មន្រ្តីការទូតជាន់ខ្ពស់អាមេរិកថា ជោគជ័យរបស់កម្ពុជាជាប្រធានអាស៊ាន ក៏ជាជោគជ័យរបស់អាមេរិកដែរ

លោក Daniel J. Kritenbrink ឧបការីរដ្ឋមន្រ្តីការបរទេសសហរដ្ឋអាមេរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក បានអបអរសាទរដែលកម្ពុជាធ្វើជាប្រធានផ្លាស់វេនរៀបចំកិច្ចប្រជុំកំពូលអាស៊ាននៅក្នុងឆ្នាំ២០២២នេះ។ ក្នុងនោះ លោកបានគូសបញ្ជាក់ថា ជោគជ័យរបស់កម្ពុជាជាប្រធានអាស៊ាននេះ ក៏ជាជោគជ័យរបស់អាមេរិកផងដែរ។ លោក Daniel J. Kritenbrink បានគូសបញ្ជាក់ដូច្នេះនៅក្នុងសន្និសីទសារព័ត៌មាននៅព្រឹកថ្ងៃពុធនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅចំពោះមុខក្រុមអ្នកសារព័ត៌មានជាតិ និងអន្តរជាតិ លោក Daniel J. Kritenbrink បានអះអាងថា ទស្សនកិច្ចរបស់លោកនៅក្នុងប្រទេសកម្ពុជានាពេលនេះ គឺស្ថិតនៅក្នុងគម្រោងទស្សនកិច្ចជាច្រើនរបស់មន្រ្តីជាន់ខ្ពស់អាមេរិកនៅក្នុងឆ្នាំនេះក្នុងការធ្វើការជាមួយភាគីកម្ពុជាម្តងទៀតក្នុងនាមប្រធានផ្លាស់វេនរៀបចំកិច្ចប្រជុំកំពូលអាស៊ាន។ ជាមួយគ្នានេះ លោកបានប្រកាសទាំងរីករាយថា ជោគជ័យរបស់កម្ពុជាក្នុងនាមជាប្រធានអាស៊ាន ក៏ជាជោគជ័យរបស់អាមេរិកដែរ និងថា វា គឺជាផលប្រយោជន៍របស់អាមេរិកដែលកម្ពុជាទទួលបានជោគជ័យ។

លោក Daniel J. Kritenbrink មកធ្វើទស្សនកិច្ចនៅក្នុងប្រទេសកម្ពុជារយៈពេល២ថ្ងៃ គឺថ្ងៃទី១២ និងថ្ងៃទី១៣ ខែកក្កដានេះ។ អំឡុងពេលនៅក្នុងប្រទេសកម្ពុជា លោកបានជួបជជែកពិភាក្សាការងារជាមួយលោក ប្រាក់ សុខុន រដ្ឋមន្រ្តីការបរទេសកម្ពុជា សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃ និងលោក កៅ គឹមហួន​ រដ្ឋមន្ត្រី​ប្រតិភូអម​នាយករដ្ឋមន្ត្រី​ជាដើម។

នៅក្នុងជំនួបទ្វេភាគីកាលពីម្សិលមិញ លោក Daniel J. Kritenbrink និងលោក ប្រាក់ សុខុន បានពិភាក្សាអំពីបញ្ហាមួយចំនួនដែលទាក់ទងនឹងផលប្រយោជន៍ និងកង្វល់រួម ព្រមទាំងពេញចិត្តលើការរីកលូតលាស់ឡើងវិញនៃទំនាក់ទំនងពាណិជ្ជកម្ម គិតចាប់តាំងពីដើមឆ្នាំនេះ ក្រោយជំងឺរាតត្បាតកូវីដ-១៩។ លោក ប្រាក់ សុខុន ក៏បានលើកឡើងថា លោកកំពុងទន្ទឹងរង់ចាំទទួលស្វាគមន៍គណៈប្រតិភូសហរដ្ឋអាមេរិក ដើម្បីចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នៅប៉ុន្មានសប្តាហ៍ខាងមុខនេះផងដែរ៕

ដោយ៖ វណ្ណ សុគន្ធា