អាជ្ញាធរមណ្ឌលគិរី បញ្ចេញគ្រឿងចក្រជាច្រើនជួសជុលផ្លូវរងការខូចខាតដោយជំនន់ទឹកភ្លៀង

អាជ្ញាធរនៅស្រុកកោះញែក ខេត្តមណ្ឌលគិរី បានបញ្ចេញគ្រឿងចក្រជាច្រើន ដើម្បីស្ថាបនាផ្លូវជាច្រើនខ្សែនៅតាមបណ្តាភូមិ ឃុំ ដែលរងការខូចខាតដោយសារជំនន់ទឹកភ្លៀងការពីពេលថ្មីៗនេះ។​ ជំនន់ទឹកភ្លៀងកាលពីថ្ងៃទី ២៣-២៤ ខែកញ្ញា ឆ្នាំ ២០២៥ បណ្តាឱ្យខូចខាតផ្លូវច្រើនខ្សែ ប៉ះពាល់ដល់ឃុំ ចំនួន ៦ និងផ្ទះប្រជាពលរដ្ឋ​ជាច្រើនខ្នង។ គ្រឿងចក្រជា​ច្រើន​ត្រូវបានបញ្ចេញចាប់ពីថ្ងៃទី ២៩ ខែកញ្ញា ដើម្បីពន្លឿនការស្ថាបនាផ្លូវ។

លោក សី ទូច អភិបាលស្រុកកោះញែក ខេត្តមណ្ឌលគិរី បានប្រាប់ កម្ពុជាថ្មី ឱ្យដឹងថា ដោយមានការយកចិត្តទុក្ខដាក់ពីលោក ថង សាវុន អភិបាលខេត្តមណ្ឌលគិរី ក្នុងនាមរដ្ឋបាលស្រុក បានសហការណ៍ជាមួយមន្ទីអភិវឌ្ឍជនបទ និងមន្ទីធនធានទឹកនិងឧតុនិយម បានធ្វើការស្ថាបនាជួសជុលផ្លូវលំជាច្រើនខ្សែស្ថិតក្នុងស្រុកកោះញែក ដើម្បីសម្រួលដល់ការធ្វើដំណើរជូនប្រជាពលរដ្ឋ បន្ទាប់ពីផ្លូវតាមតំបន់មួយចំនួនបានរងការខូចខាតស្ទើរទាំងស្រុង។

លោកបានបន្ថែមថា ផ្លូវខូចធ្ងន់ធ្ងរដែលកំពុងស្ថាបនាមុនគេ ជាក់ស្ដែងស្ថិតក្នុងភូមិរង្សី ឃុំស្រែសង្គម ស្រុកកោះញែក ពីចំណុចផ្លូវបំបែកផ្សារធំឆ្ពោះទៅស្ពានថ្ម ឃុំស្រែហ៊ុយ ដែលមានប្រវែងជាង១ពាន់ម៉ែត្រ។ អភិបាលស្រុករូបនេះបានបញ្ជាក់ថា សម្រាប់ផ្លូវដែលខូចខាតតាបណ្ដាឃុំផ្សេងទៀត អាជ្ញាធរកំពុងតែត្រៀមចល័តគ្រឿងចក្រទៅឈូសឆាយជួសជុលស្ថាបនាឡើងវិញជាបន្ទាន់ផងដែរ ធ្វើយ៉ាងណា ដើម្បីសម្រួលដល់ការធ្វើដំណើរឱ្យបានឆាប់រហ័ស។

សូមរំឭកផងដែរថា នៅឃុំទាំង៦ស្ថិតនៅក្នុងស្រុកកោះញែក បានរងការបំផ្លិចបំផ្លាញជន់លិចដោយគ្រោះធម្មជាតិជំនន់ទឹកភ្លៀងកាលពីថ្ងៃទី២៣-២៤ខែកញ្ញាឆ្នាំកន្លងទៅ បណ្ដាលឱ្យហេដ្ឋារចនាសម្ព័ន្ធ លំនៅឋាន សត្វពាហនៈស្រែចម្ការ ទ្រព្យសម្បត្តិផ្សេងៗ របស់ប្រជាពលរដ្ឋជាច្រើនបានរងការខូចខាត។ ប៉ុន្តែក្រោយមកដោយការយកចិត្តទុកដាក់ពីរាជរដ្ឋាភិបាល ប្រជាពលរដ្ឋដែលរងគ្រោះជិត ១ពាន់គ្រួសារ ក្នុងខេត្តមណ្ឌលគិរី បានទទួលអំណោយពីកាកបាទក្រហមកម្ពុជា។

នៅពេលបច្ចុប្បន្ននេះ អាជ្ញាធរស្រុកកោះញែកបានកំពុងពន្លឿនស្ថាបនាជួសជុលផ្លូវដែលរងការខូចខាតឡើងវិញដើម្បីសម្រួលដល់ការធ្វើដំណើរជូនប្រជាពលរដ្ឋ ឱ្យបានល្អប្រសើឡើងវិញ ក៏ដូចជាសម្រួលដល់ការដឹកកសិផលផ្សេងៗឆ្ពោះទៅទីផ្សារ បន្ទាប់ពីបានផ្អាកចរាចរបណ្ដោះអាសន្នមួយរយៈខ្លីនាពេលកន្លងមក៕

អត្ថបទ៖ រៀម សុខហេង