ព័ត៌មានជាតិ

ឆ្លុះបញ្ចាំងការពិត មន្រ្តីចុះផ្ទៀងផ្ទាត់ភស្តុតាងបញ្ជាក់ពីការវាស់ក្រិតជញ្ជីងថ្លឹងឥវ៉ាន់អ្នកដំណើរ នៅព្រលានតេជោ

បានផុស

៧ ខែ មុន

នៅ

ថ្ងៃអាទិត្យ ២១ កញ្ញា ២០២៥

ដោយ

ក្រោយវិដេអូដែលអ្នកដំណើរមួយរូបបានបង្ហោះផ្សព្វផ្សាយដោយចោទប្រកាន់ថា មន្រ្តីព្រលានយន្តហោះអន្តរជាតិតេជោ បានកេងបន្លំលួចស៊ីគីឡូជញ្ជីងថ្លឹងឥវ៉ាន់របស់អ្នកដំណើរ មន្រ្តីបច្ចេកទេសបានចុះស្រាវជ្រាវស្វែងរកការពិត ដើម្បីផ្តល់ភាពយុត្តិធម៌ដល់អ្នកដំណើរផង ក៏ដូចជាការពារមុខមាត់ព្រលានយន្តហោះថ្មីដែលជាមោទនភាពរបស់ប្រទេសកម្ពុជា។

ក្រោយផ្ទុះវីដេអូនាំឲ្យមានការយល់ច្រឡំពីមហាជននោះ កាលពីពេលថ្មីៗនេះ មន្រ្តីពាក់ព័ន្ធបានចុះផ្ទៀងផ្ទាត់ភស្តុតាងបែបវិទ្យាសាស្ត្រ ដើម្បីបញ្ជាក់ពីការវាស់ក្រិតជញ្ជីងថ្លឹងឥវ៉ាន់អ្នកដំណើរនៅអាកាសយានដ្ឋានអន្តរជាតិតេជោ។

ក្រោយការផ្ទៀងផ្ទាត់តាមបញ្ជរជញ្ជីងថ្លឹងឥ៉វ៉ាន់តាមបណ្តាក្រុមហ៊ុនអាកាសចរណ៍នានាក្នុងព្រលានបង្ហាញពីភាពសុក្រិត និងត្រឹមត្រូវមិនដូចការចោទប្រកាន់ ដែលអាចនាំឲ្យប៉ះពាល់ដល់ដំណើរការនិងមុខមាត់ព្រលានយន្តហោះថ្មីរបស់កម្ពុជា។

មន្រ្តីអាកាសចរណ៍ស៊ីវិលបានប្រាប់កម្ពុជាថ្មីថា ជញ្ជីងដែលទិញតាមទីផ្សារអាចមានលក្ខខណ្ឌប្រើប្រាស់ខុសៗគ្នា។ ដើម្បីតម្លាភាព មន្រ្តីរូបនេះលើកទឹកចិត្តដល់ពលរដ្ឋ អាចយកជញ្ជីងដែលប្រើប្រាស់ផ្ទាល់ខ្លួនមកថ្លឹងផ្ទៀងផ្ទាត់គ្នា ដើម្បីបញ្ជាក់ភាពសុក្រិតស្របតាមស្តង់ដាបច្ចេកទេស។

បន្ថែមពីនេះ មន្រ្តីបច្ចេកទេសរូបនេះបានអះអាងថា រាល់ឧបករណ៍ដែលយកមកបំពាក់ក្នុងព្រលានមុនអនុញ្ញាតឲ្យប្រើប្រាស់ត្រូវឆ្លងកាត់ការធ្វើតេស្តិស្របតាមតម្រូវស្តង់ដាអន្តរជាតិ៕

Related Topics:ព្រលានយន្តហោះអន្តរជាតិតេជោ Featured