គណបក្ស​ប្រជាជនកម្ពុជា​នៅព្រឹកមិញនេះ បាន​បើកមហាសន្និបាតវិសាមញ្ញតំណាងទូទាំងប្រទេសរយៈពេល ២ ថ្ងៃ នៅស្នាក់ការកណ្ដាលគណបក្សនៅ​រាជធានីភ្នំពេញ។

មហាសន្និបាតនេះក្រោមអធិបតីភាពសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និង​មានការចូលរួមពីសមាជិកអចិន្ត្រៃយ៍ សមាជិកគណៈកម្មាធិការកណ្តាល ប្រធានគណបក្សទូទាំងប្រទេស រួមទាំងមន្រ្តីជាន់ខ្ពស់នៃគណបក្សប្រជាជនកម្ពុជា​សរុប​ជាង ៣ ពាន់នាក់។

ពិធីបើកមហាសន្និបាតវិសាមញ្ញ មានការថ្លែងសុន្ទរកថាបើក​ដោយសម្តេចអគ្គមហាពញាចក្រី​ ហេង សំរិន ដែលបង្ហាញ​ពី​របាយការណ៍លទ្ធផលនៃការអនុវត្តកម្មវិធីនយោបាយគណបក្សពីឆ្នាំ២០១៨-២០២៣ និងទិសដៅភារកិច្ចឆ្នាំ​២០២៣ និងកិច្ចការមួយចំនួនទៀត។

ចំណែករបៀបវារៈថ្ងៃទី ២ នៃមហាសន្និបាតវិសាមញ្ញ នឹង​មាន​ការអនុម័តលើរបាយការណ៍អំពីលទ្ធផលនៃការអនុវត្តកម្មវិធីនយោបាយគណបក្សពីឆ្នាំ២០១៨-២០២៣ និងទិសដៅភារកិច្ចឆ្នាំ២០២៣, ការអនុម័តលើសេចក្តីព្រាងកម្មវិធីនយោបាយ​របស់គណបក្ស សម្រាប់ការកសាងនិងការពារមាតុភូមិឆ្នាំ២០២៣-២០២៨ និងមានមតិបូកសរុបនិងអនុសាសន៍​ការណែនាំរបស់ស​ម្តេចតេជោ ហ៊ុន សែន ប្រធានគណបក្សប្រជាជនកម្ពុជា៕