នយោបាយ

តុលាការកំពូល សម្រេចបដិសេធបណ្ដឹងសុំនៅក្រៅឃុំរបស់លោក សៀម ភ្លុក ស្ថាបនិកគណបក្សបេះដូងជាតិ

បានផុស

២ ខែ មុន

នៅ

ថ្ងៃពុធ ២៧ កក្កដា ២០២២

ដោយ

នៅថ្ងៃពុធ ទី២៧ ខែកក្កដា ឆ្នាំ២០២២នេះ តុលាការកំពូលបានសម្រេចបដិសេធបណ្ដឹងសុំនៅក្រៅឃុំបណ្ដោះអាសន្នរបស់លោក សៀម ភ្លុក អតីតស្ថាបនិកគណបក្សបេះដូងជាតិ ដោយសម្អាងថា ការអនុញ្ញាតឱ្យនៅក្រៅឃុំអាចប៉ះពាល់ដល់ដំណើរការនីតិវិធីរបស់តុលាការ នេះបើតាមការឲ្យដឹងពីលោក ជូង ជូងី ដែលជាមេធាវីការពារក្ដី។

បើតាមលោក ជូង ជូងី ការសម្រេចរបស់តុលាការកំពូលនេះ បានធ្វើឲ្យប៉ះពាល់ខ្លាំងដល់សិទ្ធិ កូនក្ដីរបស់លោក ពីព្រោះលោក សៀម ភ្លុក មិនបានក្លែងឯកសារ ហើយក៏មិនបានដឹងថា ឯកសារដែលបានដាក់ទៅក្រសួងមហាផ្ទៃ នាពេលកន្លងមកនោះ ជាឯកសារក្លែងនោះទេ។

គួររំលឹកថា កាលពីថ្ងៃទី២៦ ខែឧសភា ឆ្នាំ២០២២ សាលាឧទ្ធរណ៍ រាជធានីភ្នំពេញ បដិសេធ សំណើសុំនៅក្រៅឃុំជាបណ្តោះអាសន្នរបស់លោក សៀម ភ្លុក ម្តងហើយ ដោយលើកហេតុផលថា ដើម្បីរក្សាជនត្រូវចោទទុកជូនតុលាការបន្តនីតិវិធី។

លោក សៀម ភ្លុក ត្រូវបានតុលាការចោទប្រកាន់ពីបទ “ក្លែងបន្លំ និងប្រើប្រាស់លិខិតក្លែង” កាលពីថ្ងៃទី២៧ ខែមេសា ឆ្នាំ២០២២ និងត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅ ពន្ធនាគារព្រៃសភ្លាមៗនៅថ្ងៃដដែលនោះ។

ថ្មីៗនេះ លោក សៀម ភ្លុក បានសរសេរលិខិតមួយជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយស្នើសុំឲ្យទម្លាក់ចោលការចោទប្រកាន់លើរូបលោក ដោយបានលើកឡើងថា លោកមិនបានក្លែងបន្លំឯកសារ ឬស្នាមេដៃប្រជាពលរដ្ឋទេ ហើយលោកក៏មិនមានចេតនាក្លែងបន្លំឯកសារ ឬស្នាមេដៃប្រជាពលរដ្ឋនោះដែរ។ ក្នុងករណីមានការក្លែងបន្លំមែន គឺជាកំហុសដោយអចេតនា ខ្ជីខ្ជា មិនមែនជាចេតនាក្នុងការប្រព្រឹត្តបទល្មើសទេ៕

ដោយ ៖ កោះកែវ