ផ្លូវការហើយ! កិច្ចប្រជុំកំពូលពិសេសអាស៊ាន-អាមេរិក នឹងធ្វើឡើងនៅថ្ងៃទី១២ និង១៣ ខែឧសភា ខាងមុខ

ក្រសួងការបរទេសកម្ពុជា កាលពីថ្ងៃទី១៦ ខែមេសា ម្សិលមិញ បានប្រកាសឲ្យដឹងថា កិច្ចប្រជុំកំពូលអាស៊ាន និងអាមេរិក នឹងធ្វើឡើងនៅរដ្ឋធានីវ៉ាស៊ីនតោន សហរដ្ឋអាមេរិក នៅថ្ងៃទី ១២ និងទី១៣ ខែឧសភា ឆ្នាំ២០២២ខាងមុខនេះ។ កិច្ចប្រជុំកំពូលពិសេសនេះ ធ្វើឡើងដើម្បីអបអរសាទរទំនាក់ទំនងដៃគូសន្ទនាអាស៊ាន​-អាមរិក ដែលមានអាយុកាល៤៥ឆ្នាំមកហើយ។

ក្រសួងការបរទេសកម្ពុជា បានបញ្ជាក់ឲ្យដឹងថា នេះ គឺជាកិច្ចប្រជុំកំពូលពិសេសលើកទី២ គិតពីឆ្នាំ២០១៦ ហើយជាការជួបប្រជុំគ្នាដោយផ្ទាល់មុខលើកទី១ សម្រាប់ថ្នាក់ដឹកនាំអាស៊ាន គិតចាប់តាំងពីឆ្នាំ២០១៧មក។ នៅក្នុងកិច្ចប្រជុំនាពេលខាងមុខនេះ ថ្នាក់ដឹកនាំអាស៊ាន និងលោកប្រធានាធិបតីអាមេរិក ចូ បៃឌិន  នឹងពិភាក្សាគ្នាអំពីមធ្យោបាយ និងវិធីសាស្ត្រនានា ដើម្បីបង្កើនកិច្ចសហប្រតិបត្តិការក្នុងវិស័យជាច្រើនដែលជាអាទិ៍ រួមមាន ការឆ្លើយតបនឹងជំងឺកូវីដ១៩ សន្តិសុខ សុខភាពសកល ការផ្លាស់ប្តូរអាកាសធាតុ ការអភិវឌ្ឍប្រកបដោយចីរភាព កិច្ចសហប្រតិបត្តិការលំហសមុទ្រ ការអភិវឌ្ឍធនធានមនុស្ស ការអប់រំ  និងចំណងទាក់ទងរវាងប្រជាជន និងប្រជាជន ក៏ដូចជា ការតភ្ជាប់ និងទំនាក់ទំនងសេដ្ឋកិច្ច។ ថ្នាក់ដឹកនាំអាស៊ាន និងសហរដ្ឋអាមេរិក ក៏នឹងធ្វើការផ្លាស់ប្តូរយោបល់គ្នាផងដែរ អំពីបញ្ហាតំបន់ និងអន្តរជាតិ ដែលជាផលប្រយោ​ជន៍ និងកង្វល់រួម។

នៅក្នុងអំឡុងពេល នៃកិច្ចប្រជុំកំពូលពិសេសនេះ ថ្នាក់ដឹកនាំអាស៊ាន និងសហរដ្ឋអាមេរិក នឹងដាក់ចេញនូវទិសដៅអនាគតនៃទំនាក់ទំនងរវាងអាស៊ាន និងសហរដ្ឋអាមេរិក ហើយនឹងលើកកម្ពស់ភាពជាដៃគូយុទ្ធសាស្រ្ត សម្រាប់ផលប្រយោជន៍រួមទៅវិញទៅមកនៃប្រជាជនអាស៊ាន និងប្រជាជនសហរដ្ឋអាមេរិក។ កិច្ចប្រជុំកំពូលពិសេសនេះ ក៏នឹងបញ្ជាក់ឡើងវិញផងដែរ នូវការប្តេជ្ញាចិត្តរួមគ្នា ដើម្បីរក្សាមជ្ឈភាព និងឯកភាពអាស៊ាន  តាមរយៈយន្តការនានា ដែលដឹកនាំដោយអាស៊ាន ក៏ដូចជា ដើម្បីបង្កើនជំនឿ និងទំនុកចិត្តគ្នាទៅវិញទៅមក ក្នុងការថែរក្សាសន្តិភាព ស្ថិរភាព និងវិបុលភាព នៅក្នុងតំបន់៕

ដោយ ៖ កោះកែវ