ហេតុអ្វីលោកបណ្ឌិត ហ៊ុន ម៉ាណែត ក្លាយជាបេក្ខជនតែម្នាក់គត់សម្រាប់តំណែងនាយករដ្ឋមន្ត្រី ?

មានគុណបំណាច់ជាច្រើនត្រូវបានទទួលស្គាល់ពីសមាជិកគណៈកម្មាធិការកណ្តាលគណបក្សប្រជាជនកម្ពុជា ដែលធ្វើឲ្យលោកបណ្ឌិត ហ៊ុន ម៉ាណែត ដែលជាបុត្រាច្បងរបស់សម្ដេចតេជោ ហ៊ុន សែន ក្លាយជាបេក្ខជននាយករដ្ឋមន្ត្រីនាពេលអនាគតតែម្នាក់គត់របស់គណបក្សប្រជាជនកម្ពុជា នេះបើតាមបិទតាមការបញ្ជាក់ពីលោក សួស យ៉ារ៉ា អ្នកនាំពាក្យគណបក្ស នៅក្នុងសន្និសីទសារព័ត៌មានក្រោយបញ្ចប់អង្គសន្និបាតនាព្រឹកមិញនេះ។

បើតាមលោក សួស យ៉ារ៉ា មូលហេតុដែលអង្គសន្និបាតបានបោះឆ្នោតជាឯកច្ឆន្ទ គាំទ្រលោកបណ្ឌិត ហ៊ុន ម៉ាណេត ជាបេក្ខជននាយករដ្ឋមន្ត្រីនាពេលអនាគតនោះ ដោយសារតែសមាជិកគណៈកម្មាធិការកណ្ដាលទាំងអស់បានស្គាល់ពីគុណតម្លៃរបស់លោកបណ្ឌិត ហ៊ុន ម៉ាណែត ច្បាស់។ លោកថា ក្រៅពីភារកិច្ចារធំៗ ដែលលោកទទួលបាន លោកគឺជាអគ្គមេបញ្ជាការរងនៃកងយោធពលខេមរភូមិន្ទ ហើយជាមេបញ្ជាការកងទ័ពជើងគោក។

ជាមួយគ្នានោះលោកបណ្ឌិត ហ៊ុន ម៉ាណែត គឺជាអ្នកទទួលខុសត្រូវមួយរូបនៅក្នុងដំណាក់កាលនៃការរីករាលដាលជំងឺកូវីដ១៩នៅកម្ពុជា ជាមួយឧត្តមភរិយារបស់លោក ដោយបានចូលរួមយ៉ាងសកម្ម ដើម្បីទប់ស្កាត់ការរីករាលដាលជំងឺកូវីដ១៩ ដូចជាការបង្កើតមន្ទីរពេទ្យ ការព្យាបាលប្រជាពលរដ្ឋនៅពេលដែលវាក់សាំងមិនទាន់មកដល់។ ក្នុងនោះអ្នកជំងឺរាប់ម៉ឺននាក់ត្រូវបានសង្គ្រោះដោយផ្ទាល់ នេះបង្ហាញពីគុណធម៌ និងគុណសម្បត្តិដ៏ធំធេងរបស់លោកក្រៅពីសិក្សានៅក្នុងផ្នែកវិទ្យាសាស្រ្ត ដែលបានបញ្ជាក់នៅលើលិខិតកាលពី២៨ឆ្នាំមុន ដែលសម្ដេចតេជោនាយករដ្ឋមន្ត្រីបានបង្ហាញកាលពីថ្មីៗនេះ ហើយតាមរយៈលិខិតនេះ មានន័យគ្រប់គ្រាន់សម្រាប់ការពិចារណា និងមានគុណបំណាច់មួយចំនួនទៀត ដែលលោកបានលះបង់ជូនជាតិ និងប្រជាជន។

លោក សួស យ៉ារ៉ា បានបញ្ជាក់ថា នៅក្នុងកិច្ចប្រជុំនេះ មានវត្តមានសមាជិកគណៈកម្មាធិការកណ្ដាលចំនួន៧៧៥រូប ក្នុងនោះអនុប្បវាទតែ១រូបប៉ុណ្ណោះហើយនេះជាលទ្ធផលសម្រាប់ការបោះឆ្នោតអនុប្រធានគណបក្ស ប៉ុន្តែសម្រាប់បេក្ខជននាយករដ្ឋមន្ត្រី គឺគាំទ្រជាឯកច្ឆ័ន្ទតែម្តង។ លោកបញ្ជាក់យ៉ាងនេះថា “ដោយសាយើងមានឯកភាពគ្នាយើងមិនមានរើសបេក្ខភាពផ្សេងទៀតទេ គឺទាំងអស់គ្នាគាំទ្រជូនឯកឧត្តម ហ៊ុន ម៉ាណែត ជាបេក្ខជនអនាគតនាយករដ្ឋមន្រ្តី”។

សូមបញ្ជាក់ថា សន្និបាតគណៈកម្មាធិការកណ្តាលគណបក្សប្រជាជនកម្ពុជា លើកទី៤៣ អាណត្តិទី៥ នៅព្រឹកថ្ងៃទី២៤ ខែធ្នូ ឆ្នាំ២០២១នេះ រៀបចំឡើងក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន ប្រធានគណបក្ស, សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្ស, សម្តេចក្រឡាហោម ស ខេង អនុប្រធានគណបក្ស, សម្តេចវិបុលសេនាភក្តី សាយ ឈុំ អនុប្រធានគណបក្ស និងមានការចូលរួមពីសមាជិក សមាជិកា គណៈកម្មាធិការកណ្តាលចំនួន៧៧៥រូប ក្នុងចំណោមសមាជិកគណៈកម្មាធិការកណ្តាលទាំងអស់ចំនួន៨៦៥រូប៕

អត្ថបទ៖ កោះកែវ