព័ត៌មានជាតិ

ក្រុមមន្រ្តីជំនាញ ចុះពិនិត្យគុណភាពស្ពានព្រែកតាអុក ជាលើកទី២ ក្រោយរងការខូចខាត

បានផុស

៨ ខែ មុន

នៅ

ថ្ងៃសុក្រ ១២ កញ្ញា ២០២៥

ដោយ

កោះកុង ៖ ក្រុមមន្រ្តីជំនាញនៃក្រសួងសាធារណការ និងដឹកជញ្ជូន សហការជាមួយមន្ទីរសាធារណការខេត្តកោះកុង នៅថ្ងៃទី១២ ខែកញ្ញា ឆ្នាំ២០២៥ បានចុះត្រួតពិនិត្យអំពីគុណភាពបច្ចេកទេសស្ពានព្រែកតាអុក ស្ថិតនៅភូមិតាអុក ឃុំអណ្តូងទឹក ស្រុកបូទុមសាគរ ជាលើកទី២ ក្រោយរងការខូចខាតប្រេះស្រោះ។

មន្ត្រីជំនាញបច្ចេកទេសនៃនាយកដ្ឋានផ្លូវល្បឿនលឿន និងមន្ទីរសាធារណការខេត្តកោះកុង នៅតែបន្តចុះត្រួតពិនិត្យលក្ខណៈបច្ចេកទេសនៃគុណភាពស្ពានព្រែកតាអុក រួមគ្នាជាមួយមន្ទីរសាធារណការខេត្តកោះកុង ដើម្បីលម្អិតកាន់តែច្បាស់អំពីផលខូចខាតប្រេះស្រោះនៃស្ពាន ព្រោះតែការដឹកលើសទម្ងន់កំណត់របស់ក្រុមរថយន្តធំៗឆ្លងកាត់។

បើតាមការគូសបញ្ជាក់របស់លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង ពន្យល់ថា គុណភាពស្ពានអាចបន្តប្រើប្រាស់ចរាចរណ៍បានធម្មតា ប៉ុន្តែក្រុមរថយន្តធុនធ្ងន់ទាំងនោះ ត្រូវតែគោរពច្បាប់ដឹកជញ្ចូនជាធរមាន ករណីប្រសិនបើរកឃើញថាល្មើស គឺនឹងទោសទណ្ឌជាមិនខាន។ បច្ចុប្បន្នក្រុមមន្រ្តីជំនាញ កំពុងធ្វើរបាយការណ៍លទ្ធផលវាយតម្លៃពិនិត្យលម្អិតជាថ្មីគោរពជូនរដ្ឋមន្រ្តីក្រសួងសាធារណការ និងដឹកជញ្ចូន ពិនិត្យ និងមានវិធានការដោះស្រាយបន្តទៀត។

លោក អន ដាវុធ បានបន្ថែមថា ក្រសួងនឹងលើកគម្រោងអភិវឌ្ឍន៍ជួសជុលអោយបានឆាប់រហ័សចំពោះការខូចខាតស្ពានព្រែកតាអុកនេះ ដើម្បីបន្តថែរក្សាគុណភាពស្ពានឱ្យគង់វង្សយូរអង្វែងទៅថ្ងៃមុខ។ ស្ពានព្រែកតាអុក រកឃើញថា មានការប្រេះស្រោះសសរចំនួន៤កន្លែង និងធ្នឹមតួស្ពានចំនួន១កន្លែង។

កន្លងទៅប្រជាពលរដ្ឋមានការព្រួយសម្តែងក្តីព្រួយបារម្ភអំពីការបែកប្រេះស្រោះស្ពានព្រែកតាអុកនេះ ដោយសារតែការដឹកលើសទម្ងន់របស់ក្រុមរថយន្តធុនធំដែលដឹកគ្រួស ខ្សាច់ និងថ្ម បើកបរឆ្លងកាត់ទៅមក។

ស្ពានព្រែកតាអុក មានប្រវែង១២៦ម៉ែត្រទទឹង ៨ម៉ែត្រគម្រោងសាងសង់ ក្រសួងសាធារណការនិងដឹកជញ្ជូន ស្ថាបនានាយកដ្ឋានវិស្វកម្មក្រសួងការពារជាតិ។ ស្ពាននេះសាងសង់នៅឆ្នាំ២០១១ ធ្វើរួចរាល់នៅឆ្នាំ២០១៤បើគិតអាយុកាលបានត្រឹមតែ១១ឆ្នាំហើយ៕

អត្ថបទ ៖ សិរីវឌ្ឍនៈ