លោក Jean-François Tain បង្ហាញនូវសេណារីយ៉ូចំនួន៥ ចំពោះសង្រ្គាមរុស្ស៊ីនៅអ៊ុយក្រែន

លោក​ Jean-François Tain អ្នកជំនាញផ្នែកភូមិសាស្រ្តនយោបាយអន្តរជាតិ និងជានាយកគ្រប់គ្រងវិទ្យុបារាំងអន្តរជាតិជាខេមរភាសា បានបង្ហាញនូវសេណារីយ៉ូ ៥ ដែលអាចនឹងកើតឡើងចំពោះបញ្ហាសង្រ្គាមរុស្ស៊ីនៅក្នុងប្រទេសអ៊ុយុក្រែន។​ ការបង្ហាញពីសេណារីយ៉ូរបស់អ្នកជំនាញផ្នែកភូមិសាស្រ្តនយោបាយអន្តរជាតិរូបនេះធ្វើឡើង ខណៈដែលសង្រ្គាមនៅក្នុងប្រទេសអ៊ុយក្រែនកាន់តែក្តៅទៅៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈបណ្តាញសង្គមហ្វេសប៊ុកនៅរសៀលថ្ងៃចន្ទនេះ លោក​ Jean-François Tain បានសរសេរថា សេណារីយ៉ូនៃសង្គ្រាមរុស្ស៊ីនៅអ៊ុយក្រែន គឺទី១. អ៊ុយក្រែនចាញ់សង្គ្រាម។ លោកបញ្ជាក់ថា សម្រាប់រុស្ស៊ីឈ្នះសង្គ្រាមជារឿងមួយ កាន់កាប់អ៊ុយក្រែនជារឿងមួយផ្សេង ម្ល៉ោះហើយ អាចនឹងមានលទ្ធភាពពុះចែកអ៊ុយក្រែនជា២(ខាងកើតផ្តាច់ការនិងរុស្ស៊ីនិយម, ខាងលិចសេរីប្រជាធិបតេយ្យ និងបស្ចិមលោកនិយម ) ឬអាចនឹងមានការលើកបន្តុបដាក់នៅក្រុងKiev នូវរដ្ឋាភិបាលមួយផ្តាច់ការរណបរុស្ស៊ី ដូចអ្វីដែលកំពុងប្រព្រឹត្តទៅនៅបេឡូរុស សព្វថ្ងៃ។

សេណារីយ៉ូទី២. គឺសង្គ្រាមអូសបន្លាយគ្មានអ្នកឈ្នះ គ្មានអ្នកចាញ់។ បើតាមលោក​ Jean-François Tainអំណាចរបស់លោកប្រធានាធិបតីអ៊ុយក្រែន Zelensky មិនរលំ ដឹកនាំការប្រយុទ្ធយូរឆ្នាំ ហើយដោយមានជំនួយយោធា និងជំនាយការណ៍សម្ងាត់ពីលោកសេរី គឺសង្គ្រាមក្លាយជាសង្គ្រាមទីក្រុង ឬសង្គ្រាមព្រៃយូរឆ្នាំ។ សេណារីយ៉ូទី៣. គឺសង្គ្រាមរីកធំ។ លោកថា ពូទីន អស់ពីស្រូបយកបេឡារុស និងអស់ពីឈ្លានពានយកអ៊ុយក្រែន នឹងបន្តធ្វើសង្គ្រាមឈ្លានពានយកហ្សកហ្ស៊ី និងម៉ូលដាវីទៀត តែចៀសវាងមិនប៉ះពាល់ប្រទេសសមាជិកណាតូណាមួយទេ។ លោក​ Jean-François Tain បន្ថែមថា លោកពូទីន ហ៊ានប៉ះពាល់សមាជិកណាតូ ឬណាតូប៉ះគ្នានឹងរុស្ស៊ីក្នុងប្រការណាមួយ សង្គ្រាមនៅពេលនោះ នឹងរីកធំ ក្លាយជាសឹករវាងរុស្ស៊ី និងណាតូ គឺជាការផ្តើមឡើងនៃសង្គ្រាមលោកលើកទី៣។

សេណារីយ៉ូទី៤. គឺលោកពូទីនធ្លាក់។ ត្រង់ចំណុចនេះ លោក​ Jean-François Tain បានអះអាងថា អាចកើតឡើងទាល់តែកងទ័ពឈប់ស្តាប់បញ្ជាពូទីន ហើយប្រជាជនរុស្ស៊ីងើបបះបោរប្រឆាំងនឹងលោកពូទីន និងពួកអ្នកមាន និងអ្នកមានអំណាច(Oligarch) ដើរចេញពីលោកពូទីន។ ចំណែក សេណារីយ៉ូទី៥. គឺសង្គ្រាមនុយក្លេអ៊ែរ៕

ដោយ ៖ វណ្ណ សុគន្ធា