អគ្គនាយកដ្ឋានអន្តោប្រវេសន៍ បដិសេធចំពោះគេហទំព័រមួយដែលក្លែងបន្លំជាគេហទំព័រ Cambodia e-Arrival

អគ្គនាយកដ្ឋានអន្តោប្រវេសន៍ បានបដិសេធចំពោះគេហទំព័រមួយ ដែលបានក្លែងបន្លំជាគេហទំព័រ Cambodia e-Arrival។ ដោយមានការក្លែងគេហទំព័រ Cambodia e-Arrival អគ្គនាយកដ្ឋានអន្តោប្រវេសន៍ប្រាប់អ្នកដំណើរប្រយ័ត្នចូលខុស។

បើតាមអគ្គនាយកដ្ឋានអន្តោប្រវេសន៍ គេហទំព័រដែលមានអាសយដ្ឋាន https://edocs.online/index.php គឺជាគេហទំព័រក្លែងបន្លំ ពោលគឺមិនមែនជាគេហទំព័រ Cambodia e-Arrival ដែលត្រូវបង្កើតឡើងដោយអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ សម្រាប់ប្រើប្រាស់ក្នុងការបំពេញព័ត៌មានតាមប្រព័ន្ធអេឡិចត្រូនិកសលាកបត្រចូលប្រទេសកម្ពុជានោះឡើយ។

ជាមួយនឹងការបដិសេធនេះ អគ្គនាយកដ្ឋានអន្តោប្រវេសន៍ តាមរយៈសេចក្ដីជូនព័ត៌មាន នៅថ្ងៃទី៧ ខែតុលា ឆ្នាំ២០២៥ ក្រើនរំលឹកដល់អ្នកដំណើរ ដែលចូលមកប្រទេសកម្ពុជា តាមអាកាសយានដ្ឋានអន្តរជាតិទាំងអស់ ឱ្យពិនិត្យឱ្យបានច្បាស់លាស់ ជៀសវាងការចូលទៅគេហទំព័រក្លែងបន្លំនានា ដែលនាំឱ្យមានការខាតបង់ថវិកា ឬការលួចយកព័ត៌មានផ្ទាល់ខ្លួនផ្សេងៗរបស់អ្នកប្រើប្រាស់ដោយខុសច្បាប់។

អគ្គនាយកដ្ឋានអន្តោប្រវេសន៍ បញ្ជាក់ជាថ្មីថា ការបំពេញព័ត៌មានតាមប្រព័ន្ធអេឡិចត្រូនិកសលាកបត្រចូលកម្ពុជាជាផ្លូវការ គឺតាមគេហទំព័រ www.arrival.gov.kh ឬ Cambodia e-Arrival នៅក្នុងកម្មវិធី App Store និង Play Store នៅលើទូរសព្ទដៃ ឬឧបករណ៍អេឡិចត្រូនិកផ្សេងទៀត ហើយពុំតម្រូវឱ្យបង់ថ្លៃសេវានោះទេ៕