បណ្ឌិត សេង សារី ៖ ការគិតថាបញ្ហាភូមានឹងបញ្ចប់ ដោយគ្មានការជួយពីកម្ពុជា គឺជាគំនិតដ៏ឆ្អួតលីលាបំផុត

អ្នកវិភាគបញ្ហាសង្គម និងនយោបាយ លោកបណ្ឌិត សេង សារី បានអះអាងនៅថ្ងៃអាទិត្យនេះថា ការចូលរួមដោះស្រាយវិបត្តិនៅភូមាពីសំណាក់កម្ពុជា គឺមានលក្ខណៈសមស្របបំផុត បើផ្អែកលើបទពិសោធន៍កន្លងមករបស់កម្ពុជា។ ជាមួយគ្នានេះ លោកក៏គូសបញ្ជាក់ថា ការគិតថា វិបត្តិនៅភូមា នឹងត្រូវបញ្ចប់ដោយគ្មានជួយចរចា និងសម្រុះសម្រួលពីកម្ពុជាដែលជាប្រធានអាស៊ាន គឺជាគំនិតដ៏ឆ្អួតលីលាបំផុត។

តាមរយៈទំព័រហ្វេសប៊ុក លោកបណ្ឌិត សេង សារី បានលើកឡើងថា ឆ្នាំ ២០២២​ ជាពេលវេលាដ៏សមស្របបំផុតសម្រាប់កម្ពុជា យកបទពិសោធន៍ចរចាបញ្ចប់ជម្លោះនយោបាយកាលពីជាង​ ៣០ឆ្នាំមុន​ ទៅប្រើសម្រា​ប់ដោះស្រាយវិបត្តិនយោបាយនៅភូមា។ លោកថា នៅក្នុងសិល្បៈនៃការចរចា​ គឺគ្មានការចរចាណាមួយដែលទាត់ចោលភាគីនៃជម្លោះណាមួយចេញ ហើយទទួលបានជោគជ័យនោះទេ សូម្បីតែខ្មែរក្រហមដែលបានសម្លាប់រង្គាលប្រជាជនជាង​ ២លាននាក់​ ក៏ត្រូវបានគេរាប់បញ្ចូលជាភាគីមួយសម្រាប់ការចរចារដែរ។

លោកបណ្ឌិត សេង សារី បានសង្កត់ធ្ងន់ដូច្នេះថា៖ «ការមិនឱ្យភាគីកម្ពុជាក្នុងនាមជាប្រធានអាស៊ានឆ្នាំ២០​២២​ ទៅជួបចរចាជាមួយភាគីរដ្ឋាភិបាលយោធាភូមា​ ហើយសង្ឃឹមថា វិបិត្តនយោបាយនៅភូមា នឹងត្រូវបានបញ្ចប់​ គឺជាគំនិតដ៏ឆ្អួតលីលាបំផុត។ តើយុទ្ធសាស្រ្តទ្វាក្រោយរបស់សម្តេច​ ហ៊ុន​ សែន​ ដែលធ្លាប់ប្រើជោគ​ជ័យជាមួយខ្មែរក្រហម​ នឹងអាចប្រើជោគជ័យម្តងទៀតសម្រាប់វិបិត្តនៅភូមាដែរឬទេ? អាស៊ាន​ឆ្នាំ​ ២០២២​ នឹងក្លាយជាអាស៊ានដែលគួរឱ្យចាប់អារម្មណ៍បំផុត!​ តើអាស៊ាននឹងបែក​ ឬនឹងអាចរួមគ្នាជាអាស៊ានជើង១០ វិញ? សូមរងចាំទស្សនាទាំងអស់គ្នា!»។

សូមបញ្ជាក់ថា នៅថ្ងៃទី០៧ និង០៨ ខែមករា ឆ្នាំ២០២២ខាងមុខ សម្តេចតេជោ ហ៊ុន​ សែន នាយករដ្ឋមន្រ្តីនៃកម្ពុជា នឹងអញ្ជើញទៅធ្វើទស្សនកិច្ចនៅក្នុងប្រទេសភូមា។ គោលបំណងសំខាន់នៃដំណើរទស្សនកិច្ចនេះ គឺស្វែងរកដំណោះស្រាយមួយ ដើម្បីឱ្យភូមាមានលទ្ធភាពចូលរួមកិច្ចប្រជុំកំពួលអាស៊ានបានឡើងវិញ។ បញ្ហានេះ ត្រូវបានអតីតរដ្ឋមន្រ្តីការបរទេសថៃ លោកកាស៊ីត ភិរម្យ រិះគន់ និងជំទាស់។ ប៉ុន្តែ សម្តេចតេជោ ហ៊ុន សែន បានព្រមានដល់លោកកាស៊ីត ភិរម្យនេះ ដោយកុំឱ្យមករំខាន និងចេះដឹងការងាររបស់សម្តេចដែលជាប្រមុខរដ្ឋាភិបាលកម្ពុជា និងជាប្រធានអាស៊ាននៅក្នុងឆ្នាំ២០២២ខាងមុខនេះ៕

អត្ថបទ៖ វណ្ណ សុគន្ធា