ព័ត៌មានជាតិ

អាជីវកម្មមានប្រភពពីខេត្តសៀមរាប បើកហាងលក់គ្រឿងចម្លាក់បង្ហាញអត្តសញ្ញាណខ្មែរនៅព្រលានយន្តហោះអន្តរជាតិតេជោ

បានផុស

១០ ខែ មុន

នៅ

ថ្ងៃសុក្រ ១៩ កញ្ញា ២០២៥

ដោយ

ហាង Artisans Angkor បានបង្ហាញខ្លួននៅអាកាសយានដ្ឋានអន្តរជាតិតេជោ ដោយមានការតាំងលក់ផលិតផលស្នាដៃសិល្បៈខ្មែរមានរូបចម្លាក់ពីថ្មកែវ ថ្មពួក ចម្លាក់ឈើ រួមទាំងរូបគំនូរគូរដោយដៃដែលជាស្នាដៃពីសិប្បករខ្មែរក្នុងស្រុក។

បុគ្គលិកផ្នែកលក់នៅហាង Artisans Angkor បានផ្តល់សម្ភាសន៍ដល់កម្ពុជាថ្មីពីដំណើរការអាជីវកម្មលក់វត្ថុសិល្បៈខ្មែរនៅច្រកចេញចូលដ៏មមាញឹកនៅអាកាសយានដ្ឋានអន្តរជាតិតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សយ សុខឿន បុគ្គលិកផ្នែកលក់នៅហាង Artisans Angkor បានឲ្យដឹងថា សិប្បកម្មនេះមានមូលដ្ឋានមកពីខេត្តសៀមរាប និងបានពង្រីកវត្តមាននៅអាកាសយានដ្ឋានអន្តរជាតិតេជោ។

ហាង Artisans Angkor មានការតាំងលក់ស្នាដៃវត្ថុសិល្បៈខ្មែរ ដោយចម្លាក់ខ្លះដកស្រង់ចេញពីរូបពីប្រាសាទអង្គរវត្ត ប្រាសាទបន្ទាយស្រី ក៏ដូចជាប្រាសាទបាយ័ន ដែលមានក្បូរក្បាច់រចនាផ្ចិតផ្ចង់ដ៏អស្ចារ្យ។

រូបសិល្បៈដែលតាំងលក់មានដូចជារូបព្រះកេសព្រះបាទជ័យវរ្ម័នទី ៧ រូបដំរី រូបព្រះគណេស រូបព្រះពុទ្ធ រួមទាំងរូបគំនូរគូរដោយដៃ និងចម្លាក់ឈើជាទម្រង់សិល្បៈផ្សេងៗ។

លោក សយ សុខឿន បានបញ្ជាក់ថា ព្រលានយន្តហោះអន្តរជាតិតេជោ ជាគោលដៅដំបូងដែលទេសចរឆ្លងកាត់ ហើយតាមរយៈការបង្ហាញពីរូបសិល្បៈទាំងអស់នេះ អាចឲ្យពួកមើលឃើញនិងស្វែងយល់និងស្គាល់កាន់តែច្បាស់ពីតម្លៃនៃអត្តសញ្ញាណជាតិ និងវប្បធម៌ដ៏ថ្កុំថ្កើងរបស់ជនជាតិខ្មែរ។

ពាក់ព័ន្ធតម្លៃ បើតាមបុគ្គលិកផ្នែកលក់នៅហាង Artisans Angkor អាស្រ័យលើរូបនិងរចនាប័ថ ដូចជាប្រភេទរួបចម្លាក់ពីថ្មកែវ និងថ្មពួកតម្លៃទាបបំផុតអាចចាប់ពី ៣០ ដុល្លារ រហូតដល់ជាង ១ ពាន់ដុល្លារក៏មាន៕